Bibeli Luayãtaalá Zia yã́ 13

Wài mɛ̀n plaↄ

1 Ɔ̃ ma wài è, àlɛ bↄ ísiapi guu, aà kↄ́ba kwi, aà mi sopla. Kↄ́ba mɛ̀n kwipiↄ kíafuaↄ kpákpaa. Dↄ́ɛa ń Luao tↄ́ kɛ̃a aà mipiↄwa.* 2 Wài pↄ́ má èpi bↄ̀ lán gbɛaanawa. Aà ↄ pãsĩ maamaaɛ, mɛ́ aà lɛ́ dɛ nↄ̀ↄmusu lɛ́wa. Kwã́ a gbãa kpàwà ń a kpalao ń a iko zↄ̃ↄo.† 3 Aà mipiↄ do dɛ lá wà a kaikɛ̀ dɛadɛa a bↄ làawa. Aà yã́ bↄ̀ dṹnia gbɛ̃́pii saɛ, ↄ̃ aa tɛ̀aàzi. 4 Ɔ̃ aa kùlɛ kwã́piɛ, kɛ́ à a iko kpà wàipiwa yã́i. Aa kùlɛ wàipiɛ lↄ aa mɛ̀: Démɛ kà wàipiwai? Démɛ a fↄ̃ zĩkaaànↄi?

5 Wà walayã'olɛ dↄ̀ wàipiɛ aà Lua tↄbɛ̃ɛsiò, mɛ́ wà aà gbà zɛ́ aàↄ iko vĩ e mↄ bla ń plao. 6 Ɔ̃ à nà dↄ́ɛa ń Luaowa, à aà tↄbɛ̃ɛsì ń aà kúkĩio ń gbɛ̃́ pↄ́ kú weↄ. 7 Wà aà gbà zɛ́ aà zĩka ń Lua gbɛ̃́ↄ, i zĩblemá. Wà aà gbà zɛ́ lↄ aàↄ iko vĩ bui píiwa ń gbɛ̃́piio ń buiyãↄ píi ń bùsu píi gbɛ̃́ↄ.‡ 8 Gbɛ̃́ pↄ́ aa ku tↄↄlɛↄ kúlɛ wàipiɛ ḿpii, mɛ́ i kɛ gbɛ̃́ pↄ́ an tↄ́ kú àizãna taalau§ e Lua àↄ gɛ́ dṹnia kálɛi bàasio. Taala piá Sã pↄ́ wa dɛ̀ pↄ́ɛ. 9 Gbɛ̃́ pↄ́ nↄ̀sɛ vĩ, aà yã́ɛ bee ma.

10 Gbɛ̃́ pↄ́ Lua dìlɛ wà kũ zĩ̀zↄ ũ,

wa kũ zĩ̀zↄ ũɛ.

Gbɛ̃́ pↄ́ Lua dìlɛ wà dɛ ń fɛ̃ndao,

fɛ̃nda wa dɛò.*

Bee lɛ́ lɛda Lua gbɛ̃́ↄwa aaↄ mɛna vĩ, aaↄ aà náai vĩ.

11 Ɔ̃ ma wài pãle è, àlɛ bↄ tↄↄlɛu. Aà kↄ́ba vĩ mɛ̀n pla lán sãwa, ãma à yã'ò lán kwãsawaɛ.† 12 À wài sɛ̃́ia iko píi kɛ̀ aà wáa. A tò tↄↄlɛ ń gbɛ̃́ pↄ́ aa kuwàↄ kùlɛ wài sɛ̃́ia pↄ́ wà aà kaikɛ̀ dɛadɛa a bↄ làaɛ. 13 À dabudabu zↄ̃ↄↄ kɛ̀, baa se a tò tɛ́ bↄ̀ luabɛ à lɛ̀lɛ tↄↄlɛ gbɛ̃nazĩnaↄ wáa. 14 À gbɛ̃́ pↄ́ aa ku tↄↄlɛↄ sã̀sã ń dabudabu pↄ́ wà aà gbà zɛ́ a kɛ̀ wài sɛ̃́ia wáaↄ. A ònɛ́ aa wài pↄ́ wà aà kaikɛ̀ ń fɛ̃ndao à gi ku taa kɛ. 15 Ɔ̃ wà wài plaadepi gbà zɛ́ à wɛ̃ni kpa wài taapiwa, ↄ̃ wài taapi fↄ̃̀ yã'ò a tò wà gbɛ̃́ pↄ́ gì kúlɛiɛↄ dɛ̀dɛ. 16 A tò wà seelakɛ̀ gbɛ̃́pii ↄplaawa ge an mi'aɛ, nɛ́fɛ̃nɛn gbɛ̃zↄ̃ↄ, ↄdeↄ ń taasideↄ, zↄↄ ń wɛ̃́ɛↄ, 17 kɛ́ gbɛ̃e su pↄ́ yíao ge à pↄ́ lúo, mɛ́ i kɛ a seela pↄ́ dɛ wàipi tↄ́ ũ ge aà tↄ́ nimɛloo vĩ bàasio. 18 Ɔ̃nↄyãn kɛ. Gbɛ̃́ pↄ́ wɛzɛ̃ vĩ, aà wàipi nimɛloo polo, asa gbɛ̃nazĩna tↄ́ nimɛlooɛ. Aà nimɛlooá ↄ̀aa àaↄ̃ ń bàaↄ̃ ń soolooɛ (666).

*13:1 Zia 17.3, 7-13

†13:2 Dan 7.3-6

‡13:7 Dan 7.8, 25, 11.36

§13:8 Soũ 69.28

*13:10 Zel 15.2

†13:11 Mat 7.15