Eletar yay étiar yo Pool ahiĉ me bugaa
Tesalonik
Waf waw wabaj me n’eletar yauye
Ni bújaorol búutten baa gavare Firim fafu Fásum me Pool ailene jangu yay yaa Tesalonik. Náffusulo ró o báᵽurerul ésuh yay yaa Fílip. Tesalonik ésuh yom yaam ni mof mamu maa Masedonia, lof mof mamu maa Geres. Esúh yom yaa gájulla ; yo eĉil me ejaora gammeŋe n’guĉin dó, ban Esúif yay n’gufaŋ dó jammeŋ. Esúif guce guruhenut baligener babu baa Pool, yaĉil me n’guhamol. Pool ñer nahiĉ bugaa Tesalonik bugagu gamaŋ me eyab gáinen gagu gavugul gagu. Mamu ñer, náfaro galigen gagu go naamil me ni go.
Bugan bugagu gabaj me gaffas n’Ebibul yay guᵽinore búoh eletar yauyu eomme eletar Pool étiar yo nahiĉe ejangara. Iní me mo, yo ñer ᵽan efaŋ me n’éfanume ni Bahiĉer babu Buvugul babu ᵽe.
1 Tesalonik 1 bi 3 sigitenolal gajogor gagu go Pool abaj me ni bugaa Tesalonik. Naune gurim gásume gáᵽullo bo ni janguil. Naosene burok babu bo nakan me ni jangu yauyu. Nagitene bu súmol me ebbañ ajugil.
Ni 1 Tesalonik 4 bi 5, Pool nasenil buaken tima n’gujow fáĉil ni fujangaraetil. Nábale suroren siceso sayogene me fuomunor faufu fuvugul faufu. Ejangaraay gútiar ubugien n’enah min Yésu ábbañul cab. Guce n’ejangaraay ubugi guĉele, ban Ataw Yésu bi maer alet. Ejangaraay bugaa Tesalonik ubugu n’erorenor bu bugan bugaubugi gacet mee ᵽan gubil gúni. Pool nábalil aah : gaĉet me ni garoŋ me, bugo ᵽooil, gujogojogor ni Yésu Kirista. Funah fice, bugo ᵽe ᵽan guileni n’eĉet yay. Enah ébbañul yay yal Ataw Yésu ebaje hámma, bare bajut an affase tinah tay ébbañul yauyu ejae ekano. Wafaŋ me n’ubaje nafa, wo uomme eroŋ ni gajogor n’Ataw, eroŋ ti aĉila amaŋ yo me.
1
Basaf babu baa Pool
1 Injé Pool ni Siliveŋ ni Tímonte, wóli ubugi n’esaf jangu yay yaa Tesalonik, yaamme yaa Ᵽayolal Aláemit ni ᵽoᵽ yal Ataw Yésu Kirista. Aláemit asenul gájiol ni gásumayol.
Pool o n’esal Aláemit mala gáinen gagu go bugaa Tesalonik gubaj me
2 Nánonan wóli ubugi n’esalen Aláemit molul, ban juuneneulwunen wóli n’galaw. 3 Bújoŋor Ᵽayolal Aláemit, juosenewosen bu gáinenul gujugi me ni bakanerul, bu gábboliul gurambenul me min jiaken n’jurok, ni ᵽoᵽ bu gafiumul go jibaj me n’Ataolal Yésu Kirista gurambenul me min jútuh liŋ. 4 Gutióli, wóli jiffase búoh Aláemit namaŋulmaŋ faŋ, bireg naĉobul jíni bugola. 5 Maagen mamu, no jigitenul me Firim fafu Fásum me, let ni gurim barebare jigitenul fo, bare ᵽoᵽ manur ni sembe sasu ni garamben gaa Biinum Banabe ni may manur n’gafium gámah búoh firim faufu faa maagen fom. Buru bae jiffase bu wóli jiiye ni buru maa maaroul.
6 Jilagelagen bakaneróli ni bal Ataw Yésu min jílam me táñi no jiyab me firim Aláemit, bare jiyayab ᵽoᵽ ésumay yay yo Biinum Banabe bisene me. 7 Mamu, jibbanno jíni bilihorum bi ni ejangaraay ᵽe bugaa mof mamu maa Masedonia ni mal Akaya. 8 Maagen mamu firim Ataw fáᵽullo me ésugul, let Masedonia ni Akaya bare fítije, bare ᵽoᵽ gáinenul guunowuno guban babu ᵽe, bireg wóli jusoholaut egiten uce jitajen. 9 Maagen, bugan bugagu ᵽe gugitenegiten bu jiyabóli me no wóli juomen me ésugul, ni ᵽoᵽ bu buru jujunden me sínati sasu min jíbaho jimigelet Aláemit, aĉila aroŋ me ban náni ala maagen ; 10 ban ᵽoᵽ buru ubugu n’enah ébbañul yay yal Añolol Yésu o nailen me ni gaĉet me, ajae me éᵽurul fatiya akelolal eᵽagen ni bataliŋ babu bal Aláemit bájaeul me.