Bibeli Luayãtaalá Isaia 9

Isaia
<
9
>

9

Wà nɛ'ìwɛ̃ɛ

1 Gbɛ̃́ pↄ́ aa ku gusiauↄ gupua zↄ̃ↄ è,

gu dↄ̀ bùsu pↄ́ kú ga lɛ́zĩ deↄnɛ.*

2 Ń tò an pↄ kɛ̀na zↄ̃ↄ,

n ń gbá pↄna maamaa.

Aalɛ pↄnakɛ n aɛ

lá wì kɛ pↄkɛkɛgↄↄwa,

lá aalɛ zĩblea pↄ́ kpaalɛwa.

3 Asa n zuu pↄ́ wa dànɛ́ ń gã̀u

ń go pↄ́ wàlɛ ń gbɛ̃òo ɛ̀'ɛ.

N ń wɛtãnapiↄ fù

lá ń kɛ̀ Madiãↄnɛ yãawa.

4 Zĩgↄ̃ kyaleↄ ń ń ula pↄ́ au gↄ̃́kpawàↄ,

wa kátɛu à tɛ́kũ yàa ũɛ.

5 Asa wà nɛ'ìwɛ̃ɛɛ,

wà wá gbá nɛgↄ̃ɛ.

Lua kíakɛmi dìɛ̀,†

wàli oɛ̀ Lɛdamade Bↄnsaɛde, Lua Gbãade,

Mae Gↄↄpiide,‡ Aafia Kía.

6 Aà kpala zↄ̃ↄ ń a aafiao aↄ lɛ́ vĩo,

aↄ zↄ̃lɛa báawa Davidi kpalau.§

Aà kpala zĩ́napɛlɛa aↄ gbãa,

aↄ yã́gↄ̃gↄ̃ wásawasa a zɛ́wa gↄↄpiiɛ.

Dii Lua Zĩgↄ̃de ãia mɛ́ a mↄ́ ń beeo.

Dii pↄpaa Isailiↄzi

7 Dii yã'o kpã̀sã Yakↄbu buiↄnɛ,

yã́pi a wi Isailiↄ musuɛ,

8 Samalideↄ ń Ɛflaiũ buiↄ yã́pi ma.

Aa wala ń kàamaio vĩ aa mɛ̀:

9 Kpɛ́ pↄ́ wa dↄ̀ ń bilikiↄ kwɛ̀,

wá bo ń gbɛoɛ sa.

Wà wá kaadↄɛnliↄ zↄ̃̀zↄ̃,

sɛdɛ líↄ wá pɛ́ ń gɛ̃ɛ ũ sa.

10 Ɔ̃ Dii ń ibɛɛↄ kã̀fĩ,

à ń wɛ̀lɛↄ sóikɛ̀má.

11 Siliↄ bↄ̀ gukpɛ oi,

Filitɛ̃ↄ bↄ̀ bɛ'aɛ oi,

aa Isailiↄ sↄ̃̀sↄ̃ ń lɛ́ pai.

Ń beeo píi Dii pↄkũma a kpálɛo,

aà ↄ aↄ looańlaɛ.

12 Isailiↄ i ɛa sù ń tòtonawao,

aai Dii Zĩgↄ̃de kĩ́i wɛɛlɛo.

13 A yã́i tò Dii a Isailiↄ mi zↄ̃ ń ń vlã́o píi,

a ń zaliↄ ń ń kɛfuↄ zↄ̃zↄ̃ gↄↄ do kóũɛ.

14 Gbɛ̃zↄ̃ↄↄ ń gbɛ̃́ pↄ́ aaì ń mi da íaↄ mɛ́ mipi ũ,

ãnabi ɛgɛnaↄ mɛ́ vlã́pi ũ.

15 Gbɛ̃́piↄ dↄaanaↄ lɛ́ ń sãsãɛ,

ↄ̃ gbɛ̃́ pↄ́ tɛ́ńziↄ lɛ́ midɛ.

16 A yã́i an ɛ̀waasoↄ i ka Diiguo,

an tonɛↄ ń ń gyaaↄ i kɛɛ̀ wɛ̃naũo,

asa luayãdansai vãikɛnaↄn ń ũ,

yãdↄↄsai mɛ́ ìↄ dↄ ń lɛ́u.

Ń beeo píi aà pↄkũma a kpálɛo,

aà ↄ aↄ looańlaɛ.

17 Yãvãi ì fɛlɛmá lán tɛ́wa,

ì kũ lɛaa ń lɛsikaoowa,

ì da dào ń likpɛↄla,

a lu iↄ súɛlɛ búuna bↄ.

18 Dii Zĩgↄ̃de kpɛ̃nɛmuu a to bùsupi tɛ́sɛɛ,

gbɛ̃nazĩnaↄ mɛ́ aaↄ dɛ tɛ́pi yàa ũ,

gbɛ̃e a a dee wɛ̃nagwao.

19 Wa pↄ́ li ↄplaai,

nↄana a gi àↄ ń dɛɛ.

Wa pↄble ↄzɛɛi, kási wa kão,

baade a a gbɛ̃́dee sóso.

20 Manase buiↄ kɛ Ɛflaiũ buiↄnɛ,

Ɛflaiũ buiↄ kɛ Manase buiↄnɛ,

ampii aai kɛ Yudaↄnɛ.

Ń beeo píi aà pↄkũma a kpálɛo,

aà ↄ aↄ looańlaɛ.

Isaia
<
9
>

*9:1 Mat 4.15-16, Luk 1.79

†9:5 Mat 28.18

‡9:5 Zãa 14.9-10

§9:6 Luk 1.32-33