9
I kfulung faldam na i là fulung faldam
1 Na i kfulung faldam flingengu di to fdak i
gumnean,
na nun fitu lahanan.
2 Kmatê kenen i lmanaf du fnistan, na nun bolan fye nem dininuman,
na tafnatlagadan i gukmaanan.
3 Na dekan i dad saligan libun ditù di gunun dee to,
du nlakla i dad to.
4 Na manla, “Na gamu dad kulang kfulung, salugamu dini,
na gamu landè kaglabat,
5 salu gamu dini, du kmaan gamu i knaan
na minum gamu i ninum i tafnatlagadan gamu.
6 Tnagakyu i kulang kfulungyu, du fye mlawil gamu,
na lalòyu i dalan kaglabat.”
Ani gman kfulung fagu di dad saligan.
7 Ku nngakam i to madoy, balingan ge fyà,
na ku nngakam i to sasè, balingan ge fansasè.
8 Nang ge mngak i to madoy, du knangan ge,
bay ku nngakam i to fulung, toon ge nafè.
9 I fngewem di to fulung, gatnù i kfulungan,
na i tdoam di to matlu, gatnù i gnadean.
10 Du fye mbaling ge to nun kfulung, fye ku funa nun klikoam di Dwata.
Du ku gmadè ge Dwata i Landè Salà, gfunam i kaglabat.
11 Ku fulung ge faldam, én sa gamlawil ge.
12 Du ku fulung ge faldam, ge gukel i kafye,
bay ku knagolam i kfulung, ge gukel i kaflayam.
13 Guflingengu i to là fulung faldam di satu libun too mugak,
na landè gnadean, na landè kyaan.
14 Déén gusudengan di bà takab i gumnean
ku demen sudeng kenen di gugfan i banwe di gumite i dee dad tokenen,
15 na tamlo du nlakan i dad to magu mlius
i dad to fadlug di kagula,
16 na manan di dad to landè kaglabat, manan,
“Gamu dad kulang kfulung, fusuk gamu,
17 too mi fa i yéél tnaku,
na fye fa nem i knaan ku kmaan ge di gugbunin.”
Ani gman i libun là fulung faldam.
18 Kabay i kdee mgeben di gumnean, làla gadè i gukella ku gfusukale déén,
du dad muna mgeben tamati ale,
na tasbool ale di gumnè i dad mati.