50
1 Ma Dii ma mɛ̀,
kɛ́ a mɛ̀ ma á da yà,
aà gínzila kú má ni?
Ma fĩade kpele ma á yíawài?
Aawo! Á duuna yã́i ma á yiai,
á tàaeↄ yã́i ma á da yài.
2 Kɛ́ ma mↄ, bↄ́yãi mi gbɛ̃e eo ni?
Kɛ́ ma lɛzùázi,
àkɛa á gbɛ̃e i weao ni?
Ma ↄ kɛ̀ geseũ a fↄ̃ á bↄo yã̀?
Má gbãa vĩ mà á bo noa?
Ma ísia lèle, ↄ̃ gugii bↄ̀,
má tò swa gↄ̃̀ lán gbáawa.
A kpↄↄ gàga isai yã́i,
ↄ̃ aa yaikɛ̀ kɛ́ í kuo yã́i.
3 Mi to gu si gbɛ̃́ↄnɛ,
mi zwã̀a sia da musuɛ.
Dii zↄ̀blena lɛ̀ àaↄ̃de
4 Dii Lua ma gba lɛ́ mà yãdaonɛ́
mà yã́ pↄ́ ì gbɛ̃́ pↄ́ bùsaↄ gba sↄ̃ o.
Ìↄ ma vu lá gu lɛ́ dↄ,
ì ma swã́ nakṹ,
kɛ́ mà yãma lán yãdadana pↄ́wa.
5 Dii Lua ma swã́ wɛ̃̀,
mi zazakũo, mi pↄ̀ↄbↄzãkɛo.
6 Ma a kpɛ tò lia gbɛ̃́ pↄ́ aalɛ ma gbɛ̃́ↄnɛ,
ma a gɛɛ tò dↄa gbɛ̃́ pↄ́ aalɛ a kã́ woloↄnɛ.
Kɛ́ aalɛ ma sↄ̃sↄ̃, aalɛ lɛ́'ikákaa,
mi a wɛ́ ga ma sↄ̃òo.*Maa 14.65
7 Ma gɛɛ a gↄ̃ kpa ma wɛ́io,
kɛ́ Dii Lua lɛ́ dↄmalɛ yã́i.
A yã́i ma aɛ dↄ súsu lán gbɛsiwa,
má dↄ̃ kɛ́ wí a ma kũo.
8 Lua ma yãnakpamade kumanↄ kãi.
Démɛ a bↄbↄmanↄi?
Wà aɛdↄkↄ̃wa!
Démɛ ma káalakɛna ũi?
Aà sↄ̃ kãi!
9 Dii Lua mɛ́ ì dↄmalɛ,
démɛ a fↄ̃ yãdamalai?†Lom 8.33-34
Ampii aa kɛ yáiyai lán pↄkasawa,
kↄ̀ↄↄ mɛ́ a ń sóso.
10 Á démɛ Dii vĩa vĩ
ì aà zↄ̀blena yãmai?
Tó a bɛ gusiau filia í sai,
aà Dii náaikɛ,
i sↄ̃kpalɛ a Luazi.
11 À ma, á gbɛ̃́ pↄ́ i tɛ́ka ázĩaɛ
i sɛ̃̀ tɛ́ dↄↄ,
à gɛ àↄ bɛ á tɛ́pi vuai
ge sɛ̃ pↄ́ a tɛsↄ̃̀wà gupuai.
Yã́ pↄ́ a bↄ ma ↄzĩ à á len kɛ:
Áↄ wúlɛa gu wãwãdeu!