Mark
I Fye Tulen gablà ku Dyisas Krayst i Sulat Mark
Kafaglabat i sulat Mark
Mark smulat libru ani, na ditù di Roma i gusmulatan, na sulatan i dad to di banwe Roma. Kenen i tnanin smulat gablà di dad mgimò Dyisas Krayst klon dini di tah tanà. Tingà fa i nawa Mark di kdini Dyisas. Dyérusalém i syudad gumdaan na gulamnokan. Na slaan makuf Mark di gal gustifun i dad gal mlalò ku Dyisas di bangla gal dmasal di Dwata, na déén gumdà Mark dmilè ku Fiter na i dademe gal mlalò ku Dyisas. Na man i dademe, faglut Mark di ku Dyisas mdà di ku Fiter.
Kafnge i dee fali, mbaling too bong i ksalig Mark di ku Dyisas. Na di slà ditù Fiter di banwe Roma, Mark i satu dmeme kenen. Na too matnù i gnadean mdà di ku Fiter. Magin kenen ku Fol na Barnabas tmulen i Fye Tulen gablà ku Dyisas.
Sulat Mark ani du fye gadè i dad to faglut ku tan i duen Dyisas fafati. Landè alì gmanan gablà di dad tdò Dyisas, bay tulenan i dad tnikeng mgimoan, du fye gadèla kenen too mtulus. Na faglabat Mark nun glal Dyisas mlifet dad salà i dad to.
1
Gablà ku Dyan Gal Munyag
(Matyu 3:1-12; Luk 3:1-18; Dyan 1:19-28)
1 Ani kagatbù i Fye Tulen gablà ku Dyisas Krayst Tingà Dwata.
2 Nun man Dwata di Tingaan fsulatan tugadan Isaya i gman,
“Dekgu saliggu muna di ge,
du fatlagad i dalanam.
3 Tamlo kenen mdà di banwe landè to mnè déén,
manan, ‘Fatlagadyu i dalan i Amu,
na tanluyu i gumagun.’ ”*Isaya 40:3. I fléd ani gablà di kafatlagad dad to i ktola du fan kel i Amu, dunan Dyisas Krayst.
4 Taman dek Dwata Dyan, i to gal munyag. Na mnè kenen di banwe landè to mnè déén. Na tdoan dad to stifun déén, fye msal ale na tmagak dad sasè nimòla na fbunyag, du fye nlifet Dwata dad salàla.
5 Na too dee dad to gal salu déén di kenen, mdà di klamang banwe Dyudiya, na mdà di syudad Dyérusalém. Na tulenla kenen i dad salàla, na bnunyag ale Dyan di bong yéél Dyordan.
6 Na i klaweh lsak Dyan dunan i bul kamél nanem, na i galingan kindal lmanaf. Tlangas na tnab i knaanan.
7 Na ani galan santulen di dad to, manan, “Nun fan kel satu to tmadol deg. Too kenen mdatah fa di deg, taman là agu gablà balù lkuad na mbel ikat talumfaan.†Di bang Dyan mnè di tah tanà satu nimò fimò dad to i dad mdanà lifan dunan malob blì i dad to kel di gumnè. Bay di fandam Dyan too mdatah fa Dyisas di kenen, taman là kenen gablà balù mgimò lifan mbel i talumfaan. 8 I kbunyaggu gamu ani fagu alò di yéél, bay i kbunyag i to tmadol deg fagu di Mtiu Tulus blén gamu.”
I kbunyag ku Dyisas, na ktilew kenen
(Matyu 3:13–4:11; Luk 3:21-22; 4:1-13)
9 Là mlo ani, salu Dyisas di ku Dyan fdu di Nasarét déén di banwe Galili. Na fbunyag kenen ku Dyan di yéél Dyordan. 10 Na di kalwaan di lam yéél, teenan nun gumgukà i langit, na fdanà Tulus Dwata mdaf di kenen gambet abun. 11 Na nun talù mdà di langit, manan, “Ge tingàgu toogu kando, na too fye nawagu ge.”
12 Kafnge én, gasil fsalu Tulus Dwata Dyisas di banwe landè to mnè déén. 13 Fat falò butangan mnè ditù, na di klon déén tnilew kenen Satanas. Na nun fa déén dad labè lmanaf di bnas, bay dad kasaligan Dwata mifat kenen.
I kalék Dyisas fat dad to mlalò kenen
(Matyu 4:12-22; Luk 4:14-15; 5:1-11)
14 Kafnge én, di kaglam Dyan di bilanggù samfulê Dyisas di banwe Galili du samtulen i Fye Tulen mdà di Dwata. 15 Na manan, “Ani bang kagdohò i gman di Tnalù Dwata, du tamdadong nan kagot Dwata. Taman msal gamu na tnagakyu dad sasè nimòyu, na faglut gamu di Fye Tulen mdà di Dwata.”
16 Na di kagun ani, magu Dyisas di kilil i bong lanaw Galili, na teenan lwe lagi saflanek, Simon na Andru. Mukut ale di lanaw du ale dad to gal mwè nalaf. 17 Na man Dyisas di dale, “Magin gamu deg, du balù ani galyu nimò meye nalaf, tdòta gamu meye dad to du fye mlalò ale deg.” 18 Na di kmanan ani, tagakla fukutla, na magin ale kenen.
19 Di kagula là mlo teen Dyisas lwe saflanek, Dyém na Dyan, dad ngà Sébidi, di lam awengla. Tambél ale dad fukutla. 20 Na di kite Dyisas dale tlon ale du faginan, na tnagakla màla Sébidi na dad to tnadenla di lam awengla, du magin ale ku Dyisas.
I kafalwà Dyisas dad busaw
(Luk 4:31-37)
21 Na di kagula, salu ale di tukay banwe Kafernaum. Na kakel i Duh Kaftud dad Dyu, fusuk Dyisas di gal gusatdò dad Dyu, na tamdò. 22 Di kaklinge dad to i tdò Dyisas too ale tikeng, du too nun glal i katdoan, là salngad di dad to gal tamdò flalò blé Dwata fagu di ku Mosis.
23 Di là fa fnge i katdò Dyisas nun satu lagi déén nun busaw. Na mkit kenen, 24 manan, “E Dyisas mdà di Nasarét, tan labetam gami? Fanam gami kè falmo? Gadègu ku simto ge! Ge sa To Landè Salà dek Dwata.”
25 Kabay nngak Dyisas i busaw, manan, “Fanak ge! Lamwà ge di to én.” 26 Na too fakakal i busaw lagi ani na mkit na lamwà.
27 Too tikeng i kdee dad to déén, taman sasalek ale, manla, “Tan kè ani? Satu falami tdò ani dé? Hae, du nun glalan mdek dad busaw lamwà, na mimen ale!” 28 Na too mlal mbel santulen gablà ku Dyisas di klamang banwe Galili.
I kafgulê Dyisas tewe Fiter na dademe to
(Matyu 8:14-17; Luk 4:38-41)
29 Na di kdà Dyisas di gusatdò dad Dyu, salu kenen di gumnè Simon na Andru. Na magin Dyém na Dyan. 30 Kakella déén tatì milè tewe Simon libun, du too minit lawehan. Na gasilla santulen ku Dyisas kagkahan. 31 Di kaklinge Dyisas dun, fdadong kenen, na nagotan sigalan du ntékan. Di kték Dyisas kenen, magwè initan, na fles kenen mlé dale knaan.
32 Na mdà di kasdaf i duh di flabi én, nebe dad to di ku Dyisas kdee dademela nun tduk na dad to nun busaw, 33 na dee dad to mdà di lunsud stifun mdadong di gufusuk i gumnean. 34 Na dee dad to fanguléan mdà di dee bung tduk na falwaan dee busaw di dad to salu déén. Kabay là faloh Dyisas i dad busaw ku talù, du dilèla ku simto kenen.
I katdò Dyisas di Galili
(Luk 4:42-44)
35 Na di too flafus di tmadol duh kifu fa, mték Dyisas na mdà salu di satu banwe gulandè to aloan satu du dmasal. 36 Kabay lê mdà ale Simon du mngabal kenen. 37 Na di kitela kenen, manla, “Too dee dad to mngabal ge.”
38 Kabay man Dyisas, “Fles ito di dademe banwe mdadong dini du fye lêgu tdò i Fye Tulen di dad to ditù, du én sa duengu salu dini di tah tanà.” 39 Taman lamngab ale Dyisas di dee banwe di klamang Galili, du tamdò di dad gal gusatdò dad Dyu, na falwaan dad busaw mdà di dad to.
I kafgulê Dyisas i to tanfig
(Matyu 8:1-4; Luk 5:12-16)
40 Na satu duh nun to tanfig salu di ku Dyisas. Lkuad kenen di munan, na fakdo manan, “Ku beg ge mayè, gaganam fgulê deg di tduk fagsik deg ani.”
41 Too bong kakdo Dyisas kenen, taman nagotan, na manan, “Mayè agu sa. Mgulê ge nan.” 42 Na too glut, tamgulê sa to tanfig, talandè tfigan.
43 Na gasil fdà Dyisas na toon dek, manan, 44 “Nangam tulen ani di balù simto to, bay én nimoam, mdà ge na fitem laweham di bà di Dwata, na nebem di kenen dsuam di Dwata i fgadè ku Mosis, du én gugmadè dad to too glut tamgulê ge.”
45 Kabay di kdà i to tafangulê Dyisas, balingan tulen di kdee dad to i mgimò Dyisas di kenen, na nbelan santulen ani di klamang banwe. Taman talà gfite Dyisas di dademe dad banwe di lam Galili du alì dee dad to gal stifun di safédan. Baling kenen lamngab di dad banwe gulandè dee to. Kabay knean salu déén di kenen dad to mdà di kdee banwe déén.
*1:3 Isaya 40:3. I fléd ani gablà di kafatlagad dad to i ktola du fan kel i Amu, dunan Dyisas Krayst.
†1:7 Di bang Dyan mnè di tah tanà satu nimò fimò dad to i dad mdanà lifan dunan malob blì i dad to kel di gumnè. Bay di fandam Dyan too mdatah fa Dyisas di kenen, taman là kenen gablà balù mgimò lifan mbel i talumfaan.