5
Fawag di libun mlafà yaanan
1 Tingàgu, nangam fbayà i dad gmangu di ge,
bay fanlingem i kfulunggu na i kaglabatgu.
2 Du ku ani nimoam, gmadè ge i fye nimò,
na di ktaluam i gumite i dademe to nun gnadeam.
3 Na i kalak i libun mlafà yaanan, too mi salngad i tnab,
na i taluan too mladal, salngad i fngalo,
4 bay di gusenan too nun kféétan,
na too gamgebe di kaflayam.
5 I libun gambet ani, alò gamgebe ge di banwe i dad mati,
na i dalan gumagun, dunan dalan salu di fati.
6 Laan faldam i dalan gumlawilan,
na laan gadè, bay i dalanan too bigkò.
7 Dad ngàgu, too gamu flinge deg,
na nangyu glifet i mangu di gamu ani.
8 Too gamu fawag di libun gambet ani,
na nang gamu fdadong di gumnean,
9 du ku salu gamu di kenen, lana i kgafè gamu,
na là mlo malmo gamu di falel i dad to labè, i landè kakdo.
10 I dad to làyu dilè nwèla di gamu kdee dad knunyu,
na too gamu faflayam mwè i knunyu, bay baling nfun i dademe.
11 Na di fan kafto i nawayu kadang, mlanu gamu mdà di kalmo ilawehyu.
12 Na msal gamu kadang manyu, “Fye moon di munafa, ku fanlingegu i tdò deg,
na ku fanlingegu moon i kngak deg.
13 Di muna, là agu mayè flinge i dad tamdò deg,
tatìgu bayà i tdòla deg.
14 Na ani gukelgu, nun sasè kyàgu di mata i dee dadto.” Ani manyu kadang.
15 Kaflingengu dun, ku fkahta di kinum, én guminumyu di gamuguminum,
én alòyu too kanbong nawa i gamu yaan.
16 Landè gufyeyu di dad ngàyu di dademe libun ise yaanyu.
17 I dad ngàyu lamnok sa moon di ifatyu, na gamtabeng ale gamu,
ise baling ku di dademe to gutmabengla.
18 Taman flehew gamu di glut yaanyu,
du too nun klehewyu di dale.
19 Flehew gamu di kafye bawehla,
na mdà di kakdola gamu na di kafye nimòla di gamu,
i gamlé gamu klehew.
20 Taman dad ngàgu, kan ku kandoyu i satu libun ise yaanyu?
Na kan ku dnawatyu i kakdo mdà di libun yaan i dademe?
21 Du teen Dwata i kdee nimòyu,
na balù nè i gusaluyu, teenan gamu.
22 I dad salà i to sasè mbaling fawel,
du i dad salaan, mawel kenen.
23 Mati kenen du laan gagan damnan i kton,
na du laan fulung faldam, én mebe kenen di fati.