Bibeli Luayãtaalá Soũↄ 22

22

Wiilɛa Luawa

1 Davidi lɛ.

2 Ma Lua, ma Lua,

bↄ́yãi n ma to wei?*

Ma wiilɛ̀,

àkɛa ńlɛ mↄ́ ma suabaio ni?

3 Ma Lua, ma lɛzùnzi fãanɛ,

ni weao,

ma wiilɛ̀ma gwãasĩna,

ↄ̃ ń nílɛ.

4 N kua adoa, ń zↄ̃lɛa báawa,

ↄ̃ Isailiↄ ì ń táasilɛ.

5 Ḿmɛ wá deziↄ n náaikɛ̀,

aa n náaikɛ̀ ↄ̃ n ń mìsi.

6 Aa lɛzùnzi ↄ̃ aa bↄkĩi è,

aa n náaikɛ̀ ↄ̃ wí i ń kũo.

7 Kↄ̀ↄtɛ̃n ma ũ, gbɛ̃nazĩnan ma ũo,

wàlɛ ma sↄ̃sↄ̃, wàlɛ sakamagu.

8 Gbɛ̃́ pↄ́ lɛ́ ma gwaↄ lɛ́ ma yáalↄ,

aalɛ lɛsuikɛa,

aalɛ mikɛ déũdeũ aalɛ mɛ:†

9 Lá àlɛ Dii náaikɛ, aà aà bↄ,

tó aà yã́ kàaàguɛ, aà aà misi.‡

10 Ḿmɛ n ma bↄ ma da nↄ̀sɛu,

n ma dↄ aà yↄ̃́wa.

11 Má na n ↄzĩ za nɛasakpɛuɛ,

ń dɛ ma Lua ũ za ma da nↄ̀sɛu.

12 Ńsu ǹyↄ̃ kumanↄ zã̀o,

asa taasi lɛ́ mɛkpa,

mɛ́ gbɛ̃e ku à dↄmalɛo.

13 Wa liaamazi dasidasi lán zugaaeↄwa,

wa pooamazi lán Basana zuswanaↄwa.

14 Wàlɛ lɛdↄdↄa lán nↄ̀ↄmusu ↄↄlↄna pↄ́ aalɛ pↄ́ taitaiↄwa.

15 Ma gbãa gɛ̃̀zɛa lán í kↄ́lɛawa,

ma guↄ bↄ̀ↄũ píi,

ma mɛ yↄ̀ lán zↄsawa.

16 Ma kòlo giigàga lán pɛ̃nkasowa,

ma lɛ́na nàalɛ ma lɛ́ musu.§

Wà ma wulɛ lán gɛwa bùsutiu.

17 Gbɛ̃́ↄ liaamazi dasidasi lán gbɛ̃ↄwa,

gbɛ̃vãipiↄ nↄ̀nↄaamazi,

aa ma ↄↄ ń ma gbáↄ fↄ̃̀fↄ̃.*

18 Má fↄ̃ mà a wáↄ nao píi.

Wà wɛbìibii, wàlɛ ma gwa,

19 wàlɛ ma pↄkasaↄ kpaalɛ,

wàlɛ tɛ́lɛpa ma ulatao yã́ musu.†

20 Dii, ńsu ǹyↄ̃ kumanↄ zã̀o,

ḿmɛ ń ma gbãa ũ,

mↄ dↄmalɛ kpakpa,

21 ma bↄ an fɛ̃nda lɛ́zĩ,

ma wɛ̃ni si gbɛ̃piↄ swaawa,

22 ma bↄ nↄ̀ↄmusupiↄ lɛ́zĩ,

ma si zùsɛ̃lɛpiↄ kↄ́bawa,

23 mí n tↄbↄ ma gbɛ̃́ↄnɛ,

mí n táasilɛ kↄ̃kãaa guu.‡

24 Á Dii vĩakɛnaↄ, à aà táasilɛ,

á Yakↄbu buiↄ, à aà tↄbↄ,

á Isailiↄ, à misiilɛɛ̀.

25 Asa i saka taasideguo,

i aà wɛ̃nadekɛ yaboo,

i mikpɛdↄɛ̀o,

à swãkpà aà wiilɛai.

26 Má n táasilɛ balu guu,

má lɛ́ pↄ́ má kɛ̀ma fĩabo n vĩakɛnaↄ wáa.

27 Taasideↄ pↄble aa kã́,

Dii kĩ́i wɛ̀ɛlɛnaↄ aa aà táasilɛ,

aaiↄ ku gↄↄpii.

28 Dṹnia bṹu gbɛ̃́ↄ Dii dↄ̃, aai zɛaànↄ,

bui pↄ́ kúuↄ kúlɛɛ̀ píi,

29 asa kpalableaá Dii yã́ɛ,

ì kible bui píiwa.

30 Dṹnia gbãadeↄ kúlɛɛ̀ píi,

gbɛ̃́ pↄ́ gɛ̀ gɛ́kĩiↄ misiilɛɛ̀ píi.

31 An buiↄ zↄbleɛ̀,

aa Dii yã́ dau siu ziadeↄnɛ,

32 aai o gbɛ̃́ pↄ́ wi ń i yãaoↄnɛ

lá à yãnakpàmá,

asa a kɛ̀.

*22:2 Mat 27.46, Maa 15.34

†22:8 Mat 27.39, Maa 15.29, Luk 23.35

‡22:9 Mat 27.43

§22:16 Zãa 19.28

*22:17 Zãa 20.27

†22:19 Mat 27.35, Maa 15.24, Luk 23.34, Zãa 19.24

‡22:23 Ɛbɛ 2.12