Bibeli Luayãtaalá Isaia 59

Isaia
<
59
>

59

Gbɛ̃́ↄ duuna bↄa gupuau

1 Dii ↄ i kɛ geseũ à kɛ̃́sã á suabaaio.

Aà swã́ i kɛ gbãa à gí yãmaiwáo.

2 Á yãvãiↄ mɛ́ á kɛ̃́kↄ̃wa ń á Luao,

á duuna mɛ́ tò à a wɛ́ gòwá,

ↄ̃ à gì á yãmai.

3 Asa gbɛ̃dɛ'au gↄ̃́kpa á ↄwa,

á tàaeↄ á ↄkↄↄ pà.

Ɛɛ mɛ́ ìↄ dↄ á lɛ́u,

iↄ yãkpaanla bↄlɛ.

4 Gbɛ̃e lí wiilɛ yã́zɛdeio,

gbɛ̃e lí sĩana'o yã́kpalɛuo.

Aaì zɛ ń yãpão, aaìↄ ɛɛto.

Aaì nↄsi yãkele ũ,

aaì nɛ'i gudɛ ũ.

5 Aaì mlɛ̃̀ gbe pipi,

aaì dã̀nsaba tã́.

Tó gbɛ̃́ ń gbe blè, a gaɛ,

tó gbɛ̃́ wì sↄ̃, kyã́ a bↄ.

6 An bapiↄ lí pↄkasa kɛo,

an ↄzĩpiↄ lí pↄ́ nańzio.

An yãkɛaↄá gudɛɛ,

aa ↄdìdi yãpãsĩwa.

7 An kɛ̀sɛ lɛɛũ ń vãikɛao,

aaì yãesaide dɛ àannↄ.

Gudɛlaasoo aaìↄ kɛ,

aaì ásoo ń músio kpáńzi.

8 Aa aafia zɛ́ dↄ̃o,*

yã́ dↄ̀ↄde kú ń tufauo.

Aaì zɛ́ kolekolea da,

gbɛ̃́ pↄ́ bɛuↄ líↄ aafia dↄ̃o.

9 A yã́i tò yã́zɛde zã̀kũwanↄ,

mɛ́ yãmaa i wá leo.

Gupua wá wɛ́ dↄi,

ↄ̃ gusia wa su è,

gukɛ̃a wá mɛ wã̀i,

ↄ̃ gubeebee wá bɛu.

10 Wi ↄdↄ gĩi lán vĩ̀aↄwa,

wi ↄmalɛmalɛ lán wɛsaideↄwa,

wi gɛ̃nalɛ fãanɛ lán guluuluuiwa.

Wá gbãa fá,

ń beeo wá dɛ lán gɛↄwa.

11 Wi wiilɛ lán wàiↄwa,

wi ↄ́ↄlↄ wɛ̃nannↄ lán felenaↄwa.

Wá wɛ́ ìↄ dↄ yã́zɛdei, wili eo,

wá mɛ wã̀ wà wá suaba, a zã̀wanↄ.

12 Asa wá tàaeↄ kↄ̃̀nɛ,

wá duuna wá dá yã́u.

Wá tàaeↄ zↄ̃̀lɛwá,

wá wá yãkɛaↄ dↄ̃ sa.

13 Wa bↄ Dii kpɛ wa mↄafilikɛ̀ɛ̀,

wa gi wá Luazi,

yãkpaanla ń kĩ́iwãio ì dↄaawɛ̃ɛ.

Ɛɛ kↄ̃̀ wá sↄ̃ guu, àlɛ bↄlɛ wá lɛ́u.

14 Màa yã́zɛde pↄ̀ↄbↄzãkɛ̀,

maakɛa zɛa kãaa,

sĩana gɛ̃mbↄlɛ gãaɛ,

yã́ dↄ̀ↄde kùa gɛ̃kĩiwa.

15 Sĩana gbɛzãkpà,

wì ↄ̃zↄ̃ gbɛ̃́ pↄ́ kɛ̃̀ vãiwawa.

Dii wɛkpàlɛ gwà, à kɛ̀ɛ̀ ĩ́i,

asa yã́zɛde kuo.

16 A è gbɛ̃́ maae kuo.

Kɛ́ yãkɛkɛnae kuo, à dìwà.

Ɔ̃ à suabazɛ bↄ̀ ń a gↄ̃sagbãakɛo,

à gbãa'è a maakɛawa.

17 À maakɛa dà mↄ̀ ula ũ,†

à suabaa kpà mↄ̀ fùa ũ,‡

à tↄsima dà pↄkasaↄ ũ,

à ãiapãsĩ kàkaala ulada ũ.

18 A fĩabo gbɛ̃́ↄnɛ ń yãkɛawa,

a pↄkũmabↄbↄ a ibɛɛↄwa,

a tↄsi a wɛ̀lɛↄwa,

i asea kɛ ísiabaadeↄnɛ a zɛ́wa.

19 Bɛ'aɛdeↄ vĩakɛ Dii tↄ́ɛ,

gukpɛdeↄ aà gawi da gbia,

asa a mↄ́ lán í gufↄ̃awa,

lán í pↄ́ Dii lɛ́'ĩana lɛ́ ↄzↄ̃iwa.

20 Yakↄbu buiↄ Bona a mↄ Siↄna

gbɛ̃́ pↄ́ mikɛ̃̀ ń duunaↄwaↄ kĩ́i.§

Ma Dii mámɛ má ò.

21 Ma Dii ma mɛ̀,

ma bàakuańnↄ yã́n kɛ:

Ma Nisĩna pↄ́ kúwá

ń ma yã́ pↄ́ má dàɛ́ á lɛ́uo

a bↄ á lɛ́uo ge á nɛ́ↄ ge á tↄũnaↄ

za gbã e gↄↄpii.

Isaia
<
59
>

*59:8 Lom 3.15-17

†59:17 Ɛfɛ 6.14

‡59:17 Ɛfɛ 6.17, 1Tɛs 5.8

§59:20 Lom 11.26