Salmo 116
116
Kdayen i to galwà di fati di Dwata
1 Bong nawagu i Amugu Dwata, du fanlingen i katlogu kenen;
fanlingen i dasalgu.
2 Na du galan agu fanlinge,
fadlug agu tamlo di kenen di klogu mto.
3 Kantogu lyo na tatoo mdadong di deg i fati, i klikò i fati gamgagot deg;
too msamuk i nawagu na too bong klidùgu.
4 Na taman tamlo agu du ftabeng agu di Amugu Dwata,
mangu, “E Amu, fakdogu di ge, begam agu falwà!”
5 I Amugu Dwata too kamdo, na too kenen matlu;
i Dwatagu too fduf i dad ton.
6 I Amugu Dwata kamlung i dad to là gmagan mifat i ktola;
du di fan agu mati, kenen i falwà deg.
7 Taman fye ku manak nan i nawagu,
du too bong i kafye blé Amugu Dwata di deg.
8 Gmangu én du tafalwaan agu mdà di fati,
na mdà di sè klidù nawa, gumdà i dee lwakgu maloh,
na mdà di dad gafalmo deg di kagugu.
9 Na ani, lalògu i knayè Amugu Dwata di kdee nimògu
di klogu mto di tah tanà ani.
10 Balù gmangu, “Too sè kaflayamgu ani!”
knean tafadlug agu di kafaglutgu.
11 Mdà di ksamuk i nawagu, gmangu fa,
“Landè dad to gsalig.”
12 Kabay ani, én fandamgu ku tan i balasgu i Amugu Dwata
di bong kafye blén di deg.
13 Én nimògu, mlé agu fye di kenen
fagu di kablégu i dsù gal blé dad to dmawat i kagalwà.
14 Na blégu i fakanggu di kenen kadang
di muna i kdee ton di bong kastifunla.
15 Là fakay man ku landè di Amugu Dwata i kfati satu di dad ton,
du too ale mabtas di kenen.
16 E Amugu Dwata, blégu i ktogu di nimoam,
hae, blégu i ktogu di nimoam salngad di nimò yêgu,
du tafalwaam agu di fati.
17 Na nun kadang blégu dsù i kablé fye di ge,
na dmasal agu fagu di dagitam, Amugu Dwata.
18 Na blégu i fakanggu di Amugu Dwata,
di muna i kdee ton di bong kastifunla;
19 déén di gustifun i dad to mangamfù di Amugu Dwata
di Bong Gumnean di syudad Dyérusalém gumlégu dun.
Dnayengu i Amugu Dwata!