Bibeli Luayãtaalá Yobu 9

Yobu
<
9
>

9

Lua gbãa dɛmala

1 Ɔ̃ Yobu mɛ̀:

2 Sĩanaɛ, má dↄ̃ màa.

Kpelewa gbɛ̃nazĩna yã́ aↄ na Luaɛi?

3 Tó gbɛ̃́ ye lɛkpaakɛaànↄ,

yã́ mɛ̀n ↄ̀aa sↄo guu a fↄ̃ mɛ̀ndo zã́siwào.

4 Aà ↄ̃nↄ kɛ̀ zài mɛ́ aà gbãa zↄ̃ↄ.

Démɛ a fↄ̃ giɛ̀, ade i bↄ aafiai?

5 Ì gbɛ̀sĩsĩↄ sↄ̃, aaliↄ dↄ̃o,

ì ń fuangba ń pↄkũmao.

6 Ì tↄↄlɛ lualua à sↄ̃,

ì to a gbapɛlɛↄ zĩazĩa.

7 Ì yã'o ĩatɛ̃ɛ, ↄ̃ ì gí bilɛi,

ì pↄ́ku saanaↄla.

8 Ɔ̃mɛ musu kpàlɛ ado,

ì táa'o ísia ikooaↄwa.

9 À saanaↄ kɛ̀ gudoũ,

Kífɛ̃nɛna ń Ko nɛadeo*

ń pↄ́ pↄ́ kú gɛↄmidↄkĩi oiↄ píi.

10 Ì yãzↄ̃ↄkɛ, wìli fↄ̃ dↄ̃̀o,

ì yãbↄnsaɛↄ kɛ, a lɛ́ vĩo.

11 Ì gɛ̃mala, mili aà eo,

ì gɛ̃zɛa, mili aà wɛ́pao.

12 Ì pↄ́ símá, démɛ a fↄ̃ giɛ̀i?

Démɛ a fↄ̃ oɛ̀, bↄ́ ńlɛ kɛ màaii?

13 Lua lí to a pↄkũma kpàlɛo,

baa Ílɛnↄbↄ zↄ̃ↄ† dↄnlɛdeↄ vlãnàuɛ̀.

14 Mapi sↄ̃ má fↄ̃ yã́zãsiwàe?

Má fↄ̃ lɛkpaakɛaànↄe?

15 Baa tó ma yã́ na,

má fↄ̃ wewào.

Ɔ̃mɛ ma yã́kpalɛkɛna ũ,

sema mà sùuugbɛawà.

16 Tó ma lɛzùaàzi mɛ́ a wèa,

a yãmaae? Mi sio.

17 Ì ma gbɛ̃gbɛ̃ yã́ yↄↄna yã́iɛ,

ì ma kɛ'ĩa kpɛ́lɛkpɛlɛ pã.

18 Ìli tó ma wekĩi eo,

ì ma tó ń nↄ̀sɛpusuoɛ.

19 Tó gbãa yã́ɛ, aàpi mɛ́ zↄ̃ↄ.

Tó yã́gↄ̃gↄ̃aɛ sↄ̃, démɛ a aà sísii?

20 Tó ma mɛ̀ ma yã́ mɛ́ na,

ma lɛ́ a yãdamalaɛ.

Tó ma mɛ̀ má tàae vĩo,

a ma ɛɛboɛ.

21 Má tàae vĩoa? A yãe vĩ lↄo,

mi saka mazĩa wɛ̃niu.

22 Yã doũɛ, asa lá málɛ o,

ì tàaesaideↄ ń gbɛ̃vãiↄ midɛ píi.

23 Tó yã́ mↄ̀ ga ìnɛ́ kã́ndo,

ì tàaesaideↄ láanikɛ ń yã'ea guu.

24 Tó bùsu gↄ̃̀ gbɛ̃vãiↄ ↄzĩ,

ì pↄ́ku yã́kpalɛkɛnaↄ wɛ́aɛ.

Tó aàpi no, dé ni?

25 Ma gↄↄↄ gɛ̃a wãa dɛ bàalɛnala,

aalɛ tá ń bao, a kee nao.

26 Aalɛ gu baa vĩ lán kɛfu gó'ilɛnawa,

lán kúu sua pↄ́wawa.

27 Baa tó ma mɛ̀ má yã́ pↄ́ má kũa bↄ ma nↄ̀sɛu,

mí a oa wee mà yákpãinadↄ,

28 ma wãwã a iwãa ka ma pↄaɛ.

Má dↄ̃ kɛ́ ńyↄ̃ to yã́ bↄmanↄ nao.

29 Lá wàlɛ ma gwa tàaede ũ,

bↄ́yãi má ĩada mazĩawa pã lↄi?

30 Baa tó ma zu'ò ń mↄsↄnao,

ge ma a ↄ pìpi ń kasagbↄ̃o,

31 ńyↄ̃ ma zu ɛ̀ pɛ̀lɛadeuɛ.

Baa ma pↄkasaↄ aaↄ ye ma gĩyãio.

32 A dɛ gbɛ̃nazĩna ũ lamawao.

Má fↄ̃ yã́zãsiwà

wà gbasa gɛ́ yã́kpalɛkɛkĩi sãnuo.

33 Tó gbɛ̃e kú wá kↄ́ↄ ũ,

aↄ iko vĩwá wá gbɛ̃ↄn pla wápii,

34 i aà go'ↄ zɛ lé,

vĩa zↄ̃ↄ pↄ́ málɛ kɛɛ̀ a gɛ́ aɛ lↄo.

35 Má vĩakɛɛ̀ lↄo, míↄ yã'o,

asa má dↄ̃ mazĩawa,

má dɛ lá wàlɛ ewao.

Yobu
<
9
>

*9:9 Amↄ 5.8

†9:13 Isa 30.7