Bibeli Luayãtaalá 1 Lada 18

Davidi zĩblea buipãleↄwa

(2Sam 8.1-18)

1 Bee gbɛa Davidi zĩblè Filitɛ̃ↄwa, à ń busa à Gata ń a wɛ̃́lɛↄ sìmá. 2 À zĩblè Mↄabuↄwa, ↄ̃ aa gↄ̃̀ aà zↄ̀blenaↄ ũ, aaiↄ falubↄɛ̀. 3 Davidi zĩblè Zoba kí Adadɛzɛɛwa Amata gↄↄ pↄ́ à ɛ̀a lɛ́ gɛ́ ↄtↄ̃i Uflata swasaɛdeↄwa. 4 À aà sↄ̃́goↄ kũ̀kũ mɛ̀n ↄ̀aa sↄo (1.000) ń sↄ̃́godeↄ gbɛ̃ↄn ↄ̀aasↄsↄo lɛɛ sopla (7.000) ń kɛ̀sɛdeↄ gbɛ̃ↄn ↄ̀aasↄsↄo lɛɛ bao (20.000). À ń sↄ̃́ↄ kĩzã zↄ̃̀zↄ̃ píi, mɛ̀n basↄo mɛ́ è bↄ̀. 5 Kɛ́ Sili pↄ́ kú Damasi bùsuuↄ mↄ̀ dↄi Adadɛzɛɛlɛ, ↄ̃ Davidi ń gbɛ̃́ↄ dɛ̀dɛ ↄ̀aasↄsↄo lɛɛ bao ń plao (22.000). 6 À gudↄ̃anaↄ dìlɛdilɛ Sili bùsuu, ↄ̃ aa gↄ̃̀ aà zↄ̀blenaↄ ũ, aaiↄ falubↄɛ̀. Dii tò Davidi zĩblè gu pↄ́ à gɛ̀u píiɛ. 7 Davidi vua sɛ̀ngbao pↄ́ Adadɛzɛɛ ìwaↄ kũaↄ sɛ̀lɛ tàò Yelusalɛũ. 8 À mↄgotɛ̃ sɛ̀lɛ zↄ̃ↄzↄ̃ↄ Adadɛzɛɛ wɛ̃́lɛ Teba ń Kunio guu. Salomↄↄ íkakĩi pìò ń mↄ̀pɛlɛↄ ń Lua kpɛ́ pↄ́ↄ.

9 Kɛ́ Amata kí Tou mà Davidi zĩblè Zoba kí Adadɛzɛɛ zĩgↄ̃ↄwa píi, 10 ↄ̃ à a nɛ́ Adolaũ zĩ̀ fↄkpaiwà. À aà sáaukpà zĩ pↄ́ a blè Adadɛzɛɛwa yã́i, asa Tou zĩkàaànↄ yãaɛ. Ɔ̃ Adolaũpi mↄ̀ ń vua pↄ́ↄ ń ã́nusu pↄ́ↄ ń mↄgotɛ̃ pↄ́ↄ, 11 ↄ̃ kí Davidi dìlɛ Dii pↄ́ ũ, lá a kɛ̀ ń buipãle pↄ́ à gbãablèmáↄ ã́nusuↄ ń vuaↄwa píi, Ɛdↄũↄ ń Mↄabuↄ ń Amↄniↄ ń Filitɛ̃ↄ ń Amalɛki buiↄ. 12 Zeluia nɛ́ Abisai Ɛdↄũↄ dɛ̀dɛ Guzulɛ Wisideu* gbɛ̃ↄn ↄ̀aasↄsↄo lɛɛ bao plasai (18.000). 13 À gudↄ̃anaↄ dìlɛdilɛ Ɛdↄũ bùsuu lↄ, ↄ̃ Ɛdↄũↄ gↄ̃̀ aà zↄ̀blenaↄ ũ. Dii tò Davidi zĩblè gu pↄ́ à gɛ̀u píiɛ.

14 Davidi mɛ́ Isaili bui píi kía ũ, à yãmaa gↄ̃̀gↄ̃ a gbɛ̃́ↄnɛ a zɛ́wa. 15 Zeluia nɛ́ Yoabu mɛ́ aà zĩgↄ̃ↄ dↄaana ũ. Ailudi nɛ́ Yosafa mɛ́ aà kpàwakɛna ũ. 16 Aitubu nɛ́ Zadoki ń Abiataa nɛ́ Aimɛlɛkio mɛ́ sa'onkiaↄ ũ. Selaia mɛ́ aà lakɛ̃na ũ. 17 Yoiada nɛ́ Benaia mɛ́ aà dↄaiↄ gbɛ̃zↄ̃ↄ ũ. Davidipi nɛgↄ̃ɛↄ mɛ́ aà kwàasiↄ ũ aà saɛ.

*18:12 Soũ 60