Bibeli Luayãtaalá Wɛ̃nalɛ 3

Wɛdↄa nↄ̀sɛniniai Dii kĩ́i

1 Má dɛ gbɛ̃́ pↄ́ Dii pↄkũma gotↄ̃̀wà à taasi è ũɛ.

2 À ma ya à ma kpa gusiauɛ,

i kɛ gupuau no.

3 Mámɛ ìↄ ↄtↄ̃a gↄↄpii,

a láaa vĩo.

4 A tò ma mɛ ibàba,

à ma wáↄ wìwi.

5 À kona ń mɛkɛmuunao lìamazi lán bĩ́iwa.

6 A tò ma ye gusiau

lán gbɛ̃́ pↄ́ gà à gɛ̃̀gɛ̃ↄwa.

7 À gĩ lìamazi, má fↄ̃ bↄo,

à mↄ̀ gala gbiaↄ kpàmɛɛ.

8 Ma wiilɛ̀, ma suabalɛ zùaàzi,

kási i swã́sɛmazio.

9 À gĩbò ń gbɛ̀ gbɛ̃̀nɛↄ,

a pã̀ ma zɛ́a a dɛ̀.

10 À gↄ̃̀mɛɛ lán gbɛaana pↄ́ naalɛa

ge nↄ̀ↄmusu pↄ́ ye láuwa.

11 À zɛ́ sìa, à ma taitai,

à ma ↄ̃̀ↄkpà.

12 À a ka kpà sáa,

ↄ̃ à ma dilɛ pↄ́ pↄ́ á pá ũ.

13 À a gbàla kaↄ tↄ̃̀ ma baluwa.

14 Ma gↄ̃ ma gbɛ̃́ↄnɛ pↄ́ yáalↄa ũ,

aa lɛdàmanↄ ḿpii.

15 À blɛ kĩ̀sã ò'omɛɛ,

à ma kaka ń gↄ̃io.

16 À gbɛ̀kↄsↄ kpàa, ma swaa ɛ̀'ɛ,

à ↄ̃zↄ̃̀a tufua.

17 À ma kɛ̃ aafiawa,

má dↄ̃ bↄ́ wì mɛ nama lↄo.

18 Ɔ̃ ma mɛ̀, ma gↄ̃ yɛ̃̀ɛɛsai,

ma wɛ́ dↄ Diizi lↄo.

19 Ma liaaliaaa wɛ́tɛ̃a guu dↄmagu,

a dɛmɛɛ gↄ̃i ń konao ũ.

20 Yã́pi ìↄ dↄamagu maamaaɛ,

ↄ̃ ma kúsu kwɛ̀.

21 Yã́ pↄ́ ìↄ dↄmagu

ì to ma nↄ̀sɛ àↄ daa doũn kɛ:

22 Dii gbɛ̃kɛ mɛ́ tò wi midɛo,

aà wɛ̃nadↄ̃anɛ lí láao.

23 Aà yeańzi ìↄ dafu lá gu lɛ́ dↄɛ,

a náai vĩ zↄ̃ↄ.

24 Ma mɛ̀, Dii mɛ́ ma baa ũ,

a yã́i má sↄ̃́aaàzi.

25 Dii maa gbɛ̃́ pↄ́ an wɛ́ dↄaàziↄnɛ,

gbɛ̃́ pↄ́ aalɛ aà kĩ́i wɛɛlɛↄ.

26 Wɛdↄa Diizi zↄasai à ń suaba mɛ́ maa.

27 A maa gbɛ̃́ taasi fↄ̃ a ɛ̀waasogↄↄɛ.

28 Aà zↄ̃lɛ ado kílikili,

asa Dii mɛ́ aà dàu.

29 Aà a mipɛlɛ bùsuu,

iↄ wɛdↄaàzi.

30 Aà a gɛɛ dↄ gbɛ̃́ pↄ́ ye a sãnkɛɛ,

i to wí a kṹ.

31 Asa Dii lí gí gbɛ̃́i à aà tò we gↄↄpiio.

32 Baa tó à aà dà taasiu,

ì aà wɛ̃nagwaɛ a gbɛ̃kɛ zↄ̃ↄ lɛ́u.

33 Dii lí gbɛ̃́ swã́gaga ń pↄnaoo,

ìli aà da taasiu pão.

34 Tó wàlɛ ↄ̃zↄ̃ zĩ̀zↄↄwa dṹnia guu guei,

35 tó wàlɛ ń yã́ málɛnɛ́ Lua Musude kpɛ́ kpɛɛlɛ,

36 tó wàlɛ yã́kpalɛkɛ gbɛ̃́ↄnɛ kolea,

Diipi lɛ́ eo lé?

37 Démɛ a fↄ̃ mɛ á kɛ, i kɛ,

tó Dii i a zɛbↄɛ̀o ni?

38 Vãi ń maao ì gbɛ̃́ le Lua Musude lɛ́ saia?

39 Gbɛ̃nazĩn bɛ̃́ɛ nɛ́ zɛ́ vĩ à zↄaka a duuna ĩadama yã́ musuo.

40 Wà wɛ́tɛ wá kuai wà gwa maamaa,

wí ɛa su Diiwa.

41 Wà ↄdↄ Luazi musu ń nↄ̀sɛmɛndoo, wí mɛ:

42 Wa duunakɛ̀, wa swã́gbãakɛ̀,

ↄ̃ ni sùuukɛwanↄo.

43 N pↄkũma kàkanla, n pɛwá,

n wá dɛdɛ wá wɛ̃nagwasai.

44 N sↄlↄ luabɛpuanau,

kɛ́ ńsu wá wabikɛa mao yã́i.

45 N wá dílɛ ukↄlↄ ge bìsa ũ buipãleↄ guu.

46 Wá ibɛɛↄ swaa bìiwá ḿpii.

47 Vĩa ń zua baiuo mɛ́ gↄ̃̀wɛ̃ɛ

ń músio ń kaalɛao.

48 Ma wɛ́'i lɛ́ bàalɛ lán swa'iwa

ma gbɛ̃́ↄ tↄ̀lↄzↄ̃a yã́i.

49 Ma wɛ́'i aↄ kwɛ zɛsaiɛ,

aↄ kã́maboa vĩo,

50 e Dii gɛ wɛzu zĩ́lɛ à e.

51 Yã́ pↄ́ ma wɛ̃́lɛ nↄɛↄ lè,

kɛ́ ma wɛsìɛ, ma nↄ̀sɛ ↄ̃̀ↄkpà.

52 Gbɛ̃́ pↄ́ aa íbɛlɛsɛ̀manↄ pãↄ

lɛ́ ma wɛ lán bãwaɛ.

53 Aa ye ma wɛ̃ni bↄlia ɛu,

aa ma papa ń gbɛo.

54 Í dàmala,

ↄ̃ ma mɛ̀ ma gaɛ sa.

55 Kua za ɛ̀ títiu we

ma lɛzùnzi, Dii.

56 Kɛ́ ma suaba wiilɛ̀, ń mà,

ni swã́kpa ma yã́ao.

57 Kɛ́ ma lɛzùnzi, n sↄ̃mazi,

n mɛ̀ másu vĩakɛo.

58 Dii, n zɛmanↄ yã́kpalɛu,

n ma wɛ̃ni sì.

59 Ń è lá wà ma yã́ màlɛmɛɛ,

ↄ̃ n yãnakpàa, Dii.

60 Ń è lá aa ye tↄsia

ń vãi pↄ́ aa a lɛkpàaĩmazio píi.

61 Dii, ń mà lá aa ma sↄ̃sↄ̃

ń vãi pↄ́ aa a lɛkpàaĩmazio píi.

62 Ma ibɛɛpiↄ ìↄ lɛ́pɛ kↄ̃ swã́u,

aaìↄ lɛkpaaĩmazi gↄↄpiiɛ.

63 Ǹ ń zↄ̃lɛa gwa ń ń fɛlɛao,

ma tↄ́ mɛ́ gↄ̃̀ ń lɛ ũ.

64 Dii, fĩabonɛ́ a zɛ́wa,

kɛnɛ́ an yãkɛa lɛ́u.

65 To an swã́ gbãakũ,

ní láaizĩmá.

66 Pɛ́má ń pↄfɛ̃o,

ní ń tↄ̀lↄzↄ̃ dṹniau.