Salmo 33
33
I lingag dad to dmayen Dwata
1 Flehew gamu di kafye Amuito Dwata, kdeeyu dad to matlu!
Én gablà nimò dad to mimen Dwata, dunan dmayen kenen.
2 Dnayenyu Amuito Dwata fagu di too fye kakbityu i dad agafyu gambet i arfa na i dad dademe nun tafas.
3 Lingagyu i falami lingag dmayen Dwata;
na tooyu fanse i kagafyu faginyu di klingag dmayen di kenen;
na mkit gamu di klehew,
4 du i kdee man Amuito Dwata too glut,
na i kdee nimoan too gsalig.
5 Too mabtas di Amuito Dwata i matlu nimò na matlu kukum.
I bong kakdon landè kgilin gafat di kdee to di tah tanà.
6 Fagu alò di tnaluan mgimò Amuito Dwata i langit, duh, na bulen,
na i kdee blatik.
7 Tasansatun i dad yéél du nimoan mahin,
na én gusamtifunan dun di gumngalaman.
8 Kdeeito dad to di tah tanà, fdanà ito moon di Amuito Dwata,
na kanlikoito i bong glalan,
9 du fagu alò di tnaluan mgimoan i banwe;
alò fagu di kdekan tanun kdee mgimoan.
10 I Amuito Dwata gmagan falmo i fan nimò dad to là faglut di kenen;
snamukan i knayèla nimò na landè gukel i nimòla.
11 Kabay i kenen fan nimò dnohoan, na là matlas i fandaman kel di landè sen;
na là mili i knayean di dad to kel di landè gusenan.
12 Nun kafye i banwe gumnè i dad to fdatahla i Amuito Dwata di nawala,
i dad mgalékan du nfunan.
13 Meye Amuito Dwata mdà di langit na teenan kdee dad to.
14 Mdà di gusudengan gumagot i kdee,
neyen i kdee to mnè di tah tanà.
15 Glabatan i kdee mnè di lam i fandamla du kenen i mimò dale,
na gadean i kdee mgimòla.
16 Ise fagu di dee sundalun i là fisan satu harì,
bay fagu di knayè Dwata.
Ise fagu di bong gal satu sundalu galwà kenen di agot i dademen sfati.
17 I dad malbang kudà snakay di kasfati là gablà snalig du fye là fisan ito di kasfati,
du balù i bong gal i kudà là gafalwà gito.
18 I Amuito Dwata i too meye na mifat dad to nun klikò di kenen,
i dad to smalig di kakdon landè kgilin,
19 du fye falwaan ale di fati,
balù ku nun kel bong kbitil.
20 Alò Amuito Dwata i gusmaligito;
kenen i tmabeng na kamlung gito.
21 Du Dwata too mtiu, kenen i gusmaligito,
na kenen gumdà i klehewito.
22 Amumi Dwata, mulà moon ku i kakdom gami landè kgilin,
du alò ge sa i gusmaligmi.