Bibeli Luayãtaalá Luku 1

LUKU

Yã́ pↄ́ kú láɛ bee guuↄ

Luku Yesu baona lápi kɛ̃̀ lá Maaku kɛ̃̀waɛ.

Zãa da'ilɛna yã'oa guu, a ye gbɛ̃́ↄ sↄu àↄ maà wàↄ Yesu dã́ (3.1-20)

Yesu da'ilɛkɛa ń aà yↄ̃ao (3.21-4.13).

Yesu zĩkɛa Galile bùsuu, gu pↄ́ à waasokɛ̀u ↄ̃ à gyãeↄ gbã̀gbã (4.14-9.50).

Yesu wɛ̃́lɛgɛa bↄa za Galile e taa Yelusalɛũ (9.51-19.28). Luku yã́ pↄ́ Maaku i kɛ̃oↄ kɛ̃̀ dasi. A keeↄn kɛ: Sãmali gbɛ̃maa yã́, ↄde sↄũ yã́, nɛ́ pↄ́ sã̀sã yã́, ↄde ń Lazaao yã́.

Yã́ pↄ́ Yesu kɛ̀ Yelusalɛũↄ (19.29-21.38).

Yesu taasikɛa ń aà gaao (22-23).

Lápi midɛkĩi (24) Yesu bↄ̀ gau ↄ̃ à bↄ̀ mↄ̀ a ìwaeↄwa Ɛmausi zɛ́u e àↄ gɛ tái luabɛ.

Luku Yesu ń Zãa Da'ilɛnao ia yã́ bↄↄlɛkɛ̀ gĩaɛ (1-2). Wekĩi a ò lá malaika bↄ̀ mↄ̀ Yesu da Maliamawa ń Zãa Da'ilɛna da Ɛlizabɛtio, ń lá sãdãnaↄ ń saanyãdↄ̃naↄ mↄ̀ kùlɛ Yesuɛo, lá Maliama ń Zakalio Dii sáaukpà mɛ́ Simɛↄ Lua Musude tↄbↄ̀. Yã́ beeↄ guu Luku yã́ gbiaↄ ò kↄ̀ a Yesu seeladekɛkɛa guu: Yesu luakɛ ń aà dɛa Isaili zalala ũo ń lá aà mↄa dṹnia guu dɛ yãzↄ̃ↄ ũ gbɛ̃́piiɛo. Luku ↄ̀lↄwɛ̃ɛ lↄ lá Lua ye nↄ̀sɛdoũdeↄzi ń gbɛ̃́ pↄ́ wà pãkpàńziↄ ń nↄɛↄ ń taasideↄ ń nibↄↄ. Lua Nisĩna yã́ kú we lↄ ń pↄna pↄ́ Yesu baona ì inɛ́o ń Lua táasilɛao ń wabikɛawào.

Luku ì Isailiↄ fɛlɛkaayã bↄↄlɛkɛwɛ̃ɛ wásawasaɛ. Baona láɛ bee kyokɛa guu baade a fↄ̃ gbɛ̃́pii Suabana yã́ dↄ̃u.

1 Gbɛ̃́ↄ ↄkpà yã́ pↄ́ kɛ̀ wá guu dau siua lá guu zɛ́zɛwa dasi, 2 lá gbɛ̃́ pↄ́ aa dɛ yã́pi seeladeↄ ń a baokpanaↄ ũ za káauↄ òwɛ̃ɛwa. 3 Tiasa mapi sↄ̃, lá ma wɛtɛ̀ yã́piↄi dodo za a daalɛawa, má è a maa mà kɛ̃nɛ zɛ́zɛ, ma gbɛ̃́ bɛɛɛde Teofili, 4 kɛ́ ǹ e ǹ yã́ pↄ́ wa dànɛ sã́asã dↄ̃.

Malaika dↄaaa Zãa Da'ilɛna ia yã'oa

5 Yude bùsu kí Elodi gↄↄ sa'onae ku, aà tↄ́n Zakali. A ku Abia sa'onaↄ gãli guuɛ. Aà na tↄ́n Ɛlizabɛti. Aalona buiɛ lↄ. 6 An pla ḿpii aa maa Luaɛ. Aaìↄ ku tàaesai, aa Dii ikoyã ń yã́ pↄ́ a dìlɛↄ kũa. 7 Aa nɛ́ vĩo, asa Ɛlizabɛtiá fĩiɛ, mɛ́ an pla ḿpii aa zikũ̀.

8 Gↄↄ pↄ́ sa'oa kà an gãliwa, Zakali mɛ́ lɛ́ Lua gbagba. 9 Lá sa'onapiↄ ì kɛwa, aa likpà, ↄ̃ lí Zakali sɛ̀ aà gɛ́ tulaletikai tɛ́a Dii kpɛ́u. 10 Tulaletikpasagↄↄ bíla kã̀aa kpɛɛlɛ píi, aalɛ wabikɛ. 11 Ɔ̃ Dii malaikae bↄ̀ mↄ̀wà, à zɛ̀ tulaletikatɛakĩi ↄplaai. 12 Kɛ́ Zakali aà è, à bílikɛ̀, vĩa aà kũ̀. 13 Ɔ̃ malaikapi òɛ̀: Ńsu to vĩa n kũo Zakali. Lua n wabikɛa sì, n na Ɛlizabɛti a nɛ'i gↄ̃ɛ ũ, ní tↄ́kpaɛ̀ Zãa. 14 N pↄ a kɛ na, ńyↄ̃ yáalↄ, gbɛ̃́ↄ pↄnakɛ aà ia yã́ musu dasi, 15 asa aↄ dɛ Diiɛ gbɛ̃zↄ̃ↄ ũɛ. A wɛ̃ ge í gbãae mio,* Lua Nisĩna aↄ dɛdɛawà za aà da gbɛɛuɛ. 16 A to Isailiↄ zɛ ń Dii ń Luao dasi, 17 a dↄaa Diiɛ ń Lua Nisĩna gbãa pↄ́ Ɛlia vĩ yãao. A to maeↄ lɛdoũkɛ ń ń nɛ́ↄ,† a to swã́yãmansaideↄ gbɛ̃maaↄ ↄ̃nↄ sɛ́. A gbɛ̃́ↄ kɛkɛ aaↄ ku sↄu guu Diiɛ.

18 Ɔ̃ Zakali ò malaikapiɛ: Kpelewa má yã́pi sĩana dↄ̃i? Asa maezinan ma ũ, mɛ́ ma na zikũ̀ lↄ. 19 Ɔ̃ malaikapi wèwà à mɛ̀: Mámɛ má Gabliɛli,‡ miↄ zɛa Lua aɛ. Ɔ̃mɛ ma zĩ yã́pi oinɛ, mà baonapi kpanɛ. 20 Ma, n lɛ́na a naalɛ, ńyↄ̃ fↄ̃ yã'oo e yã́pi gɛ kɛò, kɛ́ ni ma yã́ pↄ́ a kɛ a gↄↄwa sio yã́i. 21 Gↄↄ bee sↄ̃ wàlɛ Zakali dã́. Aà gɛ̃gɛ̃a Lua kpɛ́u bↄ̀ ń saɛ. 22 Kɛ́ à bↄ̀, i fↄ̃ yã'òńnↄo, ↄ̃ wa dↄ̃̀ kɛ́ à wɛ́pungu'è Lua kpɛ́uɛ. Lá aà lɛ́na nàalɛ, ↄ̃ àlɛ yã'onɛ́ ń ↄo. 23 Kɛ́ Zakali sa'ogↄↄ lɛ́ kà, ↄ̃ à tà a bɛ. 24 Bee gbɛa aà na Ɛlizabɛti nↄsì, ↄ̃ à azĩa ùlɛ e mↄ sↄo à mɛ̀: 25 Dii kɛ̀, à ma wɛ̃nagwà, à wibↄ̀mɛɛ.

Malaika dↄaaa Yesu ia yã'oa

26 A mↄ soolode guu Lua malaika Gabliɛli zĩ̀ Galile wɛ̃́lɛ pↄ́ wì mɛ Nazalɛti guu. 27 À gɛ̀ nɛnↄɛ lɛ́so pↄ́ aà tↄ́n Maliama kĩ́i. A gↄ̃kpama vĩ Davidi bui ũ, aà tↄ́n Yosɛfu. 28 Kɛ́ malaikapi gɛ̃̀ aà kĩ́i, a òɛ̀: Fↄↄ báaade! Dii kunnↄɛ. 29 Maliama bílikɛ̀ yã́piwa, à làasookɛ̀ à mɛ̀: Fↄ bee mi dɛa ni? 30 Ɔ̃ malaikapi òɛ̀:

Maliama, ńsu to vĩa n kũo,

asa Lua báaadànguɛ.

31 Ma! Ńyↄ̃ nↄsi, ní nɛ'i gↄ̃ɛ ũ,

ní tↄ́kpaɛ̀ Yesu.

32 Aↄ dɛ gbɛ̃zↄ̃ↄ ũ, wàli oɛ̀ Musude Nɛ́.

Dii Lua a aà kpa aà dezi Davidi kpalau,

33 iↄ dɛ Yakↄbu buiↄ kía ũ gↄↄpii,

aà kpala aↄ láaa vĩo.§

34 Ɔ̃ Maliama ò malaikapiɛ: Lá mi gↄ̃ɛ dↄ̃ yãao, bee a kɛ kpelewa ni? 35 Malaika wèwà à mɛ̀:

Lua Nisĩna a dinɛ,

Musude gbãa i mↄma.

A yã́i nɛ́ pↄ́ ńyↄ̃ ipi kua aↄ adoa,

wàli oɛ̀ Lua Nɛ́.

36 N daɛ Ɛlizabɛti nɛgↄ̃ɛ nↄsia sↄ̃ a zikũ guu. Nↄɛ pↄ́ wa dìlɛ fĩi ũpi kú ń nↄ̀ mↄ sooloo tia. 37 Asa Lua lí fu yãewao.* 38 Ɔ̃ Maliama mɛ̀: Dii zↄ̀blenan ma ũ. Aà kɛmɛɛ lá ń òwa. Ɔ̃ malaikapi aà tò we.

Maliama gɛa Ɛlizabɛti gwai

39 Gↄↄ bee Maliama fɛ̀lɛ gɛ̀ wɛ̃́lɛ pↄ́ kú Yude bùsu gusĩsĩdeu gↄ̃̀ↄ. 40 À gɛ̀ Zakali bɛ, ↄ̃ à fↄkpà Ɛlizabɛtiwa. 41 Kɛ́ Ɛlizabɛti Maliama fↄpi mà, aà nɛ́ vĩ̀vĩ aà gbɛɛ guu, ↄ̃ Lua Nisĩna dɛ̀dɛ Ɛlizabɛtiwa, 42 Ɛlizabɛti wii gbãa lɛ̀ à mɛ̀: Báaaden n ũ dɛ nↄɛ píila. Báaaden nɛ́ pↄ́ kú ń gbɛɛu ũ lↄ. 43 Bↄ́n ma ũ kɛ́ ma Dii da mↄ̀ ma gwaii? 44 Gↄↄ pↄ́ ma swã́lɛ̀ n fↄwa lé, nɛ́ pↄ́ kú ma gbɛɛu vĩ̀vĩ ń pↄnaoɛ. 45 Báaaden n ũ, asa ń sì yã́ pↄ́ Dii ònɛ a kɛ. 46 Ɔ̃ Maliama mɛ̀: Báaaden n ũ, asa

Málɛ Dii tↄbↄ ma sↄ̃ guu,

47 ma nↄ̀sɛ lɛ́ yáalↄ Lua ma Suabanawa,†

48 asa à ma yãdà,

mapi aà zↄ̀blena pↄ́ mi ka pↄe ũo.

Za tia e gↄↄpii wàli omɛɛ báaadeɛ,

49 asa Lua Gbãadepi yãzↄ̃ↄkɛ̀mɛɛ.

Aà tↄ́ kua adoa.

50 Ì wɛ̃nadↄ̃ gbɛ̃́ pↄ́ aaì vĩakɛɛↄnɛ e ń buiwa.

51 À a gã̀sĩ pòo à a gbãa ↄ̀lↄnɛ́,

à waladeↄ fã̀aa ń ń làasooↄ.

52 À gbãadeↄ bↄ̀ kpalau,

à táaaↄ kã̀fĩ.

53 À pↄmaaↄ kpà nↄandɛnaↄwa aa kã̀,

à ↄdeↄ gbàɛ ↄgii.

54 À a zↄ̀blena Isailiↄ ĩ̀a,

an yã́ i sãaàguo.

55 À wɛ̃nadↄ̃̀ Ablahaũ ń a buipiↄnɛ‡

lá à a lɛgbɛ̃̀ wá deziↄnɛwa.

56 Maliama zↄ̃̀lɛ ń Ɛlizabɛtio lán mↄ àaↄ̃wa, ↄ̃ à gbàsa tà a bɛ.

Zãa Da'ilɛna ia

57 Ɛlizabɛti nɛ'igↄↄ kà, ↄ̃ à nɛ'ì gↄ̃ɛ ũ. 58 Kɛ́ aà fã́anideↄ ń aà daɛↄ mà lá Dii wɛ̃nadↄ̃̀ɛ̀, aa pↄnakɛ̀aànↄ. 59 A gↄↄ swaaↄ̃de zĩ́ aa mↄ̀ tↄ̃zↄ̃i nɛ́piɛ,§ aai aà mae Zakali tↄ́kpaɛ̀, 60 ↄ̃ aà da mɛ̀: Aawo! Wàli oɛ̀ Zãa. 61 Aa òɛ̀: Gbɛ̃e ku n daɛↄ guu, a tↄ́ bee vĩo. 62 Ɔ̃ aa yã'ò aà maeɛ ń ↄo, kɛ́ aa e dↄ̃ lá a ye wà tↄ́kpaɛ̀. 63 Zakalipi pↄ́ pↄ́ á e lákɛ̃wà gbɛ̀a, ↄ̃ a kɛ̃̀wà: Aà tↄ́n Zãa. Yã́pi bↄ̀ ń saɛ ḿpii. 64 Wegↄ̃ↄ aà lɛ́na gòlɛ, à lɛbↄ̀ lɛ́ yã'o, àlɛ Lua sáaukpa. 65 Ɔ̃ vĩa ń fã́anideↄ kũ̀ píi, ↄ̃ Yude bùsu gusĩsĩde gbɛ̃́ↄ lɛ́ yã́pi galikɛ píi. 66 Ɔ̃ gbɛ̃́ pↄ́ aa yã́pi màↄ kũa ń nↄ̀sɛ guu aa mɛ̀: Bↄ́ nɛ́pi aↄ dɛ a ũ ziai? Asa Dii ↄliaaaàziɛ.

67 Lua Nisĩna dɛ̀dɛ aà mae Zakaliwa, ↄ̃ à ãnabikɛkɛ̀ à mɛ̀:

68 Wà Dii Isailiↄ Lua sáaukpa!

À mↄ̀ a gbɛ̃́ↄ bò.

69 À Suaban gbãade bↄ̀wɛ̃ɛ

a zↄ̀blena Davidi bui guu,

70 lá a dà a ãnabiↄnɛ aa ò za ziwa.

71 Aa mɛ̀ a wá sí wá ibɛɛↄwa,

a wá bↄ gbɛ̃́ pↄ́ zawágupiↄ ↄzĩ.

72 Màa à wá deziↄ wɛ̃nagwà,

aà bàa pↄ́ kúńnↄ yã́ i sãaàguo.

73 À lɛgbɛ̃̀ wá dezi Ablahaũɛ*

74 à mɛ̀ á wá bↄ wá ibɛɛↄ ↄzĩ,

í wá gba zɛ́ wà zↄbleɛ vĩasai,

75 wá kua iↄ adoaɛ̀ gbɛ̃maaↄ ũ

e wá wɛ̃ni lɛ́u.

76 Mpi sↄ̃ ma nɛ́, wàli onɛ Musude ãnabi,

asa ḿmɛ ńyↄ̃ dↄaa ǹ zɛkɛkɛ Diiɛ.†

77 Ńyↄ̃ to aà gbɛ̃́ↄ dↄ̃ lá a ń suaba,

lá a ń duuna kɛ̃́má,

78 kɛ́ wá Lua nↄ̀sɛ sósobi vĩ yã́i.

Bↄa musu a mↄ wá gwai lá gu ì dↄwa,

79 i gupu gbɛ̃́ pↄ́ kú gusiauↄnɛ

ń gbɛ̃́ pↄ́ kú ga lɛ́zĩↄ,‡

i wá gbá pɛ́lɛ aafia zɛ́u.

80 Nɛ́pi zↄ̃ↄkũ̀ à gↄ̃̀ kã́gbãade ũ. A ku gbáau e gↄↄ pↄ́ à bↄ̀ gupuau Isailiↄwa.

Luku
<
1
>

*1:15 Nao 6.3

†1:17 Mal 3.23-24

‡1:19 Dan 8.16, 9.21

§1:33 2Sam 7.12, 16, Isa 9.6

*1:37 Daa 18.14

†1:47 1Sam 2.1

‡1:55 Daa 17.7

§1:59 Lev 12.3

*1:73 Daa 22.16-18

†1:76 Mal 3.1

‡1:79 Isa 9.1