Bibeli Luayãtaalá Soũↄ 95

95

Lua táasilɛa

1 À mↄ wà pↄna wii dↄ Diiwa,

wà guladↄ gbɛsi pↄ́ ì wá bↄwa.

2 Wà gɛ́ aà aɛ wà aà sáaukpa,

wà lɛsi wà aà táasilɛ.

3 Asa Dii mɛ́ Lua zↄ̃ↄde ũ.

Kía zↄ̃ↄɛ, a dɛ dii píia.

4 Tↄↄlɛ nↄna ku aà ↄzĩɛ,

gbɛ̀sĩsĩ misonaↄá aà pↄ́ɛ.

5 Ísiaá aà pↄ́ɛ, ↄ̃mɛ kɛ̀,

ↄ̃mɛ tↄↄlɛ ikàsa ń a ↄo.

6 À mↄ wà wúlɛ wá gbɛɛu

wà kúlɛ Dii wá Kɛna aɛ.

7 Asa aàpi mɛ́ wá Lua ũ,

wá dɛ aà kpàsa gbɛ̃́ↄ ũɛ,

aà sã pↄ́ àlɛ ń dãↄ ũ.

Tó a aà lↄↄ mà gbã,

8 ásu swã́gbãakɛ lá á deziↄ kɛ̀ Mɛliba

gↄↄ pↄ́ aa ku Masa guwaiwaiuwao.*

9 Baa kɛ́ aa ma yãkɛaↄ è,

aa ma yↄ̃ aa ma gbãa lɛgwà.†

10 Ɔ̃ má ye ń gĩyãio e wɛ̃̀ bla,

ma mɛ̀ gbɛ̃́ sã́sãaↄnɛ,

aa ma yãkɛaↄ dↄ̃o.

11 Má ò ń mazĩao ń pↄfɛ̃o ma mɛ̀,

aa gɛ̃ ma kã́mabokĩiuo.‡

*95:8 Ɛbɛ 3.15

†95:9 Bↄa 17.1-7, Ɛbɛ 3.7-11

‡95:11 Nao 14.20-23, Ɛbɛ 4.3, 5