Bibeli Luayãtaalá Soũↄ 10

10

Lua yã́gↄ̃gↄ̃a ń gbɛ̃́ↄ wabikɛa

1 Dii, bↄ́yãi ń zɛa zã̀zãi?

Àkɛa ni ulɛnɛ́ taasikɛgↄↄzĩi?

2 Gbɛ̃vãi ì gbãasaide wɛ wala guu,

ì kↄ̃nikɛɛ̀, ì aà kṹ.

3 Gbɛ̃vãi ì a pↄnidɛaↄ ĩ́anadã,

ì bĩide sáaukpa, ì Dii tↄbɛ̃ɛsi.

4 Gbɛ̃vãi wala mɛ́ tò ìli Dii aɛyao,

a Lua làasoo vĩo.

5 Yã́ pↄ́ ì kɛ píi ì bↄɛ̀ maaɛ,

ì azĩa kã́fĩ, ìli n ikoyã dao,

ì lɛsuikɛ a ibɛɛↄwa.

6 Ì mɛ á kpaguao,

áↄ ku pↄnau taasikɛsai gↄↄpiiɛ.

7 Ɛɛ ìↄ dↄ aà lɛ́u

ń gbɛ̃́kaao ń yãpãsĩo,

yãdↄnwɛia ń yãvãio mɛ́ aà lɛ́ pà.*

8 Ì naalɛ yãesaideɛ wɛ̃́nkpɛ,

kɛ́ à e aà dɛ asii guu,

ì mi'ĩide kpákpa gusaɛna.

9 Ì naalɛ gbɛ̃́ↄnɛ asii guu lán nↄ̀ↄmusuwa,

ì naalɛ lákpɛu à e yɛ̃̀ɛɛsaide kṹ.

Tó à aà kũ̀, ì aà gálɛ ń a bao.

10 Gbɛ̃́ pↄ́ a le a kũ̀ gↄ̃̀ wúlɛa yɛ̃̀mɛɛ,

gbãa mɛ́ aà nɛ̀.

11 Gbɛ̃vãipi ì mɛ Lua a yã́ fãn vĩo,

ì ↄku a wɛ́waɛ, ìli gu'eo.

12 Dii, fɛlɛ mↄ́ ń n gbãao,

Lua, ǹyↄ̃ yɛ̃̀ɛɛsaideↄ fãnkɛ.

13 Lua, bↄ́yãi gbɛ̃vãi ì dↄ́ɛnnↄi?

Ì o a sↄ̃ guu ńyↄ̃ ĩadawao.

14 Ń beeo ni e sã́asã,

ni gbɛ̃́ↄ yã'ↄ̃ma ń ń pↄsiao yãda,

kɛ́ ǹ e ↄdaumá.

Yɛ̃̀ɛɛsaide ì azĩa kpama,

tonɛ pↄ́ gwana vĩo dↄnlɛden n ũ.

15 Gbɛ̃vãi ń gbɛ̃́ pãsĩo gã̀sĩ ɛ́nɛ́,

an vãi pↄ́ aalɛ e wa dↄ̃o wí ń musu.

16 Dii ìↄ kible gↄↄpii,

aà yãdansaiↄ midɛ aà bùsuu.

17 Dii ì yɛ̃̀ɛɛsaideↄ wabikɛa ma,

ì ń gba sↄ̃, ì swãdↄ ń yã́i.

18 Ì zɛ ń tonɛ pↄ́ gwana vĩoↄ

ń gbɛ̃́ pↄ́ wàlɛ ĩadamáↄ,

kɛ́ gbɛ̃nazĩna pↄ́ dɛ bùsuti ũ su to sↄ̃ kɛ̃́ńgu lↄo yã́i.

*10:7 Lom 3.14