Bibeli Luayãtaalá Naokɛa 27

Zelofada nɛnↄɛↄ túbiblea

1 Manase bui Efɛɛ nɛ́ Zelofada nɛnↄɛↄ tↄ́n kɛ: Mala, Nↄa, Ɔgɛla, Milika, Tiiza. Galada tↄũnaↄnɛ, Makii sĩ́wɛnaↄnɛ, Manase sↄ̃kpaɛↄnɛ, Yosɛfu sĩsĩↄnɛ. Aamɛ aa mↄ̀ 2 zɛ̀ Mↄizi ń sa'onkia Ɛleazaao ń kíaↄ ń bílao aɛ kpaaũkpɛ kpɛɛlɛ aa mɛ̀: 3 Wá mae gà guwaiwaiuɛ. A ku Kole gbɛ̃́ pↄ́ aa kã̀aa aa bↄ̀ Dii yã́ kpɛ́ↄ guuo. À gà azĩa tàae yã́iɛ, a nɛgↄ̃ɛ vĩ sↄ̃o. 4 A maa wá mae tↄ́ ga a buiↄ guu a nɛgↄ̃ɛ'isai yã́ie? Tↄↄlɛ kpáwá ń wá mae bɛdeↄ sãnu.

5 Mↄizi ń yã́ sɛ̀ gɛ̀ò Dii kĩ́i. 6 Ɔ̃ Dii yã'ò Mↄiziɛ à mɛ̀: 7 Zelofada nɛnↄɛↄ yã́ naɛ. Tↄↄlɛ kpámá ń pↄ́ ũ ń ń mae bɛdeↄ sãnu an mae kpaalɛ ũ. 8 O Isailiↄnɛ ǹ mɛ tó gↄ̃ɛe gà nɛgↄ̃ɛ'isai, aà nɛnↄɛ mɛ́ ali aà túbible. 9 Tó a nɛnↄɛ vĩ sↄ̃o, aà vĩ̀iↄ ń aà dãunaↄ mɛ́ aali ble. 10 Tó a vĩ̀i ń dãunaↄ vĩ sↄ̃o, aà mae vĩ̀iↄ ń aà dãunaↄ mɛ́ aali ble. 11 Tó aà mae vĩ̀i ge dãuna vĩo, aà daɛ fɛ̃̀ɛɛ mɛ́ ali ble. Bee aↄ dɛ ikoyã ũ Isailiↄnɛ, lá má ònɛwa.

Mↄizi Yozuee dilɛa a gɛ̃ɛ ũ

(Iko 31.1-8)

12 Dii ò Mↄiziɛ: Dɛdɛ Abaliũ gbɛɛ beewa, ní bùsu pↄ́ má kpà Isailiↄwa gwa. 13 Tó n wɛsìɛ, ↄ̃ ńyↄ̃ ta n deziↄ kĩ́i lá n vĩ̀i Aalona tàwa.* 14 Asa a gi ma yãmai Zini guwaiwaiuɛ, gↄↄ pↄ́ Isailiↄ lɛkpaakɛ̀manↄ, i luakɛ dↄ̃mɛɛ ń aɛ Mɛliba í pↄ́ kú Kadɛsi, Zini guwaiwaiu yã́ musuo.

15 Mↄizi yã'ò Diiɛ à mɛ̀: 16 Dii Lua pↄ́ ì wɛ̃ni kpa pↄ́piiwa gbɛ̃́ dilɛ gbɛ̃́piↄnɛ, 17 aàↄ ń yã́gↄ̃gↄ̃nɛ́, aàↄ dↄaanɛ́ gɛa ń suao, kɛ́ ń gbɛ̃́ↄ su aaↄ dɛ lán sã pↄ́ dãna vĩoↄwao.† 18 Ɔ̃ Dii ò Mↄiziɛ: Nuni nɛ́ Yozuee sɛ́, asa a ma Nisĩna vĩɛ, ní ↄnawà. 19 Ǹ aà zɛ sa'onkia Ɛleazaa ń Isailiↄ píi aɛ, ní yãdilɛɛ̀ ń wáa. 20 Ǹ n iko kpawà, kɛ́ Isailiↄ píi aaↄ aà yãma, 21 ìli gɛ́ sa'onkia Ɛleazaa kĩ́i aà yãgbɛaɛ̀ ń Uliũo ń Tumiũo.‡ Beewa Yozuee ń Isailiↄ píi aali gɛ́ aali su, lá Ɛleazaa ònɛ́wa.

22 Mↄizi kɛ̀ lá Dii dàɛwa. À Yozuee sɛ zɛ̀ Ɛleazaa ń gbɛ̃́piio aɛ, 23 ↄ̃ à ↄnàwà à yãdìlɛɛ̀ lá Dii òɛwa.§

*27:13 Iko 3.23-27, 32.48-52

†27:17 1Kia 22.17, Eze 34.5, Mat 9.36

‡27:21 Bↄa 28.30

§27:23 Iko 31.7