Bibeli Luayãtaalá Zia yã́ 11

Seelade gbɛ̃ↄn plaↄ

1 Ɔ̃ wà fee kpàa pↄyↄ̃bↄ ũ, wa òmɛɛ: Fɛlɛ Lua kpɛ́ yↄ̃ ń aà gbagbakĩio,* ní lousisina pↄ́ kú weↄ nao. 2 Ǹ a ua tó, ńsu yↄ̃o, asa wa kpà luayãdansaiↄwaɛ. Aa ↄ̃zↄ̃ Lua wɛ̃́lɛwa e mↄ bla ń plao.† 3 Má a seelade gbɛ̃ↄn plaↄ gba zɛ́ aa ãnabikɛkɛ gↄↄ ↄ̀aa soolo ń bàaↄ̃opi (1.260) guu zwã̀nkasaↄ dadaa. 4 Gbɛ̃́piↄ mɛ́ kuli mɛ̀n plaↄ ń dau mɛ̀n pla pↄ́ zɛa dṹnia Dii aɛↄ ũ.‡ 5 Tó gbɛ̃́ lɛ́ wɛɛlɛ ĩadamá, tɛ́ a bↄ ń lɛ́u à kṹ ń ibɛɛpiↄwa. Tó gbɛ̃́ su lɛ́ wɛɛlɛ ĩadamá, màa ade a ga. 6 Aa luabɛ zɛtaa iko vĩ,§ kɛ́ lou su ma gↄↄ pↄ́ aalɛ ãnabikɛkɛo yã́i. Aa í lilɛa au ũ iko vĩ lↄ.* Aa kìsia bui píi kpá dṹniazi gↄↄ pↄ́ aa yeiwa.

7 Tó aa ń seeladekɛ kɛ̀ aa làa, wài pↄ́ a bↄ gbã́o zòolo guu† a zĩkańnↄ, i zĩblemá à ń dɛdɛ.‡ 8 An gɛ aↄ kálɛa mɛɛwia zↄ̃ↄ pↄ́ wà ń Dii pàuliwa zɛa guu. Yáasi guu wì mɛ mɛɛwiapiɛ Sↄdↄũ§ ge Egipi. 9 Gbɛ̃́ↄ ń buiↄ ń buiyã'onaↄ ń bùsu gbɛ̃́ↄ aa ń gɛↄ gwagwa e gↄↄ àaↄ̃ ń kĩnio, aa we wà ń vĩo. 10 Gbɛ̃́ pↄ́ aa ku tↄↄlɛↄ pↄnakɛ, aai dikpɛkɛ, aai gbadakↄ̃ɛ, kɛ́ ãnabi gbɛ̃ↄn pla pↄ́ wãwã kpàńzipiↄ gàga yã́i. 11 Gↄↄ àaↄ̃ ń kĩniopi gbɛa Lua tò ĩ́an wɛ̃nide gɛ̃̀ńgu, ↄ̃ aa fɛ̀lɛ zɛ̀.* Vĩa zↄ̃ↄ gbɛ̃́ pↄ́ ń éↄ kũ̀. 12 Ɔ̃ ãnabipiↄ lↄↄ gbãa mà à bↄ̀ luabɛ, a ònɛ́: À fɛlɛ mↄ́ la. Ɔ̃ aa fɛ̀lɛ tà musu luabɛpuana guu gↄↄ pↄ́ an ibɛɛↄ wɛ́ fĩ̀má.† 13 Zĩbeezĩ tↄↄlɛ lùalua pãsĩpãsĩ, mɛɛwiapi lɛɛ kwide kwɛ̀, ↄ̃ gbɛ̃ↄn ↄ̀aasↄsↄo lɛɛ sopla (7.000) gàga tↄↄlɛlualuaapi guu. Vĩa gbɛ̃́ kĩniↄ kũ̀, ↄ̃ aa Lua Musude tↄbↄ̀. 14 Wɛ̃na plaade gɛ̃̀, a àaↄ̃de lɛ́ ká sa.

Kã̀ae soplade pɛa

15 Malaika soplade a kã̀ae pɛ̀. Lↄↄ gbãaↄ bↄ̀ luabɛ wà mɛ̀: Dṹnia kpala gↄ̃̀ wá Dii ń kía pↄ́ a kpào pↄ́ ũ, aↄ kible gↄↄpii.‡ 16 Gbɛ̃zↄ̃ↄ gbɛ̃ↄn baasↄo mɛ̀ndosai pↄ́ zↄ̃lɛzↄ̃lɛa ń báawa Lua aɛpiↄ ń mi pɛ̀lɛpɛlɛ tↄↄlɛ aa kùlɛɛ̀ 17 aa mɛ̀:

Dii Lua Gbãapiide,

ń kú yãa mɛ́ ń kú tia,

wa n sáaukɛ̀,

asa n bↄ ń n gbãa zↄ̃ↄoɛ,

ↄ̃ n gbasa n na kibleawa.

18 Bùsu píi gbɛ̃́ↄ za fɛ̃̀,

ↄ̃ n pↄkũmabↄ̀bↄmá.§

N yã́kpalɛkɛa ń gyaadeↄ gↄↄ kà.

Ńyↄ̃ fĩabo n zↄ̀blena ãnabiↄnɛ

ń n gbɛ̃́ pↄ́ aalɛ vĩakɛnɛↄ,*

nɛ́fɛ̃nɛn gbɛ̃zↄ̃ↄ,

ní dṹniadɛnaↄ dɛdɛ.

19 Ɔ̃ wà Lua kpɛ́ pↄ́ kú musu wɛ̃̀, ↄ̃ ma Luabaakuańnↄ kpagolo è. Lou lɛ́ pílɛ, àlɛ vĩ, àlɛ pũna. Tↄↄlɛ lùalua, lougbɛ pãsĩ kwɛ̀.

*11:1 Eze 40.5, Zkl 2.5-6

†11:2 Luk 21.24

‡11:4 Zkl 4.3, 11-14

§11:6 1Kia 17.1

*11:6 Bↄa 7.17-19

†11:7 Zia 17.8

‡11:7 Dan 7.7, 21, Zia 13.7

§11:8 Isa 1.9-10

*11:11 Eze 37.10

†11:12 2Kia 2.11

‡11:15 Bↄa 15.18, Dan 2.44, 7.14, 27

§11:18 Soũ 2.1, 5

*11:18 Soũ 115.13