Bibeli Luayãtaalá Nɛɛmii 12

Sa'onaↄ ń Levii buiↄ yã́

1 Sa'onaↄ ń Levii bui pↄ́ aa sù ń Salatiɛli nɛ́ Zolobabɛlio ń Yesuaoↄn kɛ: Selaia, Zelemii, Ɛzala, 2 Amalia, Maluku, Atusu, 3 Sekania, Leuũ, Mɛlemↄ, 4 Ido, Ginɛtↄ̃, Abia, 5 Miamɛ, Maadia, Bilega, 6 Semaia, Yoialibu, Yedaia, 7 Salu, Amↄku, Ilikia, Yedaia. Gbɛ̃́piↄ mɛ́ sa'ona ń ń gbɛ̃́ Levii buiↄ dↄaanaↄ ũ sa'onkia Yesua gↄↄ.

8 Levii buiↄ dↄaanaↄn kɛ: Yesua, Binui, Kamiɛli, Selebia, Yuda, Matania. Matania ń a gbɛ̃́ↄ mɛ́ aaì dↄaa ń táasilɛao, 9 mɛ́ Babukia ń Unio ń ń gbɛ̃́ↄ mɛ́ lɛ̀sinaↄ gãli plaade ũ. 10 Yesua Yoakiũ ì, Yoakiũ Ɛliasibu ì, Ɛliasibu Yoiada ì, 11 Yoiada Yonatãa ì, ↄ̃ Yonatãa Yadua ì.

12 Sa'ona pↄ́ aa dɛ uabeleↄ ũ Yoakiũ gↄↄↄn kɛ: Selaia bui Mɛlaia, Zelemii bui Anania, 13 Ɛzala bui Mɛsulaũ, Amalia bui Yohanani, 14 Maluku bui Yonatãa, Sebania bui Yosɛfu, 15 Aliũ bui Adena, Mɛlaio bui Ɛlekai, 16 Ido bui Zakali, Ginɛtↄ̃ bui Mɛsulaũ, 17 Abia bui Zikeli, Miyãmɛ bui, Maadia bui Piletai, 18 Bilega bui Samua, Semaia bui Yonatãa, 19 Yoialibu bui Matenai, Yedaia bui Uzi, 20 Salu bui Kalai, Amↄku bui Ɛbɛɛ, 21 Ilikia bui Asabia ń Yedaia bui Nɛtanɛlio.

22 Wà sa'ona uabeleↄ tↄ́ dàlau za gↄↄ pↄ́ Ɛliasibu ń Yoiadao ń Yohananio ń Yaduao dɛ sa'onkiaↄ ũ e Pɛɛsiↄ kí Daliusi kpalablegↄↄɛ. 23 Wà Levii bui uabeleↄ tↄ́ dà ladau e Ɛliasibu tↄũna Yohanani gↄↄ. 24 Levii bui dↄaanaↄ tↄ́n kɛ: Asabia, Selebia, Binui, Kamiɛli ń Yesuao. An gbɛ̃́ↄ ì yãwemá táasilɛa ń sáaukpaao guu gã ń gãoɛ, lá Lua gbɛ̃́ Davidi dìlɛwa. 25 Gbɛ̃́ɛ beeↄ mɛ́ bĩ́ibↄlɛdↄ̃ana pↄ́ aaì Lua ua làasiↄ ń a bↄlɛↄ dↄ̃́aↄ ũ: Matania, Babukia, Obadia, Mɛsulaũ, Talemↄ ń Akubuo. 26 Gbɛ̃́piↄ ku gↄↄ pↄ́ Yesua nɛ́ Yoakiũ, Yozada tↄũna dɛ sa'onkia ũɛ. Nɛɛmii mɛ́ bùsu dↄaana ũ, sa'ona Ɛzala mɛ́ yãdanɛde ũ.

Yelusalɛũ bĩ́i sakɛ̃a

27 Yelusalɛũ bĩ́i sakɛ̃gↄↄ wà Levii buiↄ wɛ̀ɛlɛwɛɛlɛ gu pↄ́ aa kuu, wà gɛ̀ńnↄ Yelusalɛũ aa bĩ́i sakɛ̃ ń pↄnao ń sáaukpaao ń lɛsiao ń sɛ̃́sɛ̃naↄ ń mↄↄnaↄ ń kúuↄ. 28 Lɛ̀sina pↄ́ kãi ń Yelusalɛũↄ kↄ̃ kã̀aa we, Nɛtofa bualoũdeↄ 29 ń Bɛgiligalideↄ ń gbɛ̃́ pↄ́ kú Gɛba ń Azemavɛo saɛↄ, asa lɛ̀sinaↄ ńzĩa bualoũↄ kpà Yelusalɛũ saɛ weɛ. 30 Sa'onaↄ ń Levii buiↄ gbãbↄ̀ ńzĩaɛ, ↄ̃ aa gbãbↄ̀ gbɛ̃́ kĩniↄnɛ, ↄ̃ aa gbãbↄ̀ bĩ́iɛ ń a bↄlɛↄ.

31 Má tò Yuda dↄaanaↄ dɛ̀dɛ bĩ́iwa, ↄ̃ ma lɛ̀sinaↄ kã̀aa gãli zↄ̃ↄ lɛɛ pla, aa dↄaanɛ́ bĩ́i musu. An gãli do bɛ ↄplaa oi, aa bɛ bĩ́i musu Tufua Bↄlɛ oi. 32 Osaia ń Yuda dↄaana lɛɛ doↄ tɛ́ ń kpɛ 33 ń Azaliao ń Ɛzalao ń Mɛsulaũo 34 ń Yudao ń Bɛ̃yãmɛɛo ń Semaiao ń Zelemiio. 35 Sa'onaeↄ kúńnↄ lↄ, aa kùuↄ kṹkũa. Bee gbɛa Yonatãa nɛ́ Zakali. Asafa mɛ́ Zakuu ì, Zakuu Mise ì, Mise Matania ì, Matania Semaia ì, Semaia Yonatãapi ì. 36 Aà gbɛ̃́ beeↄ kuaànↄ: Semaia, Azalɛli, Milalai, Gilalai, Maai, Nɛtanɛli, Yuda ń Ananio. Aa Lua gbɛ̃́ Davidi pↄ́'ↄbↄnaↄ kũa. Yãdanɛde Ɛzala mɛ́ dↄaaanɛ́. 37 Kɛ́ aa kà Nibↄna Bↄlɛ musu, aa dɛ̀dɛ Davidi wɛ̃́lɛ dɛdɛkĩi pↄ́ kú ń aɛↄwa, gu pↄ́ bĩ́i sĩ̀sĩ kũ̀u. Aa dↄ̀ Davidi bɛi, ↄ̃ aa kà Í Bↄlɛ musu gukpɛ oi.

38 Lɛ̀sinaↄ gãli plaadeↄ gɛ̀ ↄzɛɛ oi. Má tɛ́ńzi bĩ́i musu ń gbɛ̃́ kĩniↄ. Wa dↄ Kĩna kalangai, wa gɛ e bĩ́i yàasa kĩ́i. 39 Ɔ̃ wa gɛ̃ Ɛflaiũ Bↄlɛa ń Bↄlɛ Zio ń Kpↄ̀ Bↄlɛo. Wa dↄ Ananɛli kalangai ń Basↄo kalangao e Sã Bↄlɛ musu, ↄ̃ aa zɛ̀ Dakpɛunaↄ Bↄlɛ musu. 40 Ɔ̃ lɛ̀sinaↄ gãli plapiↄ kↄ̃ kã̀aa Lua ua. Má kú we lↄ ń gbãade lɛɛ doↄ 41 ń sa'onaɛ beeↄ: Ɛliakiũ, Maasea, Miyãmɛ, Mise, Ɛlioenai, Zakali ń Ananiao. Aa ń kùuↄ kṹkũa. 42 Maasea ku we lↄ ń Semaiao ń Ɛleazaao ń Uzio ń Yohananio ń Malakiao ń Elaũo ń Ezɛɛo. Lɛ̀sinaↄ lɛ́ lɛsi, Yezahia mɛ́ ń dↄaana ũ. 43 Gↄↄ bee aa sa'ò maamaa, ↄ̃ aa pↄnakɛ̀, asa Lua tò an pↄ kɛ̀na à kɛ̀ zàiɛ. Nↄɛↄ ń nɛ́ↄ lɛ́ pↄnakɛ lↄ. Wà Yelusalɛũdeↄ pↄnakɛapi súu mà zã̀.

44 Zĩbeezĩ aa gↄ̃ɛeↄ dìlɛ làasi gbɛ̃zↄ̃ↄↄ ũ, gu pↄ́ gbaↄ ń buapↄ káauↄ ń pↄ́ kwideↄ kálɛu. Gbɛ̃́piↄ lí buapↄ́ pↄ́ Mↄizi ikoyã dìlɛ a dɛ sa'onaↄ ń Levii buiↄ baa ũ sɛ́lɛ zↄ̃ɛwia ń zↄ̃ɛwiao aa kãaa we, asa sa'onaↄ ń Levii bui pↄ́ aaì zĩkɛ weↄ yã́ kà Yudaↄguɛ. 45 Lua ua zĩ ń gbãbↄanɛ́o dɛ ń yã́ ũɛ. Lɛ̀sinaↄ ń bĩ́ibↄlɛdↄ̃anaↄ líↄ ń zĩ kɛ lá Davidi ń a nɛ́ Salomↄↄo dìlɛwa. 46 Asa za Davidi ń Asafao gↄↄ lɛ̀sin dↄaanaↄ kuɛ, aaì dↄaa ń Lua táasilɛao ń aà sáaukpaao. 47 Zolobabɛli ń Nɛɛmiio gↄↄ Isailiↄ píi ìↄ lɛ̀sinaↄ ń bĩ́ibↄlɛdↄ̃anaↄ kámasa ká lá gu lɛ́ dↄɛ. Aaì Levii buiↄ asea kpámá, mɛ́ Levii buiↄ ì Aalona buiↄ asea kpámá sↄ̃.