Bibeli Luayãtaalá Soũↄ 86

86

Kowɛkɛa Luaɛ

Davidi lɛ.

1 Dii, swã́kpa ma yã́i, ní wea,

asa taaside wɛ̃naden ma ũ.

2 Ma wɛ̃ni dↄ̃́a, asa má n yã́ↄ kũaɛ.

Ǹ n zↄ̀blena suaba,

ḿmɛ ń ma Lua ũ, málɛ n náaikɛ.

3 Sùuukɛmanↄ, Dii,

asa miↄ lɛzunzi kↄↄ ń oosioɛ.

4 Ǹ n zↄ̀blena pↄ kɛ na,

asa ma laai tà n kĩ́i, Dii.

5 Ń maa mɛ́ ń sùuu vĩ, Dii,

n gbɛ̃kɛ zↄ̃ↄ n sìsinaↄnɛ.

6 Dii, swã́kpa ma wabikɛai,

laaidↄ ma wɛ̃na wiiwa.

7 Má lɛzunzi ma taasikɛgↄↄzĩ,

asa ni wea.

8 Tã́ae muaannↄo, Dii,

gbɛ̃e lí fↄ̃ n kɛa kɛ̀o.

9 Bui pↄ́ ń kɛ̀ↄ mↄ́ kúlɛnɛ,*

aa n tↄbↄ ḿpii.

10 Asa ń zↄ̃ↄ mɛ́ ni dabudabuↄ kɛ,

ḿmɛ ń Lua ũ ndo.

11 Ǹ n zɛ́ ↄlↄmɛɛ Dii,

míↄ bɛ n sĩana guu.

Ma sↄ̃ damɛɛ doũ, míↄ n vĩa vĩ.

12 Má n sáaukpa ń nↄ̀sɛmɛndoo,

Dii ma Lua, máↄ n tↄbↄ gↄↄpiiɛ.

13 Asa gbɛ̃kɛ pↄ́ ń kɛ̀mɛɛ zↄ̃ↄ,

n ma wɛ̃ni sì bɛda ɛ̀ títiwa.

14 Lua, kàamaideↄ lɛ́ fɛlɛmanↄ,

gbɛ̃́ pãsĩↄ lɛ́ ma wɛ, aali n yãdao.

15 Mpi Dii, Lua sósobiden n ũ,

ń sùuu vĩ mɛ́ n pↄ lí pa kpaao,

ń gbɛ̃kɛ ń náaio vĩ zↄ̃ↄ.

16 Ma wɛgwa, wɛ̃nadↄ̃mɛɛ.

Ǹ n zↄ̀blena gba gbãa,

mapi n nↄɛ zĩkɛna nɛ́ suaba.

17 Maakɛamɛɛ seela kɛ,

ma wɛ̀lɛↄ i e, wí i ń kṹ,

asa Dii, n dↄmalɛ,

n ma nↄ̀sɛ nìnimɛɛ.

*86:9 Zia 15.4