Bibeli Luayãtaalá Isaia 22

Isaia
<
22
>

22

Yã́ pↄ́ a Yelusalɛũdeↄ le

1 Wɛ́pungu'ea guzulɛu yã́.

Bↄ́mɛ á lé a dɛdɛ á kpɛ́ musu píii?

2 Wɛ̃́lɛ súu gbãade gbɛ̃́ↄ!

Wɛ̃́lɛ pↄna kↄ̃fĩde gbɛ̃́ↄ!

I kɛ fɛ̃nda mɛ́ á gbɛ̃́ↄ dɛ̀dɛo,

aai gaga zĩ guuo.

3 Á dↄaanaↄ kpàkↄ̃ɛ aa bàalɛ̀,

ↄ̃ wà ń naaa, wà ń kũkũ kazusai.

Wà á gbɛ̃́ pↄ́ wà ń éↄ kũ̀kũ,

baa kɛ́ aa bàalɛ̀ tà zã̀zã.

4 Ayãmɛto ma mɛ̀:

À gomala, à to mà ↄ́ↄlↄ wɛ̃nannↄ.

Ásu wɛɛlɛ ma nↄ̀sɛ nínimɛɛ

ma gbɛ̃́ pↄ́ gàgaↄ yã́ musuo.

5 Dii Lua Zĩgↄ̃de gↄↄdìlɛ.

Zↄa ń ↄ̃zↄ̃amáo ń gilio

aↄ ku Wɛ́pungu'ea Guzulɛu

ń bĩ́igbooao ń wiilɛa gbɛ̀sĩsĩ musuo.

6 Elaũↄ ń gbàlaↄ sɛ̀lɛ,

aalɛ mↄ́ ń sↄ̃deↄ ń sↄ̃́godeↄ.

Kiiↄ ń sɛ̀ngbaoↄ sɛ̀ lɛ́ dↄdↄ.

7 Sↄ̃́goↄ di á guzulɛ táaedeↄu,

sↄ̃deↄ zɛzɛ á wɛ̃́lɛ bĩ́ibↄlɛↄu,

8 Yudaↄ gia ń ńzĩao zɛvĩ lↄo.

Ɔ̃ zĩ́ bee sa a á zĩkabↄↄ wɛ̀ɛlɛ

kpɛ́ pↄ́ wì mɛ Líkpɛ Kpɛ́u.

9 Á è Davidi wɛ̃́lɛ bĩ́i gufooↄ dasi,

a i kũ̀sũa dì íkalɛkĩi pↄ́ kú zĩ́lɛ guu.

10 A Yelusalɛũ kpɛ́ↄ nào,

a kpɛ́eↄ gbòo à a bĩ́i tàtaò.

11 A íkalɛkĩipi kɛ̀ wɛ̃́lɛ guu

íkalɛkĩi zi plaade ũ,

ãma i wɛdↄ Lua pↄ́ mↄ̀ ń yã́piozio,

i Lua pↄ́ yã́pi dìlɛ za zi yãdao.

12 Zĩ́ bee Dii Lua Zĩgↄ̃de á sisi

à ↄ́ↄlↄ, à búbuapɛ, à á mi wa,

í zwã̀nkasa kákaála,

13 ↄ̃ á kú pↄnakɛa guu ń yaalↄo.

A zuↄ ń sãↄ dɛ̀dɛ,

álɛ nↄ̀ↄ só, álɛ vɛ̃ɛmi,

álɛ mɛ: Wà pↄble, wà imi,

asa wá ga ziaɛ.*

14 Dii Zĩgↄ̃de kã̀mɛɛ ma swã́wa à mɛ̀:

Á duunapi kɛ̃awá vĩo e à gɛ gaò.

Dii Lua Zĩgↄ̃de mɛ́ ò.

Kibɛ ziia Sɛbena

15 Yã́ pↄ́ Dii Lua Zĩgↄ̃de òn kɛ:

Fɛlɛ gɛ o kibɛ ziia Sɛbenaɛ:

16 Bↄ́ ń vĩ lai? Dé ń vĩ la

ↄ̃ ńlɛ mia'ɛ sↄ nzĩaɛ la,

ńlɛ gbɛsi yↄ̃́ musumusu n vĩkĩi ũi?

17 Laaika gↄ̃sa!

Dii a n kũ n zu!

18 A n koo lán banↄↄwa,

i ń gbeembo e bùsu yàasau.

We ńyↄ̃ gau,

n sↄ̃́go gawideↄ i gↄ̃ we.

N dii ua kpɛbↄnan n ũ.

19 Má n bↄ zĩuɛ,

má n kɛ̃ n gweawaɛ.

20 Gↄↄ bee má a zↄ̀blena

Ilikia nɛ́ Ɛliakiũ sísi,

21 mí n ula daɛ̀, mí n asana dↄɛ̀,

mí n kpala kpawà aàↄ kũa,

iↄ dɛ Yelusalɛũdeↄ mae ũ

ń Yudaↄ píi.

22 Má Davidi bɛ kili daɛ̀ a gã̀u,

a zɛwɛ̃, gbɛ̃e a fↄ̃ tao,

a zɛta, gbɛ̃e a fↄ̃ wɛ̃o.†

23 Má aà pɛ kálo ũ gĩ̀ gbãawa,

aà zↄ̃lɛkĩi aↄ maa,

i aà de bɛdeↄ kpɛla.

24 Ãma aà de bɛdeↄ a loowà ḿpii,

an nɛ́ↄ ń ń buiↄ ń ń ta keleↄ píi,

sɛa dodãbↄↄ e olaↄwa.

25 Dii Zĩgↄ̃de mɛ̀, zĩ́ bee kálo pↄ́ wa pɛ̀ gĩ̀ gbãawapi a fu, a kaso lɛ́lɛ, aso pↄ́ loowàↄ i wíwi. Dii mɛ́ ò.

Isaia
<
22
>

*22:13 1Kln 15.32

†22:22 Zia 3.7