Bibeli Luayãtaalá Soũↄ 132

132

Davidi buiↄ zↄ̃lɛa báawa Siↄna

Gɛa Yelusalɛũ lɛ.

1 Dii, ńsu to Davidi yã́ sãngu

ń taasi pↄ́ a kɛ̀o píi.

2 À lɛkɛ̀ Yakↄbu Lua gbãadewa,

à lɛgbɛ̃̀ Diiɛ à mɛ̀,

3 á tá kpɛ́uo,

á wúlɛ a liiwao,

4 á we i a wɛ́baa gbiakũo,

á tó i na a wɛ́uo,

5 e à gɛ uakpaò Diiɛ,

i kpɛdↄ Yakↄbu Lua gbãadepiɛ.*

6 Wá mà a ku Ɛflata bùsuu,

wá è Kiliayaaliũdeↄ bua.

7 Wà gɛ́ aà kúkĩi,

wà kúlɛ aà gbadibↄ aɛ.

8 Dii, fɛlɛ su n pilakĩi,

mpi ń n kpagolo ikodeo.†

9 N gbàgbanaↄ gbɛ̃suabaa da ula ũ,

n yãmanaↄ gula iↄ dↄ.

10 Ńsu mikpɛdↄ kía pↄ́ ń kpàɛo

n zↄ̀blena Davidi yã́i.

11 Dii lɛgbɛ̃̀ Davidiɛ,

a náai vĩ, a lɛ́ lilɛo, à mɛ̀:

Má n bui zↄ̃lɛ n kpalabaawa.‡

12 Tó n buiↄ ma bàakuańnↄ yãdà,

mɛ́ aa yã́ pↄ́ má dànɛ́ↄ kũa,

an buiↄ aaↄ zↄ̃lɛ n kpalabaawa gↄↄpiiɛ.

13 Asa Dii Siↄna sɛ̀,

a ye àↄ dɛ a zↄ̃lɛkĩi ũ à mɛ̀:

14 Guɛ bee máↄ kuu gↄↄpii,

la máↄ zↄ̃lɛau, asa à ma pↄ́ gbàɛ.

15 Má báaadau, mí kũ̀sũa diɛ̀,

má blɛ kpa a wɛ̃nadeↄwa aa kã́.

16 Má gbɛ̃suabaa da sa'onaↄnɛ ula ũ,

ma yãmanaↄ lɛtɛ̃ iↄ dↄ ń pↄnao.

17 We má Davidi bui kía gbãade bↄu,§

we kía pↄ́ má kpà filia aↄ dↄu.*

18 Má wida aà ibɛɛↄwa,

aà kíafua iↄ pipi aà musu.

*132:5 1Kia 8.17, Zĩn 7.46

†132:8 Nao 10.35-36

‡132:11 2Sam 7.12-16, Luk 1.32-33, Zĩn 2.30

§132:17 Luk 1.69

*132:17 1Kia 11.36, 2Kia 8.19