Bibeli Luayãtaalá Zelemii 13

Sàana yã́

1 Dii òmɛɛ mà gɛ sàana lu mà ye, ãma másuli pío. 2 Ɔ̃ ma sàana lù lá a òwa má yè. 3 Dii yã'oamɛɛ gɛ̃n plaade à mɛ̀ 4 mà sàana pↄ́ má lù má yèpi sɛ gɛò Uflatai, mí ulɛ gbɛ̀sↄↄu we. 5 Ɔ̃ ma gɛ má ùlɛ Uflatai lá a òmɛɛwa.

6 Gↄↄpla gbɛa Dii ɛ̀a yã'òmɛɛ à mɛ̀ mà fɛlɛ gɛ́ Uflatai, mí sàana pↄ́ a òmɛɛ mà ulɛ we sɛ suò. 7 Ɔ̃ ma ɛa gɛ Uflatai, ma sàanapi bↄ̀ gu pↄ́ má ùlɛu, ↄ̃ má è a ↄ̃̀ↄkpà, a keekɛa kɛ lↄo.

8 Ɔ̃ Dii yã'òmɛɛ à mɛ̀: 9 Ma Dii ma mɛ̀, beewa má kɛ Yudaↄ ĩ́andãa ń Yelusalɛũdeↄ ĩ́andãa zↄ̃ↄoɛ. 10 Gbɛ̃vãipiↄ gì ma yãmaiɛ, swã́gbãa kɛ̀má zↄ̃ↄ, ↄ̃ aa tɛ̀ dii pãleↄzi aa zↄblènɛ́ aa kùlɛnɛ́. Aaↄ dɛ lán sàanapiwaɛ, a keekɛa kɛ lↄo. 11 Lá wì sàana nańzi, màa ma Isailiↄ ń Yudaↄ nàmazi, kɛ́ aaↄ dɛ ma gbɛ̃́ↄ ũ, aaↄ ma tↄbↄ, aaↄ ma táasilɛ, aaiↄ ma kpɛla, ↄ̃ aa gì ma yãmai.

Vɛ̃ɛ tùu yã́

12 Onɛ́ ma Dii ma mɛ̀, wa vɛ̃ɛ ka tùuↄ guu à pa píi. Tó aa ònɛ wa dↄ̃ kɛ́ vɛ̃ɛ a tùu pa, 13 ní onɛ́ ma Dii ma mɛ̀, má vɛ̃ɛ káka bùsupideↄnɛ e à zↄ̃ ń lↄↄwa ḿpiiɛ, sɛa za kía pↄ́ zↄ̃lɛa Davidi kpalauↄwa ń sa'onaↄ ń ãnabiↄ ń Yelusalɛũdeↄ píi, 14 mí ń pãpãkↄ̃wa aa wíwi, maeↄ ń ń nɛ́ↄ píi. Ma Dii mámɛ má ò. Má ń dɛdɛɛ, má ń bↄo, má sùuukɛńnↄo, má ń wɛ̃nagwao.

Gbɛaana a fↄ̃ à a wɛ̃̀sã lilɛe?

15 À swã́kpa yãma!

Ásu ázĩa sɛ lɛsĩo,

asa Dii mɛ́ lɛ́ yã'o.

16 À bɛɛɛ dↄ̃ Dii á Luaɛ

e àↄ gɛ́ gusia kúlɛiwá,

à gɛ̃mbↄlɛ guluuluui gusĩsĩdeu.

Á wɛ́ dↄ gupuai,

kási gusia zↄ̃ↄ ↄ̃ a kũaawá,

i gusia pãsĩ kúála.

17 Tó i yã́pi mao,

á wala a to mà gɛ wiipɛ gusaɛ,

ma wɛ́'i i kwɛ maamaa

kɛ́ wa Dii kpàsa gbɛ̃́ↄ kṹkũ yã́i.

18 O kíaɛ ń a dao aa zↄ̃lɛ zĩ́lɛ,

kɛ́ an kíafua gawideↄ gògo yã́i.

19 Nɛgɛvɛ bùsu wɛ̃́lɛ gbaↄ aaↄ tataaɛ,

gbɛ̃e aↄ ku we à wɛ̃o.

Wa Yudaↄ naaa táńnↄ zↄↄ ũ píiɛ.

20 Yelusalɛũ, wɛzu ǹ gwa,

gbɛ̃́ↄ bↄ̀lɛ gugbãntoo oi, aalɛ mↄ́.

Gbɛ̃́ pↄ́ Lua nànɛ n ↄzĩↄ ku máɛ?

N kpàsa gbɛ̃́ gawidepiↄ!

21 Bui pↄ́ n gbɛ̃nakpàńnↄↄ,

tó Dii tò aa fɛ̀lɛnnↄ,

ńyↄ̃ mɛa ni?

Wãwã a ń le lán nɛ'inawaɛ.

22 Tó n mɛ̀ àkɛa yã́ɛ taa n lei?

N tàaeↄ yã́i ↄ̃ wà n zwãa pìliima

wà gbãamↄ̀nɛ.

23 Etiopi gbɛ̃́ a fↄ̃ à a mɛbaa lilɛe?

Gbɛaana a fↄ̃ à a wɛ̃̀sã lilɛe?

Á Yelusalɛũdeↄ sↄ̃,

vãi dↄ́ɛkɛ̀ánↄ, á fↄ̃ maakɛo.

24 Má á fãaa

lán sɛ̃ pↄ́ ĩ́ana sɛ̀lɛ gbáauwaɛ.

25 Á zian we,

baa pↄ́ má dìlɛɛ́n we.

Ma Dii mámɛ má ò,

asa ma yã́ sã̀águɛ,

ↄ̃ a ɛɛ náaikɛ̀.

26 Tↄ̀ↄ, má n zwãa lɛ́ kánɛ n miaɛ,

wi n puizi e.

27 Ma yãbɛ̃ɛ pↄ́ á kɛ̀ sĩ̀sĩↄ musu è,

n gbãsĩkɛa ń n wiilɛa gↄ̃ↄzio

ń n káaluakaa tã́aↄ yã́ musuo.

Waiyoo Yelusalɛũ,

ńyↄ̃ↄ gbãlɛa e bↄɛ ni?