66
Dii bui píi kãaa
1 Ma Dii ma mɛ̀:
Musu mɛ́ ma kpalabaa ũ,*Mat 5.34, 23.22
tↄↄlɛ mɛ́ ma gbadibↄ ũ.†Mat 5.35
Kpɛ́ pↄ́ á ye dↄmɛɛ bee ku máɛ?
Ma zↄ̃lɛkĩi bee kà kpelewai?
2 Ma ↄ mɛ́ pↄ beeↄ kɛ̀ píi,
ↄ̃ aa kuo lò?‡Zĩn 7.49-50
Ma Dii mámɛ má ò.
Gbɛ̃́ pↄ́ má aà wɛgwan kɛ:
Gbɛ̃́ pↄ́ azĩa bùsa mɛ́ a nↄ̀sɛ doũ,
mɛ́ a ma yã́ↄ vĩa vĩ.
3 Wì sa'oa ń zuo, ↄ̃ wì gbɛ̃dɛ lↄ,
wì sa'oa ń são, ↄ̃ wì gbɛ̃ waa fĩ,
wì mↄ ma gba pↄ́wɛnti, ↄ̃ wì sàwa au tↄ̃́lɛ,
wì tulaletikamɛɛ tɛ́a, ↄ̃ wì kúlɛ tã́aɛ.
Aa zɛ̀ ń ńzĩa pↄeão,
an pↄ ìↄ na ń yãbɛ̃ɛpiↄwa.
4 Mapi sↄ̃ ma zɛò
mà yã́ gɛa ń kpɛo sua ń aɛo kɛnɛ́,
má mↄ́má ń yã́ pↄ́ aa a vĩa vĩo,
asa ma lɛzù, gbɛ̃e i weao,
ma yã'ò, aai swã́sɛio.
Aa yã́ pↄ́ má yeio kɛ̀,
aa zɛ̀ ń yã́ pↄ́ i kamaguoo.
5 Á gbɛ̃́ pↄ́ á ma vĩa vĩↄ à ma yãma.
Á gbɛ̃́ pↄ́ aa zaágu,
aaì á bↄ adoa ma yã́iↄ mɛ̀:
Dii tↄbↄ, wí á pↄna e mɛ̀!
Wí a ń kṹ ḿpii.
6 Wɛ̃́lɛ súu ma dↄ!
Ma kpɛ́ kↄ̃fĩ ma dↄ!
Málɛ fĩabo ma ibɛɛↄnɛ a lɛ́ gbɛu.
7 E aàↄ gɛ́ nↄwãwãkɛi à pìla,
e aà nↄ̀sɛ àↄ gɛ́ swaa kĩ́iwa,
à nɛ'ì gↄ̃ɛ ũ.§Zia 12.5
8 Démɛ yã́ bee taa mà yãai?
Démɛ wɛsìɛ màai?
Wa bùsu i gↄↄ doa?
Wa buikɛ kã́ndo gↄ̃̀ↄa?
Kási kɛ́ nↄwãwã mↄ̀ Siↄnawa,
à nɛ́ↄ bↄ̀bↄ gↄ̃̀ↄ.
9 Ma Dii ma mɛ̀
má tó nɛ'igↄↄ ká, nɛ́ gí bↄ pɛ́lɛia?
Mapi á Lua ma mɛ̀
má tó pilagↄↄ ká, mí sakpɛ tataa?
10 À pↄnakɛ Yelusalɛũ yã́ musu,
à yáalↄwà, á gbɛ̃́ pↄ́ á yeaàziↄ.
À pↄnakɛò, á gbɛ̃́ pↄ́ álɛ ↄ́ↄlↄɛ̀ↄ.
11 Asa á aà yↄ̃́ mi à kã́, á nↄ̀sɛ i níni,
á aà í mi, á pↄ i kɛ aà àizɛɛ zↄ̃ↄwa na.
12 Asa ma Dii ma mɛ̀
má aafia pisiwà lán swawa,
má buiↄ àizɛɛ naaaɛ̀ lán swa paawa,
i yↄ̃́ kpáwá, i á kuɛ, i á kpá a gbáa.
13 Lá da ì a nɛ́ nↄ̀sɛ níni,
màa má á nↄ̀sɛ níniɛ́,
á nↄ̀sɛ a níni Yelusalɛũ.
14 Tó a wɛsìaàlɛ, á pↄ a kɛ na,
á mɛ iↄ aafia lán sɛ̃̀kusiwa.
Dii a to a zↄ̀blenaↄ a gbãa dↄ̃,
kási a kpɛ̃nɛmuu bↄbↄ a ibɛɛↄwa.
15 Gwa! Dii lɛ́ mↄ́ ń tɛ́o,
aà zĩkasↄ̃go aↄ dɛ lán zàawa.
A sumá ń kyã̀wãao,
a ń lele ń tɛ́lɛpiↄo.
16 Asa Dii a yã́kpalɛkɛ ń bui píio ń tɛ́o ń fɛ̃ndao,
mɛ́ gbɛ̃́ pↄ́ a ń dɛdɛↄ fàao.
17 Gbɛ̃́ pↄ́ aaì gbãbↄ ńzĩaɛ aa gɛ́ sa'oiↄ,
aaìↄ tɛ sa'onazi e swaluu,
aaì sàwa sa'onↄↄ só ń zaeo ń ɛ̃́nao,
aa midɛ sãnuɛ.
Ma Dii mámɛ má ò.
18 An yãkɛaↄ ń ń làasooↄ yã́i málɛ mↄ́ bui píi kãaai. Tó aa mↄ̀, aa wɛsi ma gawilɛ. 19 Má seelakɛ ń guu, mí ń gbɛ̃́ pↄ́ bↄ̀eↄ gbaɛ buiↄwa, Taasisi ń Libiio ń Ludi pↄ́ kàzunaↄ vĩo ń Tubalio ń Gɛlɛsio ń ísia baa bùsu zã̀zãↄ, gu pↄ́ wi ma tↄ́ mauo mɛ́ wì wɛsi ma gawilɛoↄ, aai ma gawi kpàwakɛ buiↄnɛ. 20 Aa bↄ ń á gbɛ̃́ↄ bui píi kĩ́i dia sↄ̃́ kpɛ ń sↄ̃baonaↄ ń yiongoↄ kua sↄ̃́goↄ ń zugoↄ guu. Ma Dii ma mɛ̀ wa mↄ́ńnↄ ma kpɛ́u wà ma gba Yelusalɛũ ma gbɛ̀sĩsĩ pↄ́ a kua adoa musu, lá Isailiↄ ì mↄ́ ń pↄ́wɛntio ta gbãlɛsai guuwa. 21 Ma Dii ma mɛ̀, má ń gbɛ̃eↄ sɛ dilɛ sa'onaↄ ń Levii buiↄ ũ.
22 Ma Dii ma mɛ̀ lá musu dafu ń zĩ́lɛ dafu*Isa 65.17, 2Piɛ 3.13, Zia 21.1 pↄ́ málɛ kɛo aaↄ ku ma aɛ gↄↄpii, màa á nɛ́ↄ ń á tↄ́o aↄ ku gↄↄpii. 23 Ma Dii ma mɛ̀ mↄ ń mↄo, kã́mabogↄↄzĩ ń kã́mabogↄↄzĩo, bui píi aliↄ mↄ kúlɛi ma aɛ. 24 Tó aa bↄ̀ wɛ̃́nkpɛ, aa gbɛ̃́ pↄ́ bↄ̀ ma kpɛↄ gɛↄ gwagwa. An kↄ̀ↄbiiↄ láao, an tɛ́ a gao,†Maa 9.48 mɛ́ bui píi aↄ ye ń gĩyãio.