Bibeli Luayãtaalá Yáasiↄ 6

6

Fĩa ń màao ń gbɛ̃nazĩn pão yã́

1 Ma nɛ́, tó n n gbɛ̃do fĩa dì n miwa,

tó n kpɛ́gaausì gbɛ̃́ɛ,

2 tó n lɛ́ n kalikɛ̃̀,

tó n yã'oa n dayãu,

3 lá ńyↄ̃ kɛn la ma nɛ́: Lɛbↄ yã́piu,

asa n na n gbɛ̃do ↄzĩɛ.

Gɛ ǹyↄ̃ zɛzɛ n gbɛ̃dopizi,

awakpaɛ̀.

4 Ńsu to i gɛ̃ n wɛ́uo,

ńsu to n wɛ́baa gbiakũo,

5 ǹ nzĩa siwà

lá tue ì ń kɛ̃́wa,

lá bã ì bↄ fíikpana ↄuwa.

6 Zígbiade, gɛ́ bↄↄna gwai,

ní aà yãkɛa tàasika, ńyↄ̃ ↄ̃nↄkũ.

7 A dↄaana vĩo,

a gbɛ̃zↄ̃ↄ ge dii vĩo.

8 Ì blɛ kũ̀sũa di saɛ,

ì a pↄblea kãaa pↄkɛkɛgↄↄ.

9 Màade, ńyↄ̃ↄ wúlɛa e bↄɛ ni?

Bↄɛ ńyↄ̃ vu ń ioi?

10 Ni kã́mabo yↄↄ, ni i'o yↄↄ,

ni wúlɛ yↄↄ ↄkpaa n kùɛ.

11 Pↄ́ taasi a gɛ̃nzi lán kpã́iwɛliwɛwa,

nↄana a mↄma lán gbɛ̃́ pↄ́ gↄ̃kɛbↄ kũawa.

12 Gbɛ̃nazĩn pãá gbɛ̃vãiɛ,

ìↄ bɛbɛ ń ɛɛo dↄ a lɛ́u.

13 Ì yã'o ń wɛ́o ń ↄo,

ì seelakɛnɛ́ ń gbáo.

14 Mↄafili mɛ́ aà nↄ̀sɛ pà,

vãi wàai ↄ̃ ìↄ pa gↄↄpii.

15 Bee yã́i músi a mↄwà lɛzasai,

kaaũ a gɛ̃aàzi kã́ndo, aↄ fɛlɛa vĩo.

16 Yã́ mɛ̀n soolo ku kɛ́ Dii zau,

à kà se sopla kɛ́ a ye a gĩyãio.

17 Káakua, ɛɛtoa, yãesaidedɛa,

18 yãpãsĩ wàaipaa, wãa ń vãio,

19 seelade ɛɛtoa ń daɛↄ pɛãaao.

Laaikaa gbãsĩkɛai

20 Ma nɛ́, ǹyↄ̃ n mae yãdilɛaↄ kũa,

ńsu pãkpa n da yãdanɛio.

21 Ǹyↄ̃ kũa n sↄ̃u gↄↄpii,

ǹyↄ̃ daa yàbaa ũ.

22 A dↄaanɛ n táa'oa guu,

a n dↄ̃́a n wúlɛa guu.

Tó n vu, ali lɛdama.

23 Asa yãdilɛapiↄá filiaɛ,

yãdanɛpiá gupuaɛ,

lɛdama ń leleaoá zɛ́ wɛ̃nideɛ.

24 A n si nↄɛ vãiwa,

a n bↄ nↄɛ pãle yã́ nana oanɛu.

25 Ńsu ǹ aà kɛfɛnkɛ nidɛo,

ńsu to aà gↄ̃gwawɛ n kũo.

26 Káalua ì ń gↄ̃ gii,

gbɛ̃pãle nↄ yã́ sↄ̃ ì ń bɛɛɛ midɛ.

27 Tó gbɛ̃́ tɛsɛ dà a pↄlɛu,

aà pↄkasa a gí tɛ́kũie?

28 Tó gbɛ̃́ kɛ̀sɛpɛ̀lɛ tɛyↄ̃wa,

a na aà gbáwao lé?

29 Màaɛ ń gbɛ̃́ pↄ́ gɛ̃̀ a gbɛ̃́dee nↄ yã́uo,

asa tó à ↄnàwà, a bↄ pão.

30 Tó nↄa lɛ́ gbɛ̃dɛ, tó à kpã́i'ò,

wì a yã́ dilɛ pãe?

31 Tó wà aà kũ̀, a fĩabo lɛɛ sopla,

i pↄ́ pↄ́ a vĩ a ua kpa píi.

32 Gbɛ̃́ pↄ́ ì wúlɛ ń pãle nↄo làasoo vĩo,

gbɛ̃́ pↄ́ ì bee kɛ lɛ́ azĩa ↄ̃̀ↄkpaɛ.

33 Gbɛ̃a gbãa ń kpɛbↄao mɛ́ aà baa ũ,

aà tↄ́ ĩ́i a kɛ̃wào.

34 Asa íbɛlɛ a aà zã́ nↄ̀sɛ fɛlɛ,

i tↄsiwà aà wɛ̃nagwasai.

35 A awakpabↄe sio,

baa tó à gba zↄ̃ↄ dàɛ̀, a weio.