Bibeli Luayãtaalá Soũↄ 92

92

Lua sáaukpaa

1 Kã́mabogↄↄ lɛ.

2 A maa wà n sáaukpaɛ, Dii,

wá lɛsi wà n tↄbↄ, Musude,

3 wí n gbɛ̃kɛ galikɛ kↄↄ,

wí n náaiyã'ò gwã́,

4 wí n táasilɛ ń mↄↄnao

ń domao ń kotilio.

5 N yãkɛaↄ ì ma pↄ kɛ na, Dii,

mi guladↄ n ↄzĩkɛaↄwa.

6 Dii, n yãkɛaↄ zↄ̃ↄ maamaaɛ,

n làasooↄ gbia à kɛ̀ zài.*

7 Sↄũ yã́pi dↄ̃o,

mìsaide a fↄ̃ mao.

8 Baa tó gbɛ̃vãiↄ ↄtà lán kàewa,

mɛ́ vãikɛnaↄ kã́fĩa è ḿpii,

an zia dɛ kaalɛ láasai ũɛ.

9 Mpi sↄ̃ Dii, ńyↄ̃ↄ kã́fĩa gↄↄpiiɛ.

10 Ǹ n ibɛɛↄ gwa, aalɛ midɛ,

vãikɛnaↄ lɛ́ fãaa píi.

11 N ma gba gbãa lán zùsɛ̃lɛwa,

n nísi ↄde kà ma miwa.

12 Ma wɛsì ma wɛ̀lɛↄ fualɛ,

ma swã́ ma ibɛɛ vãiↄ wii mà.

13 Gbɛ̃maaↄ gbã lán daminaliↄwa,

aa zↄ̃ↄkũ lán Libã sɛdɛ líↄwa.

14 Pɛ́lɛa Dii kpɛ́ kpɛɛlɛ

aa gbã wá Lua ua.

15 Ń ń zikũakɛo aaↄ nɛ'iɛ,†

an lá aↄ nísi bↄɛ si plɛ̀plɛ.

16 Aa mɛ Dii maa,

ↄ̃mɛ wá gbɛsi ũ,

vãie ku aà guuo.

*92:6 Lom 11.34

†92:15 Zãa 15.2