Bibeli Luayãtaalá Yobu 32

Ɛlihu yã'oa

1 Ɔ̃ gbɛ̃ↄn àaↄ̃piↄ kã́mabò, aai yã́zãsi Yobuwa lↄo, asa à azĩa dìlɛ gbɛ̃maa ũɛ. 2 Ɔ̃ Buzu gbɛ̃́ Balakɛli nɛ́ Ɛlihu, Laũ bui pↄ pà. Aà pↄ pà Yobuzi, asa à yãnakpà azĩawaɛ, i kɛ Lua no. 3 Aà pↄ pà Yobu gbɛ̃na gbɛ̃ↄn àaↄ̃ↄzi lↄ, asa aa aà tàae èɛ, ãma aai fↄ̃ yã́zãsìwào. 4 Ɛlihu lɛ́ ń dã́ e aa yã'ò wa làa, kɛ́ an zi dɛaàla yã́i. 5 Kɛ́ a è gbɛ̃ↄn àaↄ̃piↄ i fↄ̃ yãe wè Yobuwa lↄo, ↄ̃ aà pↄ pà 6 à mɛ̀:

Ɛ̀waason ma ũ, gbɛ̃zↄ̃ↄↄn á ũ,

bee yã́i ma azĩa bùsaiɛ́,

vĩa ma kũ, mi e ma a dↄ̃a òɛ́o.

7 Ma mɛ̀ a maa gbɛ̃zↄ̃ↄↄ yã'oɛ,

à kũ̀ gbɛ̃ ziↄ ↄ̃nↄ danɛ́ɛ.

8 Ãma Lua Nisĩna mɛ́ ì gbɛ̃́ wɛ́ kɛ̃ɛ̀,

Gbãapiide lɛ́'ĩanapi ì aà gba ↄ̃nↄ.

9 I kɛ gbɛ̃zↄ̃ↄↄ mɛ́ ↄ̃nↄ ńtɛ̃ɛo,

i kɛ gbɛ̃ ziↄ mɛ́ líↄ yã́zɛde dↄ̃o.

10 Bee yã́i ma mɛ̀ à ma yãma sa,

mapi, má a dↄ̃a o sↄ̃.

11 Ma sↄ̃aázi gↄↄ pↄ́ álɛ yã'o,

ma swãkpà á ↄ̃nↄyãi

gↄↄ pↄ́ álɛ yã́zãsikↄ̃wa.

12 Ma laaidↄ̀ á yã́wa maamaa,

ãma á gbɛ̃e i Yobu ɛɛboo,

i e yã́zãsìwào.

13 Ásu àↄ mɛ á ↄ̃nↄ kào,

sema Lua aà fu, i kɛ gbɛ̃nazĩna no.

14 Lá Yobu i a yã́ dↄdↄmɛɛo,

má wewà lá á òɛ̀wao.

15 Aa bílikɛ̀, aalɛ wewà lↄo,

aa yãe vĩ wà oɛ̀ lↄo.

16 Aalɛ yãe oo, máↄ sↄ̃́ańzi lↄo,

aa zɛa we, aa kùa yã'okĩiwa.

17 Mapi, má a pↄ́ o sↄ̃,

mámɛ má a dↄ̃a o sↄ̃.

18 Asa má yãvĩ dasi mà o,

yã́piↄ lɛ́ ma nↄ̀sɛ pũna.

19 Aa ku ma guu lán vɛ̃ɛ pↄ́ kú tùu bũu guuwa,

má ye pũna lán vɛ̃ɛ tùu dafuwa.

20 Sema mapi mà yã'o, ma mɛ i su,

sema mà fɛlɛ mà wewà.

21 Má gbɛ̃́ bↄbↄ'ↄsio,

má gbɛ̃́ kɛkɛ ń lɛ́oo.

22 Tó má gbɛ̃kɛkɛa ń lɛ́o dↄ̃,

ma Kɛna a ma sɛ tamanↄ gↄ̃̀ↄɛ.

Yobu
<
32
>