Bibeli Luayãtaalá Soũↄ 147

147

Pↄ́pii kua Lua ↄzĩ

1 Àleluya!

Lɛsia wá Luaɛ maa mɛ́ a na,

à kũ̀ wà aà táasilɛɛ.

2 Dii lɛ́ Yelusalɛũ fɛlɛ lↄ,

à Isaili zĩ̀zↄↄ nàaa lɛ́ suńnↄ.

3 Ì gbɛ̃́ pↄ́ an pↄ yàↄ nↄ̀sɛ níninɛ́,

ì nísidↄↄ ń gu'ĩaↄwa.

4 Ì saanaↄ nao,

a ń baade dↄ̃ ń a tↄ́o.*

5 Wá Dii zↄ̃ↄ, a iko vĩ maamaaɛ,

aà ↄ̃nↄ lɛ́ vĩo.

6 Dii ì zĩabusanaↄ gba gbãa,

ↄ̃ ì ↄtↄ̃ vãikɛnaↄwa e zĩ́lɛ.

7 À lɛsi Diiɛ ń aà sáaukpaao,

à wá Lua táasilɛ ń mↄↄnao.

8 Ì to lou sisi,

ì tↄↄlɛ gba lou,

ì to sɛ̃ bↄlɛ sĩ̀sĩa.

9 Ì blɛ kpa nↄ̀bↄↄwa

ń gbagbaa nɛ́ↄ, tó aalɛ wiipɛ.

10 I kɛ sↄ̃́ gbãaↄ mɛ́ ì kaaàguo,

i kɛ gↄ̃sagbãakɛ mɛ́ ì kɛɛ̀o.†

11 Gbɛ̃́ pↄ́ aa aà vĩa vĩↄ mɛ́ ì kaaàgu,

gbɛ̃́ pↄ́ an wɛ́ dↄ aà gbɛ̃kɛipiↄ.

12 Yelusalɛũdeↄ, à Dii tↄbↄ,

Siↄnadeↄ, à á Lua táasilɛ.

13 Asa ì báaadaáguɛ,

ì á wɛ̃́lɛ bↄlɛ gbã́aↄ gba gbãa.

14 Ì á gba aafiaʼe á bùsu lɛ́ lɛ́u,

ì pↄbui maa kpáwá à kã́.

15 Ì yã'o kpã́sã tↄↄlɛ,

aà yã́ ì ká ń bao.

16 Ì nɛɛzi kwɛ púuu lán sãkãwa,

ì to fíi kpá lán túfuwa.

17 Ì lougbɛ fã́ɛ lán gbɛ̀kↄsↄwa.

Démɛ a fↄ̃ zɛ a ĩ́anaii?

18 Ì yã'o kpã́sã, ↄ̃ lougbɛpi ì yↄ́,

ì ĩ́ana gbaɛ, a í ì bàalɛ.

19 Ì to Yakↄbu buiↄ a yã́ dↄ̃,

ì ikoyã pↄ́ á dìlɛↄ da Isailiↄnɛ.

20 I bee kɛ buipãleↄnɛo,

aa aà yãdilɛaↄ dↄ̃o.

Àleluya!

*147:4 Isa 40.26

†147:10 1Sam 16.7