24
1 Nang mibal nawam i kagkah dad to sasè,
na nang ge mayè dmeme dale,
2 du gal ale faldam i kibòla smamuk,
na galla sanman gablà di kimòla sasè di demela to.
3 Fagu di kfulung i satu to gafdakan i gumnè,
na fagu di kaglabatan nun kgal i gumnean,
4 na du nun gnadean,
nun mabtas na nun fye baweh kandeenan di dad sibayan.
5 Fye fa i to fulung faldam di to too mgal,
du too mdatah fa i gnagan i to nun gnadè di to nun kgal,
6 du ku fan ge salu di gusfati, mni ge funa i fye fngewe,
na fagu di fye kafngewe i dee mebe,
na matu ge sa di kasfati.
7 I mngalam talù i to fulung faldam là glabat i to là fulungfaldam,
taman ku nun kastulen too mngalam, landè timelan du laan glabat.
8 I to funan fandam i kiboan mimò sasè,
én kdagit kenen i to mimò samuk.
9 I ksamuk i gal fandam i to là fulung faldam, salà sa,
na knang dad to i to gal madoy.
10 Ku mlungay i nawam di nun samuk,
too glut mlungay ge.
11 Faflalam falwà i to landè gugsalaan,
i fan fnati i dademe.
12 Kabay ku balingam man, “Landè gadègu, nalandè labetgu di to atù,”
bay gmadè Dwata ku tan i mnè di nawam,
du kenen too meye ge, taman gadean i kdee,
taman bnalasan ge di kdee dad nimoam.
13 Tingàgu, minum ge tnab, du too fye neman,
na tnab mdà di dalit i sugen too mi.
14 Na too fye nem i tnab di baam, salngad i kafye i kfulung dinawam,
taman toom fkah di nawam kfulung,
du nun kadang gufyem di satu duh,
na gdohò i kafye i galam fatan.
15 Nang ge meye i kfagum mlayam i to matlu, salngad i nimò i tosasè du tmaku,
na nangam falmo i gumnean,
16 du balù file dulê fnugen i to matlu lêman gték,
bay i to sasè, di kakel i too sasè kalima, laan gték.
17 Nang ge lehew ku nun sasè kel di to dmuen ge,
na nang flehew i nawam di kfugenan,
18 du ku ani nimoam gadè sa Dwata na laan mayè dun,
na ken laan baling fanlayam i to dmuen ge.
19 Nangam fsamuk i nawam gablà di dad to sasè,
demen nang mibal nawam i kagkahla,
20 du dad to sasè landè fatanla,
na landè gufyela di satu duh.
21 Tingàgu, fye ku nun klikoam di Dwata na i harì,
na nang ge magin i dad to là mimen dale,
22 du dad to gambet ani nun kalmola tatì makto kel,
du landè gmadè ku tan i flayam blé Dwata na i harì di dale.
Nun dad gman i dad to fulung faldam
23 Ani i dad dademe gman i dad to fulung faldam:
Là fye ku i to gal mukum nun nsenan di dad to nukuman.
24 Du i to mukum, ku di kukuman i to gamsalà na manan landè salaan,
fanlagi kenen i dad to na kdee dad to mnang nawala kenen.
25 Kabay i to mukum, ku nukuman i to gamsalà na faflayaman i toani,
nun gufyen na dnayen kenen i dad to.
26 I to tmimel i too glut timel,
én ilè i to ani too fye deme sgalak.
27 Funam fatlagad i nligom, du fye gadeam nun gumweam,
kafnge én fdakam gumneam.
28 Nang ge tmulen gablà di demem to di gususay ku landè duenan,
na nang ge tmulen ise glut gablà di kenen.
29 Na nangam man, “E, malas agu i sasè nimoan dideg.”
30 Glius agu di satu nligo nfun i to malwe mimò
na là fulung faldam.
31 Na di klamang nligon tatmabò dad bnas nun sual,
na salnok i dad dademe sabat, na tamalbà i labatan batu.
32 Na di kitegu ani, toogu fkah di fandamgu,
na nun kagbetgu.
33 I gagbetgu dini, fakay fadlug ge milè,
na fadlug kudang, na fadlug ftud,
34 bay ku én alò i nimoam, klom kudang kel di ge klandeam,
salngad kakel i satu to mebe tek du tmaku.