Salmo 104
104
I lingag dmayen Dwata, i mimò kdee
1 Too mdà di nawagu mlé fye di Amugu Dwata!
E Amugu, E Dwatagu, too mdatah ge!
I klaweham, dunan i bong kdataham na kafyem;
2 kamlaweh ge i bong knengam, du too teen i kdataham di mgimoam;
hae, du tanbelam i langit salngad i bong ataf di tah i banwe.
3 Tanimoam i gumneam ditù gsen di tah i dad nun yéél di langit.
Én snakayam i dad labun na i mgal nus mebe ge salngad di fafak i anuk di bnas.
4 Dekam i nus fgadè i knayeam salngad di dad kasaliganam;
na i lifoh na silà nimoam dad saligam.
5 Too mgagid i kagafdakam i banwe di gufkaham dun,
na laan mgingok;
6 na di kafdakam dun snafangam i banwe i bong mahin gambet i klawehan,
na maglimun yéél i dad bulul,
7 bay di kngakam, midul i yéél;
gambet mila i yéél di bong taluam di kdekam dun.
8 Mutù i dad bulul,
na maloh i yéél mdà di tah i dad bulul ditù di dad gumdanaan di gumdekam dun.
9 Na tanimoam i gusen i yéél i làla glius,
du fye talà lêman maglimun i klamang banwe.
10 Fasfutam i dad sfuten déén di dad gusambangan,
na maloh i dad yéél di dad gusambang di bleng i dad bulul.
11 Na déén guminum dad lmanaf di dlag;
dad mlayal dongki di bnas bnulungla i kalinumla déén.
12 Di dad kayu mdadong déén gusmalal i dad anuk di bnas;
talù ale déén di dad fangala.
13 Mdà di gumneam di langit fulenam di dad bulul;
na i tanà, too nun uléan mdà di nimoam.
14 Ftaboam i bnas du nteb i dad lmanaf,
na léam ftabò i dad fule dad to, du fye nun knaanla mdà di fulela di tanà,
15 nun bunge grép gumwèla i ninum gaflehew i nawala,
nun fngalo bulung kindalla,
na nun knaan gamlé dale gal.
16 I dad kayu Amuito Dwata, too gablà i yéélla;
i dad malbang kayu sidar di banwe Lébanon, Dwata i mule dun.
17 Ditù gusmalal i dad anuk di bnas,
na balù i dad malbang anuk di dlag smalal di dad kayu mguu.
18 I dad mdatah bulul, gumnè i dad kambing di bnas,
na di dad batu i gusalbuni dad malnak lmanaf.
19 Tamgimoam i bulen du fdilè di gami i dangan i dad sahal nimòmi,
na i duh, gal sdaf di too glut bangan kat duh.
20 Tamgimoam i butang,
na lamwà i dad lmanaf di bnas ku takifu.
21 Bong talù i dad mgal liyun di kafngaballa i kanfèla;
fanngaballa i knaanla di Dwata, i mlé dun di dale.
22 Na di ksut i duh, mulê ale di dad gusalbunila du ftud ale;
23 bay i dad to, lamwà ale du nun nimòla kel di kifu.
24 E Amugu Dwata, tay, bong kdee i dad mgimoam!
Too bong kfulungam mimò i kdeela;
na too fnò i banwe i dad mgimoam.
25 Ditù i mahin too bong na too mabal,
na too dee lmanaf mnè déén, là gse i kdeela, dad malbang na dad malnak.
26 Magu déén i dad malbang kafal,
na i too bong lmanaf di mahin dnagit Lebiatan tamgimoam du tì kenen magaf déén.
27 I kdee gmangu gine, smalig ale di ge,
i mlé knaanla di bangla bitil.
28 Di kablém dale knaan, kmaan ale,
na bsol ale di kafye blém dale.
29 Kabay ku laam banlé, landè kibòla;
ku nawiam i nawala, mati ale, na mbaling ale kfung lêman.
30 Kabay di kfebem i Tulusam mimò i dademe,
nun lêman mto di tah tanà.
31 Kayègu ku landè gusen i kafye mgimò Amugu Dwata,
na ku nun bong klehewan di kdee mgimoan.
32 Fagu alò di keyen i tanà, mgingok;
aloan tandel i bulul, na lamwà i buk.
33 Nlingaggu i Amugu Dwata di klogu mto;
nlingaggu dad kdayen i Dwatagu di klo i nun nawagu.
34 Lehew moon kenen di kdee lingaggu ani,
du kenen i kanlehewgu.
35 Gablà ku malmo i kdee to gamsalà di tah tanà ani;
na ku talandè nan dad to mimò sasè.
Too mdà di nawagu mlé fye di Amugu Dwata!
Dnayenito i Amuito Dwata!