Bibeli Luayãtaalá Yáasiↄ 29

29

1 Gbɛ̃́ pↄ́ wa gbà laai maamaa mɛ́ aà swã́ gì gbãa,

kaaũ a gɛ̃aàzi kã́ndoɛ, a fɛlɛ lↄo.

2 Tó gbɛ̃maaↄ lìgua, gbɛ̃́ↄ pↄ ìↄ naɛ,

tó gbɛ̃vãi ku kpalau, wì aaukɛɛ.

3 Gbɛ̃́ pↄ́ ye ↄ̃nↄi ì a mae pↄ kɛ na,

káaluaↄ bɛ zɛsɛna ì a ↄ̃a dɛ.

4 Kía ì a bùsu zɛdↄ yã́zɛde musu,

a gbagusaɛsina sↄ̃ ì a bùsu dɛɛ.

5 Gbɛ̃́ pↄ́ lɛ́ lɛna kɛ a gbɛ̃́deeɛ

lɛ́ ba kpa azĩaɛɛ.

6 Gbɛ̃vãi tàaekɛa ì aà kũ bai ũ,

gbɛ̃maa gula ìↄ dↄ ń pↄnao.

7 Gbɛ̃maa ì laaidↄ yɛ̃̀ɛɛsaideɛ a yã́gↄ̃gↄ̃awa,

vãikɛna sↄ̃ ìli aà kã̀akɛo.

8 Gbɛ̃́laanikɛnaↄ ì wɛ̃́lɛ wã,

ↄ̃nↄnaↄ ì gbɛ̃́ↄ nↄ̀sɛ níninɛ́.

9 Tó ↄ̃nↄna gɛ̀ yã́kpalɛkɛi ń sↄũo,

sↄũpi pↄ pà yã̀, àlɛ yáalↄ yã̀,

aà lɛ́ lí kpaaũo.

10 Gbɛ̃dɛnaↄ ìↄ za tàaesaideguɛ,

aaìↄ gbɛ̃maaↄ wɛɛ.

11 Sↄũ pↄkũma ì pisi aà wɛ́waɛ,

ↄ̃nↄna sↄ̃ ì a nↄ̀sɛ suumpaɛ.

12 Tó gbãade lɛ́ swã́sɛ ɛɛyãi,

aà ìwaↄ ì gↄ̃ vãikɛnaↄ ũ píiɛ.

13 Taaside ń ĩadamadeo an yã́ɛ bee doũɛ,

Dii mɛ́ tò an wɛ́ lɛ́ gu'e ḿpii.

14 Kía pↄ́ ì yã́kpalɛkɛ taasideↄnɛ ń sĩanao,

aà kpala zĩ́napɛlɛa ìↄ gbãa gↄↄpiiɛ.

15 Totoa ń flão ì to gbɛ̃́ ↄ̃nↄkũ,

nɛ́ pↄ́ wa tò azĩaɛ ì wida a dawaɛ.

16 Tó vãikɛnaↄ lìgua, tàaekɛa ì kↄ̃ɛ,

ãma gbɛ̃maaↄ aa ń lɛ́lɛa e.

17 Ǹ n nɛ́ toto, i n nↄ̀sɛ danɛ doũ,

a to n nↄ̀sɛ àↄ yáalↄwa.

18 Gu pↄ́ Lua yã́ kúuo wìliↄ ńzĩa kũa dↄ̃o.

Báaaden gbɛ̃́ pↄ́ aà ikoyã kũa ũ.

19 Wìli zↄ toto ń lɛ́oo.

Baa tó a mà, a zĩkɛwào.

20 N gbɛ̃́ pↄ́ ì wã àↄ yã'o èa?

Sↄũ sã̀ↄwa.

21 Zↄ pↄ́ wa zàza za a ɛ̀waasogↄↄ,

a gↄ̃ gulu ũ gbɛzãɛ.

22 Pↄkũmade ì sòle da,

nↄ̀sɛyãfũnde ì duunakɛ maamaaɛ.

23 Ĩandãa ì ń busaɛ,

zĩabusaa mɛ́ ì ń kã́fĩ.*

24 Gbɛ̃́ pↄ́ lɛ́ ble ń kpã́io za azĩauɛ,

ì mɛ á sì ń Luao, ↄ̃ ìli we òo.

25 Vĩakɛa gbɛ̃nazĩnaɛá baiɛ,

gbɛ̃́ pↄ́ lɛ́ Dii náaikɛ mi aↄ daa ía.

26 Gbɛ̃́ daside ìↄ ye gbãade zɛńnↄɛ,

ãma yã́kpalɛkɛa ń gbɛ̃́ↄá Dii yã́ɛ.

27 Gbɛ̃maa ye gbɛ̃́ dↄ̀ↄsai gĩyãio,

gbɛ̃vãi sↄ̃ ìliↄ ye nↄ̀sɛpuade yãkɛaio.

*29:23 Mat 23.12