Bibeli Luayãtaalá Soũↄ 107

107

Lua sáaukpaa aà maa yã́i

1 À Dii sáaukpa, asa a maa,

aà gbɛ̃kɛ láaa vĩo.

2 Gbɛ̃́ pↄ́ Dii ń bóↄ o màa,

gbɛ̃́ pↄ́ à ń bↄ́ ń ibɛɛↄ ↄzĩↄ.

3 À ń bↄ́ bùsu ń bùsuo à ń kãaa

za gukpɛ oi ń bɛ'aɛ oio,

za gugbãntoo oi ń gɛↄmidↄkĩi oio.

4 An gbɛ̃eↄ bɛ sã́sãa guwaiwaiu ń sɛ̃gbão,*

aai wɛ̃́lɛ pↄ́ aa zↄ̃lɛu zɛ́ dↄ̃o.

5 Nↄana ń imio lɛ́ ń dɛ,

an wɛ̃ni gↄ̃̀ lɛɛnnↄ.

6 Ɔ̃ aa wiilɛ̀ Diizi ń taasikɛau,

ↄ̃ à ń bↄ́ ń wɛ́tɛ̃a guu.

7 À ń dá zɛ́ súsuwa,

ↄ̃ aa kà wɛ̃́lɛ pↄ́ aa zↄ̃lɛu.

8 Aa Dii sáaukpa aà gbɛ̃kɛ yã́i

ń yãbↄnsaɛ pↄ́ ì kɛnɛ́o.

9 Asa ì imidɛnaↄ kòlo níninɛ́,

ì pↄmaa kpa nↄandɛnaↄwa aa kã́.†

10 An gbɛ̃eↄ ku gusiau ga lɛ́zĩ,‡

aalɛ taasikɛ yea ń mↄdaonao.

11 Asa aa gì Lua yãmai,

aa sakà Musude lɛdamauɛ.

12 A tò wà ń busa ń zĩ gbãao,

aalɛ lɛ́ gálɛ, gbɛ̃e ku à dↄńlɛo.

13 Ɔ̃ aa wiilɛ̀ Diizi ń taasikɛa guu,

ↄ̃ à ń bↄ́ ń wɛ́tɛ̃api guu.

14 À ń bↄ́ gusiau ń gao lɛ́zĩ,

à ń mↄdaonapiↄ kɛ̃̀kɛ̃má.

15 Aa Dii sáaukpa aà gbɛ̃kɛ yã́i,

ń yãbↄnsaɛ pↄ́ ì kɛnɛ́o.

16 Asa ì bĩ́ibↄlɛ gba pↄ́ wa pì ń mↄgotɛ̃o gbooɛ,

ì mↄsi gbãa zɛ́kakabↄↄ ɛ́'ɛ.

17 An gbɛ̃eↄ lìaa ń swã́gbãa yã́i,

aa gↄ̃̀ suuunnↄ ń tàaeↄ yã́i.

18 Aa ye pↄblea gĩyãio,

aa kà gaa.

19 Ɔ̃ aa wiilɛ̀ Diizi ń taasikɛau,

ↄ̃ à ń bↄ́ ń wɛ́tɛ̃api guu.

20 Aà lɛ́kpãsã ń gbãgbã,§

à ń sí mia'ɛwa.

21 Aa Dii sáaukpa aà gbɛ̃kɛ yã́i,

ń yãbↄnsaɛ pↄ́ ì kɛnɛ́o.

22 Aa sáaukpa sa'owa,

aai aà yãkɛaↄ galikɛ ń gulakɛao.

23 An gbɛ̃eↄ gɛ̃̀ gó'ilɛnaↄu,

aa dàzɛu ísiaa,

aaìↄ bɛ í zↄ̃ↄpia aaↄ gɛ́ laatai.

24 Gbɛ̃́piↄ Dii yãkɛaↄ è,

ń yãbↄnsaɛ pↄ́ ì kɛ í guoↄ.

25 À yã'ò ↄ̃ zàa'ĩan gbãa kàka,

ísia fɛ̀lɛ ń bútɛ̃mbaao.*

26 Aa gɛ̀ musu aa sù zĩ́lɛ,

kua kaipi lɛ́zĩ sↄ̃ kɛ̃̀ńgu.

27 Aa dèedee,

aa tàlaatalaabò lán wɛ̃dɛnawa,

an ílɛ'ↄ̃nↄ mìdɛ.

28 Aa wiilɛ̀ Diizi ń taasikɛau,

ↄ̃ à ń bↄ́ ń wɛ́tɛ̃api guu.

29 À ĩ́an gbãa zɛ̀ à gↄ̃̀ ĩ́an fɛɛɛna ũ,

à í zùukɛ̀ à kɛ̀ kílikili.†

30 Kɛ́ gu nìni gↄ̃̀ↄ, an pↄ kɛ̀na,

ↄ̃ à gɛ̀ńnↄ godↄkĩi pↄ́ aalɛ yáu.

31 Aa Dii sáaukpa aà gbɛ̃kɛ yã́i,

ń yãbↄnsaɛ pↄ́ ì kɛnɛ́o.

32 Aa aà tↄbↄ balu guu,

aa aà táasilɛ dↄaanaↄ kãaa guu.

33 À swaↄ zↄ̃̀ɛ à gↄ̃̀ gugii ũ,‡

a tò nibↄnaↄ gↄ̃̀ tↄↄlɛ inidɛnaↄ ũ.

34 À tↄↄlɛ báaade lìlɛ gu wiside ũ

gbɛ̃́ pↄ́ zↄ̃lɛuↄ vãi yã́i.§

35 À guwaiwai lìlɛ dã̀na ũ,

a tò gugii gↄ̃̀ nibↄna ũ.*

36 À nↄandɛnaↄ dìlɛ we,

ↄ̃ aa wɛ̃́lɛ kàlɛ aa zↄ̃̀lɛu.

37 Aa buapↄ́ↄ tↄ̃̀ aa vɛ̃ɛliↄ bà,

ↄ̃ à nɛ'ìnɛ́ maamaa.

38 À báaadàńgu,

ↄ̃ aa dasikũ̀ à kɛ̀ zài,

i to an pↄtuoↄ làoo.

39 Ɔ̃ à ń láo lↄ, aa gↄ̃̀ yↄↄnnↄ

gbãamↄanɛ́ ń músio ń pↄsiao yã́i.

40 Lua ì saikɛ kpalablenaↄwa,

ì to aa liaaliaa gugii pↄ́ zɛvĩo guu.

41 Ì wɛ̃nadeↄ bↄ taasiu à ń sɛ́ lɛsĩ,

ì to an uadeↄ dasikũ.

42 Tó gbɛ̃maaↄ è, aaì pↄnakɛ,

gbɛ̃vãiↄ sↄ̃ aaì ń lɛ́ kpaaũ.

43 Nↄ̀sɛde laaidↄ yã́piↄwa,

i Dii gbɛ̃kɛ gwa lá a dɛ.

*107:4 Nao 14.33

†107:9 Luk 1.53

‡107:10 Luk 1.79

§107:20 Luk 7.7

*107:25 Yon 1.4

†107:29 Luk 8.24

‡107:33 Yoz 3.13

§107:34 Daa 13.10, 19.24-26

*107:35 Bↄa 17.6