Salmo 122
122
Magdayen Dyérusalém, i syudad Dwata
Ani satu lingag dad to salu di Bong Gumnè Dwata, mdà di bel Dabid.
1 Toogu lehew di kmanla di deg,
“Salu ito ditù di Bong Gumnè i Amuito Dwata.”
2 Na ani, tadini gami,
tadag di lam i dad bà gufusuk di syudad Dyérusalém.
3 Di kimòla Dyérusalém,
fansela nimò i syudad too fye baweh na too sgat i dad gumnean.
4 Dini i gusalu dad to i Amuito Dwata,
i dad sahal lumbuk bel Israél.
Salu ale dini du mlé ale fye di kenen,
du én i gmanan dale.
5 Dini gumukum i kat harìla,
i gumnè bel Harì Dabid di bangla magot.
6 Dmasal gamu di Dwata na mni gamu du fye nun ktanak di syudad Dyérusalém,
manyu, “Begam banlé fye knè i dad to mbong nawa Dyérusalém.
7 Mlé ge ktanak di lam i syudad ani,
mulà moon landè fsasè i dad to mnè dini na i dad to mebe i banwe ani.”
8 Na du nun dad gakedgu na dad demegu bel Israél dini,
mangu, “Gamu dad to di syudad Dyérusalém banlé gamu moon ktanak i knèyu.”
9 Na du dini i Gumnè Amuito Dwata, én Dwata fnangamfuito,
fnigu ku matnù i kafye blé Dwata di Dyérusalém ani.