Bibeli Luayãtaalá Zelemii 8

1 Ma Dii ma mɛ̀, gↄↄ bee wa Yuda kíaↄ gɛwa bↄlɛ miau ń a gbãadeↄ ń a sa'onaↄ ń a ãnabiↄ ń Yelusalɛũdeↄ píi. 2 Wa ↄliu ĩatɛ̃i ń mↄvuao ń saana pↄ́ aa yeńzi aa zↄblènɛ́ aa tɛ̀ńzi aa yãgbɛ̀amá aa kùlɛnɛ́ↄ. Wa sɛ́lɛ vĩo, aa gↄ̃ kálɛa tↄↄlɛ lán pↄtuo gbↄ̃waɛ. 3 Gu pↄ́ má ↄzↄ̃u bui vãipizi píi, an gbɛ̃́ pↄ́ gↄ̃̀piↄ ga sí ń kuawaɛ. Ma Dii Zĩgↄ̃de mámɛ má ò.

Duuna ń yã́ pↄ́ ì inɛ́o

4 Onɛ́ ma Dii ma mɛ̀:

Tó gbɛ̃́ lɛ̀lɛ, ìli fɛlɛo lé?

Tó gbɛ̃́ zã̀ zɛ́wa, ìli ɛao lé?

5 Bↄ́yãi Yelusalɛũdeↄ ì zãmɛɛ yã́wai?

Àkɛa gbɛ̃́piↄ mikpɛ ìↄ dↄamɛɛi?

Mↄafili ↄ̃ aa zɛ̀ò, aa gì suia.

6 Ma swãkpà má mà,

aali yã́zɛde oo,

mɛ́ an gbɛ̃e líↄ ku déndↄ̃mɛɛ guu

à mɛ: Bↄ́yãi ma vãiɛ taa kɛ̀o.

Ampii aaì tɛ́ ń tufaiɛ,

lán sↄ̃́ pↄ́ lɛ́ si zĩlauwa.

7 Baa wàaliana ì fɛlɛ a gↄↄwaɛ,

felena ń luakibãnao ń yaabɛɛo

aaìↄ gↄↄ pↄ́ dɛ wa ɛa suwà dↄ̃ɛ,

kási ma gbɛ̃́ↄ ma yãdilɛnɛ dↄ̃o.

8 Kpelewa á e o ↄ̃nↄnaↄn á ũ,

ámɛ á Dii ikoyã kũai?

Yãdanɛde ɛgɛnaↄ a bↄↄlɛkɛ̀ɛ́ kpaanlaɛ.

9 Wí a ↄ̃nↄnapiↄ kũɛ,

aa bílikɛ, aai zu bai guu.

Aa gì ma yã́iɛ.

Ɔ̃nↄ kpeletaa buin wei?

10 A yã́i má ń nↄɛↄ kpa gbɛ̃pãleↄwa,

an buaↄ i gↄ̃ dãↄnɛ.

Nɛ́fɛ̃nɛn gbɛ̃zↄ̃ↄ píi ↄvãi'enaↄnɛ.

Ãnabiↄ ń sa'onaↄá gbɛ̃sãsãnaↄnɛ.

11 Aaì ɛsɛ má ma gbɛ̃́ↄ bↄwa,

lá a dɛ pↄe ũowa.

Aaì mɛ, aafia ku, aafia ku,

kási aafia ku we sↄ̃o.*

12 Yãbɛ̃ɛ pↄ́ aa kɛ̀ ì kɛnɛ́ wí ũe?

Aawo, ìli kɛnɛ́ wí ũo,

an gɛɛ lí gↄ̃ kpá ń wɛ́io.

A yã́i aa ta gbɛ̃́ pↄ́ gɛ̀ gɛ́kĩiↄ guu,

aa kwɛ gↄↄ pↄ́ málɛ ĩadamá.

Má Dii mámɛ má ò.

13 Ma Dii ma mɛ̀,

má ń buapↄ́ↄ símáɛ.

Vɛ̃ɛ a kɛo,

kaadↄɛna a nɛ'io,†

baa lá a giigaga.

Wa pↄ́ pↄ́ má kpàmáↄ símá.

14 Bↄ́yãi wá kálɛa lai?

Wà kãaa wà ta wɛ̃́lɛ bĩ́ideↄu,

wíↄ ga dã we,

asa Dii wá Lua dìlɛ wà gagaɛ.

À kona í kpàwá wà mi,

kɛ́ wa duunakɛ̀ɛ yã́i.

15 Wá wɛ́ dↄ aafiai,

kási yãmaae kuo.

Wa gbã́gbãgↄↄ dã̀,

ↄ̃ wá nisĩna nà líwa.

16 Sↄ̃́ↄ lɛ́ pↄbↄ ń níu Dã buiↄ bùsuu,

bùsupi lɛ́ lualua sↄ̃saↄ ↄ́ↄlↄa yã́i.

Wà mↄ̀ bùsu ↄ̃̀ↄkpai ń pↄ́ pↄ́ kúuↄ,

wɛ̃́lɛ ń gbɛ̃́ pↄ́ aa ku a guuↄ.

17 Ma Dii ma mɛ̀,

má mlɛ̃̀ pãsĩnaↄ gbaɛwá aa á sósoɛ,

mlɛ̃piↄ lí ɛsɛdeↄ yãmao.

Má Dii mámɛ má ò.

18 Ma Gbɛ̃nↄsɛninina, ma pↄ siakũ̀,

ma nↄ̀sɛ ↄ̃̀ↄkpà.

19 Ma gbɛ̃́ↄ wii ma dↄ

za bùsu zã̀zãu aa mɛ̀:

Dii ku Siↄnao lé?

Siↄna Kíapi ku we lↄo lé?

Bↄ́mɛ tò aa ma pↄ fɛ̀lɛmɛɛ ń ń tã́aↄi?

Bↄ́yãi aa ma zafɛ̃̀mɛɛ ń dii zĩ̀lo pãↄi?

20 Wà pↄ́ kɛ̀kɛ kↄ̀, saɛ gɛ̃̀,

wápiↄ sↄ̃, wi wá suabao.

21 Lá ma gbɛ̃́ↄ wíwia, màa má wíwia,

ma oosìsi, iwãa kà ma pↄa.

22 Bↄ̀ ɛsɛ ku Galada bùsuuo lé?

Lòotoo ku weo lé?

Àkɛa ma gbɛ̃́ↄ bↄ i láao ni?

23 Tó ma miá íɛ yãa,

mɛ́ ma wɛ́á nibↄnaɛ lé,

dↄ̃ má wɛ́'i lɛ́ kwɛ́ fãanɛ ń gwãasĩnao

ma gbɛ̃́ pↄ́ wa ń dɛdɛↄ yã́ musu.

*8:11 Eze 13.10

†8:13 Mat 21.19