24
Sa'onaↄ zĩ
1 Aalona bui gãliↄn kɛ: Aalona nɛgↄ̃ɛↄ tↄ́n kɛ: Nadabu, Abiu, Ɛleazaa ń Itamaao. 2 Nadabu ń Abiuo gàga ń mae wáaɛ,*Lev 10.1-2 aai nɛgↄ̃ɛ i sↄ̃o. Ɔ̃ Ɛleazaa ń Itamaao gↄ̃̀ sa'onaↄ ũ. 3 Davidi ń Ɛleazaa bui Zadokio ń Itamaa bui Aimɛlɛkio sa'onaↄ kpaalɛ̀ gã ń gão, aaↄ kↄ̃ gba zɛ́ zĩ yã́ musu. 4 Aa dↄaanaↄ è dasi Ɛleazaa buiↄ guu dɛ Itamaa buiↄ guula, ↄ̃ aa Ɛleazaa bui uabeleↄ sɛ̀ gbɛ̃ↄn gɛ̃o ń mɛ̀ndoo, Itamaa bui uabeleↄ sↄ̃ swaaↄ̃. 5 Aa ń kpaalɛ̀ ń gbɛlaaoɛ an wɛgwasai, asa Ɛleazaa buieↄ ń Itamaa buieↄ dɛ Lua kpɛ́ gbɛ̃zↄ̃ↄↄ ń sa'onkiaↄ ũ ḿpiiɛ. 6 Levii bui lakɛ̃na Semaia, Nɛtanɛli nɛ́ ń tↄ́ dàlau kía ń aà ìwaɛ beeↄ wáaɛ: Sa'onkia Zadoki, Abiataa nɛ́ Aimɛlɛki, sa'ona uabeleↄ ń Levii bui uabeleↄ. Tó wà gbɛ̃́ sɛ̀ Ɛleazaa bui guu do, ↄ̃ wì sɛ Itamaa bui guu do.
7 Yoialibu mɛ́ sɛ̃́ia,
a plaade Yedaia,
8 a àaↄ̃de Aliũ,
a síiↄ̃de Seoliũ,
9 a sↄode Malakia,
a soolode Miamɛ,
10 a soplade Akozi,
a swaaↄ̃de Abia,
11 a kɛ̃okwide Yesua,
a kwide Sekania,
12 a kuɛdode Ɛliasibu,
a kuɛplade Yakiũ,
13 a kuɛ'aaↄ̃de Hupa,
a gɛ̃o mɛ̀ndosaide Yɛsɛba,
14 a gɛ̃ode Bilega,
a gɛ̃o ń mɛ̀ndoode Imɛɛ,
15 a gɛ̃o ń plaode Ezii,
a bao plasaide Apisɛsi,
16 a bao mɛ̀ndosaide Petaia,
a baode Yeezekɛli,
17 a bao ń mɛ̀ndoode Yakɛ̃,
a bao ń plaode Gamulu,
18 a bao ń àaↄ̃ode Delaia,
a baasↄo mɛ̀ndosaide Maazia.
19 Lá aali gɛ́ zĩkɛi Dii kpɛ́u aaↄ kↄ̃ gba zɛ́n we, lá Dii Isailiↄ Lua dà an dezi Aalonaɛ a dìlɛwa.
Levii bui kĩniↄ
20 Levii bui kĩniↄn kɛ: Amlaũ bui Sebuɛli nɛ́ Yedeia.
21 Lɛabia yoa Isia.
22 Isaa bui Selomↄ nɛ́ Yaata.
23 Hɛblↄ̃ nɛgↄ̃ɛↄ tↄ́n kɛ: Yelia, Amalia, Yaaziɛ ń Yekamaũo.
24 Uziɛli bui Mika nɛ́ Samii.
25 Mika dãuna Isia nɛ́ Zakali.
26 Mɛlali nɛgↄ̃ɛↄ Mali ń Musio. 27 Mɛlali bui Yaazia nɛgↄ̃ɛↄ tↄ́n kɛ: Bɛnↄ, Soaũ, Zakuu ń Ibelio. 28 Mali nɛ́ Ɛleazaa i nɛgↄ̃ɛ io. 29 Mali nɛ́ Kisi bui Yelamɛli. 30 Musi nɛgↄ̃ɛↄ tↄ́n kɛ: Mali, Edɛɛ ń Yelimↄo. Levii buiↄn we an dezi buiↄwa.
31 Ampiↄ sↄ̃ aa gbɛlà lá an gbɛ̃́ Aalona buiↄ kɛ̀wa kí Davidi ń Zadokio ń Aimɛlɛkio ń sa'ona uabeleↄ ń Levii bui uabeleↄ wáaɛ. Vĩ̀i buiↄ ń dãuna buiↄ, yã́ doũ wa kɛ̀nɛ́.