28
Ãnabikɛkɛa Tii kía yã́ musu
1 Dii yã'òmɛɛ à mɛ̀: 2 Gbɛ̃nazĩn nɛ́, o Tii kíaɛ
ma Dii Lua ma mɛ̀:
Kɛ́ n nzĩa sɛ̀ lɛsĩ yã́i,
ni mɛ n kamawa,* Isa 14.13, 2Tɛs 2.4
ń zↄ̃lɛa ma kpalabaawa ísia guo.
Gbɛ̃nazĩnan n ũ, Lua no,
baa tó ńlɛ e n ↄ̃nↄ kàmawa.
3 N ↄ̃nↄ kà Daniɛliwaa?
Asiiyãe ulɛanɛoa?
4 N àizɛɛ kã̀aanzi n ↄ̃nↄ ń n wɛzɛ̃o yã́i,
n vua ń ã́nusuo nↄ̀nↄaa n làasiu.
5 N tágɛa ↄ̃nↄ zↄ̃ↄ yã́i n àizɛɛ kã̀fĩi
ↄ̃ n nzĩa sɛ̀ lɛsĩ àizɛɛpi yã́i.
6 A yã́i ma Dii Lua ma mɛ̀,
lá ńlɛ e n ↄ̃nↄ kàmawaɛ,
7 a yã́i má tó bui zĩ̀loↄ lɛ́lɛma,
bui pↄ́ aali gbɛ̃́ wɛ̃nagwaoↄ.
Aa fɛ̃nda wo n kɛfɛnkɛ ń n ↄ̃nↄozi,
aa n gawi pípia ↄ̃̀ↄkpanɛ.
8 Aa n kpa bɛdau,
n gaa aↄ pãsĩ ísia guo.
9 Ńyↄ̃ e o gbɛ̃́ pↄ́ lɛ́ n dɛↄ wáa n kamawae?
Gbɛ̃nazĩnan n ũ gbɛ̃́piↄnɛ, Lua no.
10 Gyafↄↄde gaa ńyↄ̃ ga a ũ bui zĩ̀loↄ ↄzĩ,
asa ma yã'ò.
Ma Dii Lua mámɛ má ò.
11 Dii yã́ ɛ̀a dɛ̀dɛa à mɛ̀: 12 Gbɛ̃nazĩn nɛ́, wɛ̃nalɛɛ bee da ń Tii kíao, ní mɛɛ̀ ma Dii Lua ma mɛ̀:
Gbɛ̃́ wásawasa sãasain n ũ,
n ↄ̃nↄ pɛ̀ɛma, n kɛfɛnkɛ lɛ́so.
13 Ń kú ma swalu guu Edɛni,† Daa 2.8
gbɛ̀ bɛɛɛde píi dɛ n pↄnanzi ũ:
Lubii, topaza, ɛmɛlodi,
kisoliti, onisi, diamaa,
safii, tiikↄazi ń yasepeo.
Vua wà gbɛ̀ bɛɛɛdepiↄ kũ̀kũò zãblebↄↄ ũ.
Gↄↄ doũ zĩ wà n kɛ ń pↄ́piↄ.
14 Ń dɛ malaika gã̀sĩade pↄ́ má dìlɛ àↄ ku ma kúkĩi ũ.
Ń kú ma gbɛ̀sĩsĩ pↄ́ a kua adoa musu,
n táa'ò gbɛ̀ bɛɛɛde tɛkɛaↄ guu.‡ Zia 21.19-21
15 Zaa wà n kɛ ń tàae vĩ n yãkɛauo,
e gↄↄ pↄ́ wà dↄ̀ↄsaikɛ èma.
16 N tágɛa zã̀zã guu pãsĩ pɛ̀ɛma,
n duunakɛ̀, ↄ̃ ma a gbɛ̀sĩsĩ zↄ̃̀nɛ.
Malaika gã̀sĩade pↄ́ kú ma kúkĩia,§ Daa 3.24
ma n ya n bↄ gbɛ̀ bɛɛɛde tɛkɛaↄu.
17 N nzĩa sɛ̀ lɛsĩ n kɛfɛnkɛ yã́i,
n ↄ̃nↄ kɛ̀ búi, ↄ̃ ma n zu dṹniau,* Isa 14.12, Zia 12.9
ma n kɛ pↄgwagwaa ũ kíaↄ aɛ.
18 N duun dasiↄ ń n tágɛa dↄ̀ↄsaiↄ yã́i
n gbãsĩsaikɛ ↄ̃̀ↄkpà,
ↄ̃ má tò tɛ́ bↄ̀ n guu, à kũ̀ma,
ↄ̃ n gↄ̃ túfu ũ tↄↄlɛ
gbɛ̃́ pↄ́ lɛ́ n gwaↄ aɛ.
19 Yã́pi dì bui pↄ́ n dↄ̃ↄwa píi,
n kaalɛa vãi, ńyↄ̃ↄ ku bau lↄo.
Ãnabikɛkɛa Sidↄ̃ yã́ musu
(Yoɛ 4.4-8, Zkl 9.1-2, Mat 11.21-22)
20 Dii yã'òmɛɛ à mɛ̀: 21 Gbɛ̃nazĩn nɛ́, wɛbiibii Sidↄ̃ oi, ní ãnabikɛkɛ a yã́ musu 22 ǹ mɛ ma Dii Lua ma mɛ̀,
má fɛlɛ ń Sidↄ̃o saɛ,
wi ma kpɛla aà yã́i.
Tó ma yã́kpalɛkɛ̀aànↄ,
mɛ́ ma tↄbↄ̀ aà yã́ musu,
wi dↄ̃ kɛ́ mámɛmaa Dii.
23 Má gagyã zĩwàɛ,
au i bàalɛ aà zɛaↄu.
Wa liaaàzi, wi zĩkaaànↄ,
gbɛ̃́ↄ i kwɛ aà guu gɛↄ ũ,
aai dↄ̃ kɛ́ mámɛmaa Dii.
24 Bui pↄ́ liaa Isailiↄzi, aaì sakańgupiↄ aaↄ dɛnɛ́ lɛ pↄ́ ì ń zↄ̃ à ń wãwã ũ lↄo, wiↄ dↄ̃ kɛ́ mámɛmaa Dii Lua.
25 Ma Dii Lua ma mɛ̀, tó ma Isailiↄ bↄ̀lɛ bùsu pↄ́ aa fãaaaↄ guu ma ń kãaa, mɛ́ ma tↄbↄ̀ ń yã́ musu buiↄ wáa, aaↄ ku bùsu pↄ́ má kpà ma zↄ̀blena Yakↄbuwau. 26 Tó ma yã́kpalɛkɛ̀ ń bui pↄ́ liaańzi aa sakàńgupiↄ, Isailiↄ iↄ ku bùsupi guu dↄdↄa, aai kpɛdↄdↄu, aai vɛ̃ɛbuↄ kɛu, aai dↄ̃ kɛ́ mámɛmaa Dii ń Lua.