Bibeli Luayãtaalá Yobu 29

Yobu
<
29
>

29

Yobuá bɛɛɛdeɛ yãa

1 Yobu ɛ̀a pɛ̀ a yã́lɛ à mɛ̀:

2 Tó má e màↄ ku ma kua yãa

gↄↄ pↄ́ Lua lɛ́ ma dↄ̃́awa lé!

3 Gↄↄ bee aà filia ìↄ dia ma mi'aɛwaɛ,

ↄ̃ miↄ bɛ aa gupuau gwã́.

4 Gↄↄ bee má kú ma gↄↄ soplawa,

Lua gbɛ̃naↄn wá ũ ma ua.

5 Gↄↄ bee Gbãapiide kumanↄɛ,

ma nɛ́ↄ liaamazi.

6 Gↄↄ bee vĩ dimaziɛ,

mɛ́ ma gu gbɛde ku bↄ̀, nísi dìɛ.

7 Tó ma gɛ wɛ̃́lɛ bĩ́ibↄlɛu,

ge ma zↄ̃lɛkĩi kũ̀ gãaɛ,

8 tó málɛ mↄ́, ɛ̀waasoↄ ì gubↄmɛɛɛ,

maezↄ̃ↄↄ ì fɛlɛ aaↄ zɛaɛ.

9 Gbɛ̃zↄ̃ↄↄ ì kɛ kyↄ̃́,

aaì ↄku ń lɛ́wa.

10 Dↄaanaↄ yã'o ì busa,

an lɛ́ ì gↄ̃ kpaaũa.

11 Gbɛ̃́ pↄ́ swãsɛ̀ ma yã́i ì ma tↄnasi,

gbɛ̃́ pↄ́ wɛsìmalɛ ì ma sáaukpa.

12 Asa ma taaside pↄ́ wiilɛ̀ mìsi

ń tonɛo ń gbɛ̃́ pↄ́ ↄdamade vĩoo.

13 Gbɛ̃́ pↄ́ kú ga lɛ́zĩ samaa'òmɛɛ,

má tò gyaa gbɛ̃ando guladↄ̀a.

14 Ma yãkɛa a zɛ́wa dà pↄkasa ũ,

maakɛa dɛmɛɛ ulada ũ fùa ũ.

15 Vĩ̀aↄ wɛ́n ma ũ,

ɛɛↄ gbán ma ũ,

16 taaside maen ma ũ.

Kɛ́ wàlɛ yã́gↄ̃gↄ̃ ń nibↄo, ma lɛdau.

17 Ma faasaideↄ kãnkãnaↄ ɛ̀'ɛ,

ma gbɛ̃́ pↄ́ kpá aà lɛ́zĩ gà má bↄ̀.

18 Ɔ̃ ma mɛ̀ ma gↄↄ aↄ dasi lán ũfãawaɛ,

mí ga niɛ guu ma bɛ.

19 Ma zĩ́na a í le,

fíi iↄ kpa ma gↄ̃naↄwa gwã́.

20 Ma gawi aↄ diadiɛ,

ma sá iↄ naa ma ↄzĩ dafudafu.

21 Wì zɛ wà swãdↄ ma yã́i,

wì kɛ kílikili wà ma lɛdama ma.

22 Ma yã'oa gbɛa gbɛ̃e lí yã'o lↄo,

ma yã́ mɛ́ ì tↄ̃́má.

23 An wɛ́ ìↄ dↄmazi lá an wɛ́ ìↄ dↄ louziwa,

aaìↄ lua ma yã́i lá wìↄ lua káabuan louziwa.

24 Tó ma yamↄsɛkpàmá, ì bↄ ń saɛ,

ma oa weeama ì kɛnɛ́ na,

gbɛ̃e lí fↄ̃ tò ma oosìsio.

25 Ma zɛmikũ̀nɛ́,

má kú ń guu dↄaana ũ.

Má dɛ pↄsiadeↄ nↄ̀sɛninina ũ

lá kía ìↄ kú ń a ìwaↄwa.

Yobu
<
29
>