Eletar yay étiar yo
Ᵽier
ahiĉ me
Waf waw wabaj me n’eletar yauye
Eletar Ᵽier étiar ehiĉihiĉ bi ni ejangaraay bugaa mof mice maamme jama Turuki. Guroŋeboroŋ ti sijaora mala min guomme ejangara (1 Ᵽier 1.1 ni 2.11). Bugan bugagu bugo guĉindor me guĉotihenilĉotihen ban ni gulalil. Gutegeilteh sulob ban ni guᵽinor élatienil.
Ᵽier nahihiĉ bi eramben gáinen gagu golil ni gafium gagu golil, ban naagil guaken n’guroŋ ti bugan bugo Aláemit aĉobe.
Eletar yay étiar yaa Ᵽier ehiĉihiĉ bi ni ejangara gáᵽullo n’ulago wábuliore. Maer bugo ᵽe Biinum Banabe bukanil n’gúni ni buroŋ buvugul. Gubbañut guroŋ ti sipail gufan, ter ᵽoᵽ ti uĉindoril (1 Ᵽier 1.13 bi 2.4). Bugo guomme ésuh yay yal Aláemit (1 Ᵽier 2.4-10). Gújue gumuten mátañie mamu ni sílam sasu mata gubabaj gafium gakaneil n’guroŋ (1 Ᵽier 1.3, 13, 21 ni 1 Ᵽier 3.15).
Aláemit naileyilen Yésu Kirista ni eĉet yay : dáuru díhag me gafium gal ajangara ánoan. Gafium gaugu gukanekan an min áju amuten ujel ni gálatien ti Yésu akan mo me : nálalam, gujeloljel ban ni gulalol. Alugenut mátañie mamu mo gukanol me, bare nabambaŋ gafiumol ᵽe n’Aláemit (1 Ᵽier 4.12-19). Eletar Ᵽier étiar eĉimeĉimen maagen mamu búoh buroŋ babu ni eĉet yay saa Yésu Kirista sikakan milihorumay bi ni ajangara ánoan.
Milihorumay maumu migitengiten bu an aat me aroŋor ni bugan galet ejangara ; migitene ᵽoᵽ bu naat me aroŋ ni fuomunor fal ejangara. Eletar yay efaŋe etar bugan bugagu gabajut me gailo gaaro (1 Ᵽier 2.18 bi 3.6), ti urokaaw bugo ufanil gulet me ejangara, ni ᵽoᵽ waareaw gabaj me wáine galet ejangara. Buroŋil bújue bukan bugagu n’gujoh wa uomme gáinen gal ajangara. Ni fuomunor fal ejangara, gábboli ni gákanumor bugan ni gupalil síĉibbeneĉibben bugala fo ᵽooil, újogum n’úᵽur waw bi n’ufan fo ró (1 Ᵽier 5.1-7 ni 1 Ᵽier 1.22 bi 2.3).
1
Basaf babu baa Ᵽier
Injé Ᵽier, aamme aᵽotora ala Yésu Kirista, ihiĉeul eletar yauye bi ni buru bugo Aláemit aĉob me, ban ni jivisor júuy iki jiĉin ti sijaora ni mof mamu maa Pont, maa Galasi, maa Kaᵽados, maa Asi ni ᵽoᵽ maa Bitini. Aláemit Ᵽaaya naĉobulĉob nabor ni wo naᵽi me nakiĉ ahato ; ni garamben gaa Biinum Banabe, náᵽunnulᵽuren jolul min mbi jíkanum Yésu Kirista, ban físimol ni fukanul n’jíni bugan ganabe.
Mbi gáji ni gásumay síni ni buru jálo !
Gafium gagu gájaenume me bi ni buroŋ
Usalal Aláemit, aamme Ᵽay Ataolal Yésu Kirista ! Ñarumol enil ñájalo mee ñiĉilol min akanolal nubbañal ubugali ni buroŋ buvugul, mala eilen yay yo nailen me Yésu Kirista ni gaĉet me. Mamu ñer, nubajale gafium gaa maagen, go nuirigenale me ni go gafum gagu go Aláemit abaŋ me bi ni buganol. Kakan gafum gájuut gunemo, ter gúkasulo, ter ᵽoᵽ guhonet. Aláemit nabaŋulgobaŋ dó fatiya émit. Ban buru faŋaul, íni me jíinene maagen mamu, Aláemit ni sembeol ᵽan apoyul bi esenul gaᵽah ; gapah gaugu ᵽan gúraŋul funah fúsola.
Yo eĉil me ínje umu n’eogul jísangor, hani ᵽan min juom maa n’égogor ni sílam sammeŋe. Eúrus, yo nuffasal me búoh neh’ebaobao, níh’íni mee n’etujuli ni sambun bi ekan yo n’ekur das ; mo may gáinen gagu golul guot me gúlingeni ni sílam. Ban gáinen gagu gaᵽah me sílam, go gufaŋyofaŋ fúf ; guĉila ᵽan guŋallul me gamalen, gasal, ni gásumay no Yésu Kirista ajae me éraŋul. Yésu buru jimaŋolmaŋ m’bámusut jujugol. Jíinene n’aĉila hani ᵽan min jujugerutol me ; o aĉil me n’jísangor n’ésumay ró yájaloe iki an ájuut agiten mala yo, mata jiĉige ni wo gáinenul guŋese me, waamme gaᵽah gagu golul gaa bándor.
10 Gapah gaugu, uboñer waw bugal Aláemit guŋesgoŋes faŋ ban ni guroren nímoro bi effas mala go ; gúlobalie mala gáji gagu go Aláemit abaŋ me bi ni buru. 11 Biinum babu baa Kirista ubuen ni bugo, ban búlobaliillobali mala sílam sasu so Kirista ajae me élam, ni may mala gasal gagu go sijae me ebil siŋallol. Uboñer waw guliliᵽ bi effas tinah tay ni ᵽoᵽ bu waf wauwu ujae me ekano. 12 Bare Aláemit nagitenilgiten búoh firim fafu fo nasenil me let bi ni bugo fumumil, bare til bi ni buru. Firim faufu, fiĉila bugan bugagu gavaree me Firim fafu Fásum me guvareeul mee jama. Gulobulfolob ni búkanum baa sembe sasu saa Biinum Banabe báᵽullo me n’émit. Emalakaay faŋail gumaŋene guffas firim faufu.
Eroŋ buroŋ baa bugan ganabe
13 Yo eĉil me ñer juote jikan to uinumul, ban ni jíkanum faŋ. Jibaŋ gáhagumul ᵽoogo ni gáji gagu go jijae me eyab no Yésu Kirista ajae me éraŋul. 14 Jíkanum Aláemit ti uñil gúkanume me ubugail, ban jambi jilagen gaija gagu golul gaa naanaŋ, no jiffasenut me wáfowaf. 15 Ti Aláemit aĉobul me anab me, buru may juote jíni bugan ganabe ni bakanerul ᵽoobo. 16 Maagen mamu, Bahiĉer babu buoge : « Jíni bugan ganabe, mata ínje faŋaom ninanab* 1.16 Juluj Levitik 19.2. »
17 Nihi jíni mee n’galaw, leti ni’juoh : « Aláemit Ᵽayóli » ? Maagen aĉila ataliŋe me bugan bugagu m’balujut ni buul, ánoan ni bakaneri. Yo eĉil me, ni gunah gagu gaŋañoul me babe ni mof, mbi bakanerul bigiten gákanum gagu go jíkanumol me. 18 Maagen mamu, buru jiffase bacam babu baĉilul me n’jiᵽah ni bakaner babu bolul babajut mee nafa, bo sipayul gufan guhalul to me. Juosen búoh gaᵽah gaugu gucamuti ni síralam ter éurus, ter ᵽoᵽ ni fubaj fice fo nihi fubao. 19 Hani ! Físim fafu fatineni mee fo Kirista áyu me molul, fáni me ti faa jibbarum jajanjañ ban n’jukur, fo til fuᵽagenul me. 20 Aláemit naᵽie naĉob Kirista bi burok baubu balama buju babu baa mof, bare maer ni gunah gauge gúsola gauge nakae áᵽunnulol bi mala maaro molul. 21 O aĉile min jíinen n’Aláemit ailenol me ni gaĉet me aban nasenol gasal, dó ᵽe min mbi jiŋar gáinenul ni gafiumul jibaŋ n’Aláemit.
22 Jikakan bugan ganabe mala min jíkanum me maagen mamu, iki júbbolior ti batiay gábboli gaa maagen. Kan ñer júbbolior faŋ, n’uinumul ᵽoowo. 23 Firim fafu fal Aláemit fukanulkan n’jíni bugan guvugul, bugan gabbañe gubugi. Firim faufu filet eugit yajae eĉet, eugit yom yarondoŋ. Fújuut fiĉet, ufu to bi nánonan. 24 Maagen mamu, Bahiĉer babu buoge :
« Arafuhow ánoan nánini ti mafos,
ban gasal gagu gola, go, gúnini ti gaya gaa gafos :
gafos gagu ᵽan guhay,
ban gaya gagu gala go n’gumulo ;
25 bare Firim fafu fal Ataw, fo, ufu to bi nánonan 1.25 Juluj Esai 40.6-8. »
Firim faufu fo fuomme Firim fafu Fásum me fo guvareul mee.

*1:16 1.16 Juluj Levitik 19.2

1:25 1.25 Juluj Esai 40.6-8