Bibeli Luayãtaalá Soũↄ 37

Gbɛ̃maaↄ ń gbɛ̃vãiↄ zia

Davidi lɛ.

1 Ńsu to gbɛ̃vãiↄ yã́ n kũ gbãao,

ńsu vãikɛnaↄ gwea nidɛo,

2 asa aa giigaga gↄ̃̀ↄ lán sɛ̃waɛ,

an maa a láa lán sɛ̃la ísiwa.

3 Dii náaikɛ, níↄ yãmaakɛ.

Zɛ n bùsuu, níↄ inamiu.

4 To n pↄ kɛ Diiwa na,

i n gba pↄ́ pↄ́ n nↄ̀sɛ yei.

5 Zɛ ń Diio,

ǹ aà náaikɛ, i yã́ɛ beeↄ kɛnɛ:

6 A tó yã́ bↄnnↄ na lán gudↄawa,

a to ǹ bↄ maa lán fãanɛwa.

7 Lɛkpaaũ Dii aɛ, ní sↄ̃́aaàzi,

ńsu to saasɛna yã́ n kũ gbãa

gↄↄ pↄ́ aà yã́ lɛ́ bↄlɛiɛo.

8 Pↄkũma tó, mikɛ̃ pↄpaawa.

Ńsu to yã́ lí n kũ gbãao,

ì mↄ́ ń vãikɛaoɛ.

9 Asa gbɛ̃vãiↄ midɛ,

gbɛ̃́ pↄ́ an wɛ́ dↄ Diiziↄ mɛ́ aa gↄ̃ bùsu vĩ.

10 À gↄ̃̀ yↄↄ kɛ́ gbɛ̃vãiↄ aaↄ ku lↄo,

baa tó n ń wɛɛlɛ, ńyↄ̃ ń eo.

11 Zĩabusanaↄ mɛ́ aaↄ bùsu vĩ,*

aaiↄ pↄnakɛò ń aafia zↄ̃ↄo.

12 Gbɛ̃vãi ì vãikpaaĩ ń gbɛ̃maao,

ì lɛ́sakãaàzi.

13 Ãma Dii ìↄ aà yáalↄ,

asa a dↄ̃ aà gↄↄ a pa.

14 Gbɛ̃vãiↄ ì fɛ̃nda wo,

aaì ń kakpa sáa,

kɛ́ aa e taasideↄ ń wɛ̃nadeↄ kwɛò,

aai gbɛ̃́ pↄ́ an yãkɛa maaↄ dɛdɛ.

15 An zĩa fɛ̃nda a ń zↄ̃ ń sↄ̃u,

wa ń sáↄ ɛ́'ɛnɛ́.

16 Yↄↄna pↄ́ gbɛ̃maa vĩ

dɛ gbɛ̃vãi dasiↄ àizɛɛa.

17 Asa gbɛ̃vãiↄ gbãa a midɛ,

ãma Dii ìↄ gbɛ̃maaↄ kũa.

18 Dii tàaesaideↄ yã́ dↄ̃,

an kpaalɛ ìↄ dɛ ń pↄ́ ũ gↄↄpiiɛ.

19 Wí a ń kṹ yãpãsĩgↄↄo,

baa tó nↄana kà, aaↄ kãaɛ.

20 Ãma gaga a gɛ̃ gbɛ̃vãiↄgu,

Dii ibɛɛↄ láa lá sɛ̃̀bↄlↄ ì láawa,

aa gɛ̃lɛ lán súɛlɛwa.

21 Gbɛ̃vãi ì pↄ́ sɛ̃amá,

ìli a fĩaboo,

gbɛ̃maa sↄ̃ ì gbada sↄũsↄũ.

22 Gbɛ̃́ pↄ́ Dii báaadàńguↄ mɛ́ aa gↄ̃ bùsu vĩ,

gbɛ̃́ pↄ́ à lɛkɛ̀nɛ́ↄ sↄ̃ aa midɛ.

23 Dii mɛ́ ì zɛmikũ gbɛ̃́ɛ,

aà pↄ ìↄ na aà kuawa.

24 Baa tó àlɛ lɛlɛ, a lɛ́lɛ sↄlↄlↄo,

kɛ́ Dii aà kũa yã́i.

25 Ɛ̀waason ma ũ yãa, ↄ̃ ma zikũ̀,

mi e Lua gbɛ̃maa vũ̀aa bauo,

mi e aà nɛ́ↄ lɛ́ baakɛo.

26 Ìↄ gbada gↄↄpii ìↄ pↄ́ sɛ̃anɛ́,

aà nɛ́ↄ aaↄ dɛ báaadeↄ ũɛ.

27 Mikɛ̃ yãvãiwa, níↄ yãmaakɛ,

ní e ǹyↄ̃ ku gↄↄpii.

28 Asa Dii ye maakɛai,

a a náaikɛnaↄ vũaao.

Aaↄ ku aafiaɛ gↄↄpii,

gbɛ̃vãiↄ sↄ̃ aa midɛ.

29 Gbɛ̃maaↄ mɛ́ aa gↄ̃ bùsu vĩ,

aaiↄ ku we gↄↄpii.

30 Ɔ̃nↄyã ì bↄ gbɛ̃maa lɛ́u,

aà lɛ́ ì yã́zɛde o.

31 Aà Lua ikoyã dↄ aà sↄ̃wa,

aà gbá lí tii pↄewao.

32 Gbɛ̃vãi ì gbɛ̃maa kpákpa

kɛ́ à e aà dɛ.

33 Dii a gbɛ̃maapi to aà ↄzĩo,

a we yã́kpalɛ aà bleo.

34 Sↄ̃́a Diizi, níↄ aà yã́ kũa,

i n kã́fĩ, ní gↄ̃ bùsu vĩ,

ní gbɛ̃vãiↄ midɛa e.

35 Ma gbɛ̃vãi gbãadee è yãa,

àlɛ ↄta lán lí pↄ́ gu kɛ̀ɛ̀ nawa.

36 Kɛ́ tá ma kpa we, a ku we lↄo,

ma aà wɛ̀ɛlɛ, mi aà eo.

37 Tàaesaide yã́ gwa,

wɛ́tɛ gbɛ̃maa yã́i,

asa nↄ̀sɛniɛde buiↄ gↄ̃ bui ũ.

38 Ãma duunkɛnaↄ bãdɛ sãnusãnu,

gbɛ̃vãiↄ bui a midɛ.

39 Dii mɛ́ a gbɛ̃maaↄ suaba,

aↄ dɛnɛ́ ulɛkĩi ũ taasikɛgↄↄ.

40 Dii a dↄńlɛ, i ń bↄ,

a ń sí gbɛ̃vãiↄwa, i ń suaba

kɛ́ aa nàaàzi yã́i.

*37:11 Mat 5.5