14
1 I libun fulung faldam, too fye kifatan i malayan, taman toofye knèla,
bay i libun là fulung faldam, falmon i malayan.
2 I to mimò matlu, nun klikoan di Dwata,
bay i to gal mgaw toon fite landè klikoan di Dwata.
3 I kafdag i to là fulung faldam, gambet i bunalan i demen to nabalù kenen kto,
bay i dad gman i to fulung faldam, én i klungan.
4 Ku landè lmanaf damyol i daru, landè lam i lawigam,
bay fagu di tabeng i lmanaf bong i kantum.
5 I to gsalig tmulen di gususay too tmulen i kaglut,
bay i to là gsalig alò tmulen kakakéng.
6 I to gal madoy, mngabal i kfulung, bay landè teenan,
bay i to nun kaglabatan, mlal kenen gambet.
7 Fawag ge di to là fulung faldam,
du landè fye gagbetam di kenen.
8 I kfulung i to fulung mebe i kton, gmadè sa kenen ku tan inimoan,
bay i to là fulung faldam, én fandaman gmadè kenen ku tan inimoan, bay fangawan i kton.
9 I dad to là fulung faldam ku gamsalà tatì landè di dale,
bay i dad to fye, mngabal ale kfagu klifet i dad salà.
10 Landè to fakay too magin ge di sasè klidù nawam,
na landè to fakay too magin ge di too klehew nawam.
11 I gumnè i to fye, sana ktadagan,
balù tamlo nan malbà gumnè i to sasè.
12 Nun dalan fandam i to too matlu,
bay gusen i dalan ani di fati.
13 I klidù i to fakay bunin fagu di ulén,
bay kafngen mulé déén fa i kliduan di nawan.
14 I to kmagol i fye nimò too gamdawat i balas di sasè mgimoan,
bay i to mimò fye, mdà di fye mgimoan, nun kafye gdawatan.
15 I to kulang i kfulungan faldam, fnaglutan balù tan i lingen,
bay i to fulung mebe i kton, toon fanlinge ku nun kaglutan.
16 I to fulung faldam, nun klikoan di Dwata na fawag di ksamuk,
bay i to là fulung faldam, tatì mimò na là fgeye na sasè igukelan.
17 I to mlal malbut mlal gsalà,
na knang i dad to i to mgaw i demen to.
18 I dad to kulang i kfulungla faldam, gamdawat i balas di klandèkfulungla,
bay i dad to fulung mebe i ktola, matnù i gnadèla.
19 Satu duh, i dad to sasè, lkuad di muna i dad to matlu,
du fdanà ale na too ale fakdo mni tabeng.
20 I to landè, knang i dad to balù fa i demen saldan,
bay i to nun bong knun, too dee samgalak kenen.
21 Na balù simto mnang i to landè, gamsalà kenen,
bay ku simto kamdo kenen nun kafyen.
22 Ku falam fandam kimò sasè gsalà ge,
bay ku falam fandam kimò fye nun dad to kamdo ge na smalig ge.
23 Ku too ge mimò nun fye kneam,
bay ku én nimoam alò tì stulen, mbaling ge to landè.
24 I to fulung faldam, i untungan dunan i kfulungan,
bay i to là fulung faldam, i untungan dunan i klandè kfulungan.
25 Ku i to tmulen i kaglut di gumusay, gafalwà kenen dee to difati,
bay ku i to tmulen kéng dee to nangkalan.
26 I klikò di Dwata gamlé di to ksalig,
na kamlung i dad ngaan.
27 I klikò di Dwata gamtabeng ge, gambet yéél mdà di sfuten,
na gafalwaan ge di ksasè gamgebe ge di fati.
28 I eneg i satu harì fdu sa di nun dee dad ton,
bay ku landè dad ton, landè sa enegan.
29 I to là mlal falbut, nun bong kaglabatan,
bay i to mlal falbut, fdilean i klandè kaglabatan.
30 I to nun ktanak i nawan, én gafye i lawehan du gafgulê,
bay i to nun kingà nawan, én gamsasè i lawehan du falmon.
31 Ku bankutam i to landè, knangam Dwata i mimò kenen,
bay ku tnabengam i to landè, mafè ge Dwata.
32 I falmo i to sasè i sasè nimoan,
bay i kamlung i to matlu i kafyen.
33 Nun kfulung mnè di nawa i to nun kaglabat,
bay i to là fulung faldam, landè gnadean gablà di kfulung.
34 I katlu nimò i dad to, én fdatah i banwela,
bay i ksasè nimò i dad to, én gafyà i banwela.
35 Too lehew i harì i saligan fulung faldam,
bay fanlayaman i saligan mimò magagyà nimò.