Bibeli Luayãtaalá Zelemii 18

Zelemii kua oobona bɛ

1 Dii yã'òmɛɛ à mɛ̀: 2 Fɛlɛ gɛ́ oobona bɛ, we má tó ǹ ma yãmau. 3 Kɛ́ ma gɛ oobona bɛ, má è àlɛ oo bo. 4 Kɛ́ oo pↄ́ àlɛ bopi ↄ̃̀ↄkpà aà ↄzĩ, ↄ̃ à ɛ̀a a pãle bò ń gĩpio, lá à kɛ̀ɛ̀ maawa.

5 Ɔ̃ Dii yã'òmɛɛ à mɛ̀: 6 Á Isailiↄ, má fↄ̃ kɛɛ́ lá oobonapi ì kɛwao lé? Lá gĩ dɛ oobona ↄzĩ, màa á dɛ ma ↄzĩ.* 7 Tó ma bui ge bùsu yã'ò ma mɛ̀, wà a fuangba, wà a midɛ, wà kaalɛ, 8 mɛ́ bui pↄ́ ma lɛdàwàpi mikɛ̃̀ a vãikɛawa, má yã́ pↄ́ ma zɛò mà yíawà bↄ ma nↄ̀sɛuɛ. 9 Tó ma bui ge bùsu yã'ò ma mɛ̀, wà a zɛdↄ, wi gba gbãa, 10 mɛ́ buipi i ma yãmao, à yã́ pↄ́ má yeio kɛ̀, má ɛ̀fãai pↄ́ ma mɛ̀ má kɛɛ̀ bↄ ma nↄ̀sɛuɛ. 11 A yã́i tò, o Yelusalɛũdeↄnɛ ń Yudaↄ píi, ma Dii ma mɛ̀:

À ma, málɛ vãi o á musu,

ma sↄu mà mà yã́yiawá.

12 Kási aa onɛ a zɛkɛo.

Aamɛ waↄ gɛ́ ń yã́ pↄ́ wà zɛ̀oɛ,

baade nↄ̀sɛvãi swã́gbãa yã́ mɛ́ aↄ dↄaaɛ̀.

13 A yã́i tò ma mɛ̀,

à buipãleↄ la à ma!

Démɛ yã́ bee taa mà yãai?

Á Isaili pↄ́ á dɛmɛɛ bui lɛ́so ũↄ

a yãvãi pↄ́ ì dimá kɛ̀.

14 Nɛɛzi ì go Libã bùsu gbɛ̀sĩsĩae?

A í niɛ pↄ́ ì bↄ za a musu a láae?

15 Kási ma yã́ sã̀ ma gbɛ̃́ↄguɛ,

aaì tulaletikatɛa tã́aↄnɛ,

ↄ̃ aa zã̀ ń fɛlɛkaa zɛ́wa,

aa pɛ̀lɛ zɛ́ kpã́inau.

16 Bee yã́i an bùsu a gↄ̃ yàaa,

iↄ dɛ láanipↄ ũ gↄↄpii.

Yã́pi a di gbɛ̃́ pↄ́ lɛ́ gɛ̃ weↄwa,

aai ń mikɛ déũdeũ.

17 Má ń fãaa lán gukpɛ ĩ́anawa ń ibɛɛↄ aɛɛ,

má mikpɛlinɛ́ɛ,

má zɛńnↄ an wɛ́tɛ̃agↄↄo.

Lɛkpaaĩa Zelemiizi

18 Gbɛ̃́ↄ mɛ̀: À mↄ wà lɛkpaaĩ Zelemiizi, asa sa'onaↄ yãdanɛ a láao ge ↄ̃nↄnaↄ lɛdama ge ãnabiↄ yã́. À mↄ wà lɛnakasaɛ̀. Wásu laaidↄ aà yã'onɛwa lↄo.

19 Dii, swã́sɛ ma yã́i,

yã́ pↄ́ ma ibɛɛↄ lɛ́ o ma.

20 Wì maa fĩabo ń vãio yã̀?

Kási aa ɛyↄ̃̀mɛɛ.

To lá má zɛ n aɛ yã́ dↄngu,

ma ń maa wɛ̀ɛlɛ,

kɛ́ n pↄ e weemá.

21 Tↄ̀ↄ! Nↄana kpá ń nɛ́ↄzi sa,

ǹ ń kpá fɛ̃ndaa.

To wà ń gↄ̃ɛↄ dɛdɛ aa gaga,

an naↄ i gↄ̃ gyaa nɛ́saiↄ ũ,

ní ń ɛ̀waasoↄ kpa fɛ̃ndaa zĩlau.

22 To wà búbua ma dↄ ń ua

gↄↄ pↄ́ wà lɛ̀lɛmá kã́ndo,

asa aa ɛyↄ̃̀mɛɛ ma kũa yã́iɛ,

aa baikpàmɛɛ ma táa'ozɛu.

23 Mpi sↄ̃ Dii, ń dↄ̃ kɛ́

aa lɛkpàaĩmazi, aa ye ma dɛ.

Ńsu láka ń tàaepiao,

ńsu ǹ ń duunapi bãdɛo.

To aa kpagua n aɛ,

yã́yiamá n pↄkũmabↄbↄmagↄↄ.

*18:6 Daa 2.7, Lom 9.20-21