31
Zĩakpaa Diiwa
1 Davidi lɛ.
2 Dii, ḿmɛ ma nanzi,
ńsuli tó wí ma kũo.
Lá ni yãkɛ a zɛ́wa, ma misi.
3 Swãdↄmazi, ní ma bↄ kpakpa.
Gↄ̃mɛɛ ma misigbɛ ũ,
zɛgikĩi pↄ́ a ma suaba ũ.
4 Ma gbɛsi ń ma ulɛkĩion n ũ,
dↄaamɛɛ, ní gɛmanↄ n tↄ́ yã́i.
5 Ńsu to mà zu ba pↄ́ wa kpàmɛɛuo,
asa ma Mìsinan n ũ.
6 Ma a wɛ̃ni nànɛ n ↄzĩ,*Luk 23.46
ma bↄ, Dii Lua Sĩande.
7 Má za tã́a gbàgbanaↄgu,
Dii má aà náai vĩ.
8 Má yáalↄ má pↄnakɛ ń n gbɛ̃kɛo,
asa n ma gwa ma taasikɛa guu,
ń dↄ̃̀manↄ ma yooyea guu.
9 Ni ma na ma ibɛɛↄnɛ ń ↄzĩo,
n ma gba dɛ̀ɛpookĩi.
10 Ma wɛ̃nagwa Dii, asa má yooyeaɛ,
pↄsia tò ma wɛ́ gↄ̃̀ sùii,
ma pↄ yà, ma nↄ̀sɛ ↄ̃̀ↄkpà.
11 Pↄsia lɛ́ ma wɛ̃ni mↄsↄ,
aaukɛa lɛ́ ma wɛ̃ lao,
làasoo tò má yɛ̃̀ɛɛ vĩ lↄo,
ma wáↄ kɛ̀ múumuunnↄ.
12 Ma gbɛ̃́deeↄ ì sakamagu ma ibɛɛↄ yã́i,
ma yã́ ì ma gbɛ̃́ↄ vĩakũ maamaaɛ,
gbɛ̃́ pↄ́ lɛ́ kpaaũmanↄ gãaɛↄ ì pãalɛmɛɛ.
13 Ma yã́ i dↄ gbɛ̃egu lↄo
ma gↄ̃ lán gɛwa,
ma gↄ̃nɛ́ lán oogboowa.
14 Miↄ ma gbɛ̃́ dasiↄ lɛ́ ma pe,
vĩa pↄ́ↄ liaamazi.
Aaì kãaa aa lɛkpaaĩmazi,
aaì lɛdoũkɛ ma wɛ̃nibↄa yã́i.
15 Mapi sↄ̃, ḿmɛ má n náai vĩ, Dii,
mi mɛ ma Luan n ũ.
16 Ma wɛ̃ni ìↄ ku n ↄzĩ gↄↄpiiɛ,
ma si ma ibɛɛ pↄ́ lɛ́ ma wɛↄwa.
17 Mapi n zↄ̀blenawa wɛgwa,
ma suaba n gbɛ̃kɛ yã́i.
18 Dii, ńsu to wí ma kũo,
asa ma lɛzùnzi.
To wí vãikɛnaↄ kṹ,
to an lɛ́ àↄ kpaaũa tɛ̃́ɛnau,
19 to an lɛ́na ɛɛtonaↄ naalɛ.
Aaì dↄ́ɛ ń gbɛ̃maaↄ,
aaì sakańgu ń ĩ́andãao.
20 Àizɛɛ pↄ́ ń kã̀aa n vĩakɛnaↄnɛ zↄ̃ↄ,
ni ɛ̀fãaikɛ gbɛ̃́ pↄ́ nanziↄnɛ gbɛ̃́pii wáa.
21 Tó gbɛ̃́ↄ lɛkpàaĩńzi,
ni ↄkuńla,
tó wàlɛ lɛkpaakɛńnↄ,
ni ń ulɛ n guu.
22 Ma Dii sáaukpà,
asa a yemazi zↄ̃ↄ
wɛ̃́lɛ pↄ́ wà koezↄ̃̀i guu.
23 Gili gɛ̃̀magu we,
ↄ̃ ma mɛ̀: N ma vũaaɛ.
Kɛ́ ma suabalɛ zùnzi,
n ma wɛ̃na wiilɛa mà.
24 Dii yãmanaↄ, àↄ yeaàzi.
Dii ì a náaikɛnaↄ dↄ̃́a,
ì fĩabo zĩakãfĩnaↄnɛ a lɛ́ gbɛu.
25 Á gbɛ̃́ pↄ́ á wɛ́ dↄ Diiziↄ,
àↄ gbãa à á sↄ̃dilɛ.