1 Dii ò Mↄiziɛ 2 aà o Isailiↄnɛ píi aà mɛ: Á kua líↄ adoa, asa ma Dii á Lua ma kua adoaɛ.*1Piɛ 1.16

3 Á baade lí misiilɛ a da ń a deoɛ.†Iko 5.16 Àli kã́mabogↄↄ pↄ́ má dìlɛ yãda.‡Bↄa 20.8, Iko 5.12 Mámɛmaa Dii á Lua. 4 Ásu ɛa su tã́aↄwao. Ásuli mↄkasa á dii ũo.§Bↄa 20.23, 34.17 Mámɛmaa Dii á Lua.

5 Tó álɛ sáaukpa sa'oa, àli o a zɛ́wa, mí sí. 6 Àli sa'onↄↄ so a ogↄↄ ge a gu sìa dↄa, í a pↄ́ pↄ́ gↄ̃̀ a gↄↄ àaↄ̃de zĩ́ kátɛu à tɛ́kũ. 7 Tó gbɛ̃e su sò a gↄↄ àaↄ̃de zĩ́ sↄ̃, pↄ́pi gbãlɛ̀n we, má sí lↄo. 8 Gbɛ̃́ pↄ́ sò, a yã́ ali wí ade musuɛ, asa a tò ma pↄ́ gbãlɛ̀ɛ. Wàli ade bↄ a gbɛ̃́ↄ guu.

9 Tó a á pↄ́ↄ kɛ̀kɛ á bùsuu, ásuli kɛkɛ e á bú lɛ́wao, mɛ́ ásuli a kↄ̃nwɛo. 10 Ásuli á vɛ̃ɛ kɛkɛ gɛ̃n plao, mɛ́ ásuli a bɛ pↄ́ kwɛ̀ zĩ́lɛ sɛ́lɛo. Àli tó taasideↄnɛ ń bↄ̀mↄↄ. Mámɛmaa Dii á Lua.*Iko 24.19-21

11 Ásuli kpã́i'oo.†Bↄa 20.15, Iko 5.19 Ásuli ɛɛtoo. Ásuli mↄafilikɛ á gbɛ̃́deeɛo. 12 Mámɛmaa Dii á Lua. Ásuli ɛɛto à mɛ á simanↄ à ma tↄ́ ↄ̃̀ↄkpao.‡Bↄa 20.7, Iko 5.11, Mat 5.33 13 Ásuli á gbɛ̃́dee ble ge à aà pↄ́ síwào. Ásuliↄ á zĩkɛna asea kũa e gu dↄo.§Iko 24.14-15 14 Ásuli swãdona kao. Ásuli pↄ́ dilɛ vĩaɛ zɛ́u aà kpaao.*Iko 27.18 Àliↄ ma vĩa vĩ. Mámɛmaa Dii. 15 Ásuli yã́gↄ̃gↄ̃ koleao.†Iko 16.19 Ásuli zɛ ń wɛ̃nadeo a wɛ̃nadekɛ yã́io, ge tↄde a tↄdekɛ yã́io. Àli yã́gↄ̃gↄ̃ gbɛ̃́ↄnɛ a zɛ́wa. 16 Ásuliↄ bɛ ń gbɛ̃peo á gbɛ̃́ↄ guuo. Ásuli á gbɛ̃́dee ga wɛɛlɛ à yãdↄwào. Mámɛmaa Dii.

17 Ásuliↄ za á Isaili deeguo. Àli á gbɛ̃́dee gba laai,‡Mat 18.15 kɛ́ aà duuna su wí á musuo yã́i. 18 Ásuli tↄsi á Isaili deewao, ásuliↄ yã́kũaaànↄo. Àliↄ ye á gbɛ̃́deezi lá ázĩa wɛ̃niwa.§Mat 5.43, 19.19, 22.39, Lom 13.9, Gal 5.14, Zaa 2.8 Mámɛmaa Dii.

19 Àliↄ ma ikoyãↄ kũa. Ásuli pↄtuo bui dodoa kpakↄ̃a aa kpáwa'okↄ̃wao. Ásuli pↄbui dodoa tↄ̃ bú doũ guuo. Ásuli pↄkasa pↄ́ wà a pↄ́lɛ tã̀ ń bà bui dodoao dao.*Iko 22.9-11

20 Tó gↄ̃ɛ wùlɛ ń zↄ̀ wɛ̃́ndiana pↄ́ dɛ gbɛ̃pãle nↄkpama ũo, mɛ́ i aà bo à gↄ̃̀ wɛ̃́ɛ ũ gĩao, wàli ń swã́gaga. Wasuli ń dɛdɛo, kɛ́ nↄɛpi i gↄ̃ wɛ̃́ɛ ũ yãao yã́i. 21 Gↄ̃ɛpi lí mↄmɛɛ kpaaũkpɛ kpɛɛlɛ ń sãsakaoo a tàae fĩabobↄ ũ. 22 Sa'ona lí duuna pↄ́ a kɛ̀ kɛ̃wà ma aɛ, mí sùuukɛaànↄ.

23 Tó a gɛ̃ á bùsuu, mɛ́ a li bɛdee bà, àli a bɛ dilɛ tɛ̃ ũ gĩa. Lípi bɛ líↄ dɛɛ́ tɛ̃ ũ e wɛ̃̀ àaↄ̃, ásuli bleo. 24 A wɛ̃̀ síiↄ̃de a bɛ líↄ dɛ ma pↄ́ ũ píi, í ma sáaukpaò. 25 A wɛ̃̀ sↄode íli a bɛ ble sa. Beewa lípi nɛ'iaɛ́ aↄ kã́fĩ. Mámɛmaa Dii á Lua.

26 Ásuli nↄ̀ↄ kòlokpasai sóo.†Daa 9.4, Iko 12.16, 23 Ásuli màsokɛo. Ásuli pↄdamáo.‡Iko 18.10 27 Ásuli mizↄ̃io. Ásuli á lɛkãna kã́ kpaaĩo. 28 Ásuli á mɛ líli gɛ yã́ musuo.§Iko 14.1 Ásuli wɛ̃̀sã li ge à sↄti zↄ̃o. Mámɛmaa Dii.

29 Ásuli á nɛnↄɛ ↄ̃̀ↄkpa aà gↄ̃ káalua ũo,*Iko 23.18 kɛ́ bùsudeↄ su zɛ ń káaluakaao, dàa vãi i kↄ̃́ á bùsuuo yã́i. 30 Àli kã́mabogↄↄ pↄ́ má dìlɛↄ yãda. Àliↄ ma kúkĩi vĩa vĩ. Mámɛmaa Dii. 31 Ásuli yãma gɛ̀sisinaↄwao, mɛ́ ásuli tã́adeↄ kĩ́i wɛɛlɛ,†Iko 18.10-11, 1Sam 28.3, Isa 8.19 an gbãsĩ i liázio. Mámɛmaa Dii á Lua.

32 Àli fɛlɛ zɛ mikãpuadeɛ, àli zↄ̃ↄkɛ dↄ̃ gbɛ̃zↄ̃ↄↄnɛ, íↄ ma vĩa vĩ. Mámɛmaa Dii á Lua.

33 Tó bↄ̀mↄ kúánↄ á bùsuu, ásuli gbãamↄɛ̀o. 34 Àli bↄ̀mↄ pↄ́ kú á guu dilɛ lán belewa.‡Bↄa 22.20, Iko 24.17, 27.19 Àliↄ yeaàzi lá ázĩa wɛ̃niwa, asa bↄ̀mↄↄn á ũ Egipi bùsuu yãa. Mámɛmaa Dii á Lua. 35 Àↄ kú ń yãkɛa a zɛ́wao pↄ́yↄ̃a guu,§Iko 25.13-15, Yaa 20.10, Eze 45.10 pↄ́ gbã̀a ge a gbia ge a zↄ̃ↄn lò. 36 À tó á pↄ́gbiayↄ̃bↄↄ ń á zaaↄ aaↄ kú wásawasa. Mámɛmaa Dii á Lua pↄ́ á bↄ́lɛ Egipi. 37 Àliↄ ma ikoyãↄ ń ma yãdilɛaↄ kũa píi, íↄ zĩkɛwà. Mámɛmaa Dii.