1 Di kfati Dyékob, lkaf Dyosif i maan, na nalakan na mngel kenen. 2 Kafnge ani, dek Dyosif i dad saligan i too fulung mulung, mulung i laweh i maan, du fye léét balok. Taman i dad to fulung mulung bnulungla i lawehan. 3 Na i klola mulung i laweh maan gafat di fat falò duh, du ani gal i klo i kbulung i laweh i dad mati. Na i dad to di Idyif flidù i nawala klo i fitu falò duh.

4 Na di kafto i dad butang i kaflidùla di kfati Dyékob, man Dyosif di dad salig i harì, “Ku kandoyu agu, tugadyu di ku Faraon i mangu ani. Manyu di kenen, 5 ‘Di kagu màgu mati, fakanggu di kenen lbanggu kenen ditù di gulambang tafalan fatlagad aye di Kanaan. Taman, ku fakay di ge moon, salu agu ditù du lambang agu ku Mà, na lê agu sa samfulê dini.’ ”

6 Na di kgadè Faraon i snalek Dyosif, tnimelan kenen, manan, “Hae, salu ge ditù na lbangam i maam. Dnohoam i tafakangam di kenen.”

7 Taman tamdà Dyosif du lambang i maan. Na i kdee dad ganlal Faraon, na i dad saligan di bong gumnean, na dademe to nun dengeg di banwe Idyif mti magin ku Dyosif. 8 Na magin kenen i malayan, i dad flanekan, na i dad malay i maan. Alò i dad malnak dad ngàla, dad bilibilila, dad kambingla, na i dad bakala là magin, bay mtagak di Gosén. 9 Nun dademe i magin smakay dad kudà, na dademe smakay i snakay fadyol i kudà. Too dee dad to magin ku Dyosif du lambang i maan.

10 Di kakella di gal gumlék fali di Atad, di faltù i yéél Dyordan, mlanu ale. Na ditù flidù Dyosif i nawan di maan, klo fitu duh. 11 Na di kite i dad to di Kanaan i kaflidùla déén di gumlék fali di Atad, manla, “I dad to di Idyif too ale mlidù.” Taman i banwe gumimòla dun ani dnagitla Abél Misraim na i gumtatekan dunan, “I guflidù i dad to di Idyif.” Gumimòla ani di faltù di yéél Dyordan.

12 Too dnohò i dad ngà Dyékob i katedan dale. 13 Hae, du nebela i lawehan di tanà ditù di Kanaan, na lbangla di ilib di Makféla i banwe mdadong di Mamri gsen di gusut i duh. Na ilib na tanà ani bnayad Abraham mdà di ku Ifron, to di Hiti, du nimoan gal gulambang. 14 Na di kafnge Dyosif lambang i maan, samfulê kenen di Idyif, demen mulê i dad flanekan, na i kdee dademe dad to magin kenen lambang i maan.

15 Na du tamati nan Dyékob, stulen i dad flanek Dyosif, manla, “Fadê ken nun fa ksasè fandam Dyosif gito, na ani ken malas gito du mdà di sasè mgimoito di kenen di muna.”

16 Taman nun ftugadla i talùla di ku Dyosif, manla, “Di là fa mati Mà, 17 katedan gami, ku gami tmulen di ge i gmanan, na ani manan, ‘Begam nlifet i salà i dad flanekam mgimòla di ge di muna.’ Taman tabyà, begam nlifet i salà mgimòmi di ge, gami dad salig i Dwata, Dwata i maam.” Na di kaklinge Dyosif i kmanla, mngel kenen.

18 Kafnge én, salu i dad flanekan di kenen, na lkuad ale di kenen. Na manla, “Tadini gami nan, du fye nimoam gami dad lifanam.”

19 Kabay man Dyosif di dale, “Nang gamu likò, du ise deg mukum gamu, du alò Dwata fakay mukum. 20 Du balù i knayèyu ku fansasèyu agu di muna, bay too fye kfagu Dwata, du fye dnohoan baling i knayean, fye là mati i dee dad to di kalnusla, na én duenan mto ito fa ani. 21 Taman nang gamu likò. Nifatta gamu na i dad ngàyu.” Na ani kfagu Dyosif i taluan, du nlalan na flehewan i nawa i dad flanekan lagi.

22 Na Dyosif na i malay i maan fadlug mnè di banwe Idyif. Na tamlatu sfalò falin di kfatin. 23 Di là fa mati kenen, teenan fa i dad ngà i dad fuan, i dad fù Ifraim. Na léan teen i dad ngà Makir, i tingà Manasas, na di ksutla gagotan ale fa.

24 Na satu duh, man Dyosif di dad flanekan, “Na mdadong nan i bang kfatigu, bay là gamu fbayà i Dwata. Hae, dnohoan i fakangan di dad gutambulito Abraham, Isaak, na Dyékob, du tnabengan gamu na neben gamu kadang, mdà di banwe ani salu di banwe tafakangan i dad belito.”

25 Kafnge én, nun kated Dyosif i dad dademe bel di Israél, manan, “Di kebe Dwata gamu samfulê di Kanaan, fnakangyu agu nebeyu mulê kadang balù i dad tulangu.” 26 Na déén nan gumati Dyosif, na tamlatu sfalò i falin. Na bnulungla i lawehan, du fye léét balok, na fkahla kenen di lungunan déén di Idyif.