Bibeli Luayãtaalá Soũↄ 72

72

Wabikɛa Luawa

Salomↄↄ lɛ.

1 Lua, ǹ n iko kpa kíawa,

ǹ n maakɛ kpa kíabuipiwa,

2 kɛ́ aà dↄaa n gbɛ̃́ↄnɛ a zɛ́wa,

i yã́gↄ̃gↄ̃ táaaↄnɛ a zɛ́wa,

3 gbɛ̀sĩsĩↄ i mↄ gbɛ̃́ↄnɛ ń aafiao,

sĩ̀sĩↄnaↄ i to aaↄ ku nama guu.

4 Kía a to yã́ bↄ ń táaaↄ na,

a taaside nɛ́ↄ suaba,

i gbãamↄnɛdeↄ wíwi.

5 Aↄ ku lá ĩatɛ̃ ìↄ ku gↄↄpiiwa,

lán mↄvua kua wɛ̃ ń wɛ̃owa.

6 Aↄ dɛ lán zuↄ louwa,

lán mↄ̀sɛ pↄ́ ì pisi tↄↄlɛwawa.

7 Gbɛ̃maaↄ ↄta aà gↄↄ,

nama a kɛ zài e mↄ gɛ midɛò.

8 A kible za ísialɛ la ń a lɛ́leo,

za Uflata e dṹnia lɛ́wa.*

9 Bui pↄ́ kú guwaiwaiuↄ mↄ kúlɛɛ̀,

aà ibɛɛↄ wúlɛ ń gbɛɛu aà aɛ.

10 Taasisi ń ísia baa kíaↄ falubↄɛ̀,

Seba ń Saba kíaↄ mↄ gbadaɛ̀.

11 Kíaↄ mↄ kúlɛɛ̀ ḿpii,

bui píi a misiilɛɛ̀.

12 Asa a wɛ̃nade pↄ́ an wii dↄↄ bↄɛ,

a taaside pↄ́ dↄnlɛde vĩoↄ misi.

13 A yɛ̃̀ɛɛsaideↄ wɛ̃nagwa,

a taasideↄ bↄ ga lɛ́zĩ.

14 A ń bↄ gbãamↄnɛdeↄ ń gbɛ̃́ pãsĩↄ ↄzĩ,

asa an kua bɛɛɛ vĩɛ̀.

15 Lua kía dↄ̃ ń aafiao!

Wiↄ aà gba Seba bùsu vua,

wiↄ wabikɛɛ̀ Luawa gↄↄpii,

wiↄ samaa'oɛ̀ láasai.

16 Bua pↄ́ↄ kɛ aà bùsuu maamaa,

a láↄ aↄ da sĩ̀sĩↄ musu síii,

aa nɛ'i aa pia lán Libã lákpɛwa,

aa gbã lán kàsapuwa sɛ̃saou.

17 Aà tↄ́ aↄ ku gↄↄpii lán ĩatɛ̃waɛ,

bui píi a báaa e aà sabai, aai aà tↄnasi.

18 Wà Dii Lua, Isailiↄ Lua sáaukpa!

Ɔ̃mɛ ì yãbↄnsaɛↄ kɛ ado.

19 Wàↄ Lua gawidepi tↄbↄ gↄↄpii,

aà gawi i li dṹniaa píi.

Ãmi! Ãmi!

20 Yɛse nɛ́ Davidi wabikɛa lɛ́n we.

LÁ ÀAƆ̃DE

Soũↄ 73-89

*72:8 Zkl 9.10