1 A ! Gutiom, jújuen me jumuten jatiito batey-fuhow babu búmbam ! Ey, jumutenom ! 2 Nimaŋulmaŋ faŋ bireg nísilaet molul ; físil faufu Aláemit faŋaol asenom fo. Anáine anur pat nisenul áni aᵽañaul, o aamme Kirista ; ban nimaŋe iŋarul igitenol ní ti bájur affaserut ánaine. 3 Bare níholiholi baj n’uinumul uᵽinor waarat, min jihalen étuh liŋ ban ni júᵽur ni gajogor gagu go jujogor me ni Kirista. Enuhunjaŋ yay mamu may ebij mee min ebut Eva*11.3 Juluj Fíĉilum 3.1-5. 4 Maagen mamu, íni me an najoulo aĉigul navareul mala Yésu ace ábulie ni o wóli jivareul me, buru ᵽan jifaen juoh ey. Mo may ᵽan jifaen me jiyab biinum bice bábulie ni bo jiyab me no, min jíinen firim fice fásume fábulie ni fo wóli jivareul me. 5 Niege bugan bugaubugi bugo buru juoge me uᵽotora búgamah gom gufaŋutom ni wáfowaf. 6 Júe kan maagen íseliut n’elob, bare niffase waf. Wóli jigitenulyogiten ŋanno ca ni bakaner bánoban.

7 No nivareeul me Firim fafu Fásum me fal Aláemit, irorenutul bacam bánoban ; nialenoroalenoro til min itebenul. Nikan mee nigalengalen ᵽiaŋ ? 8 Nibebet me sijangu sice ni bacam babu bo sisenom me min irok bi ni buru. 9 Ban no niomen me ni buru, jogom me ni waf, nd’iyogen an. Gutiolal gáᵽullo me ni mof mamu maa Masedonia gubile nihi gurambenom ni waf waw wo jogom me ni wo. Nilujtoluj iluj, nijogoro jamb’ibil ikanul bíteb, ban ᵽan ijogoro to me jamb’ikanul bíteb bi nánonan. 10 Ti nifium me búoh maagen mamu maa Kirista umu n’ínje, mo may nifium me búoh tánotan ni mof mamu maa Akaya ᵽoomo mati baj an ajae éfirom esaloro mala yo. 11 Ban wa uĉile nikan maa ? Gamaŋutomul ᵽiaŋ guĉile ? Let mo ! Aláemit naffase bae búoh nimaŋulmaŋ. 12 Wo nikane maa ᵽan ibbañ nih’ikan wo jamb’ibil isen bulago bugan bugagu gamaŋe me ekaror mala min guroke me ti wóli, m’bayabut bacam. 13 Bugan bugaubugi gukanekan nan bugo uᵽotora gom bugaa Kirista, bare gulet uᵽotora ; uroka bugom bare bugo nihi gubut bugan. 14 Bajut to gajahali gánogan, mata Seytane fumumol nakanekan nan amalaka nam ala gajaŋa. 15 Yo eĉil me ñágenut min urokaol gukane mee nan uroka bugom gaĉole. Bare buroŋil ᵽan bubao hóji jaor ni burok babu baarat mee bo gukan me.

16 Ban ibbañ ilobul iegul : jambi an ni buru ajogom ti atea ni fuhow. Bare eno me mamu jiᵽinore, kan jimaŋ gaa búoh nitetey ni fuhow min mb’íju may ikaror jatiito. 17 Wo nijae me elob maer, let Ataw aĉilom min ilob wo, bare nilobwolob ti an atee ni fuhow, ni gafium ró búoh ᵽan íbajum to wo niete íkarorum ni wo. 18 Nemme bugan gammeŋe gukarokaror mala gániil gal arafuhow, kan ínje may ban ikaror. 19 Buru jalillo me re mamu, mo jifaene jilagen uligenaaw gatey mee ni guhow ! 20 Buru, buru jimaŋe min bugan gukanul umigel, n’gutiñ ni sinilul, n’gúkuetul, n’gualenul bi to, n’gutegul n’uul. 21 Nisusu elob yo : kan wóli bágotooli biĉil me jikanutul waf wauwu.

Ban ilob ti an atee ni fuhow ieh : Waf wo guce gukañene gúkarorum ni wo, ínje may níjue íkarorum ni wo. 22 Guoh me bugo bugaa Híbori bugom, ínje ᵽoᵽ mo nem, n’guoh bugo guñol Israel bugom, ínje may mo nem, n’guoh bugo gabulaken bugom gal Aburaham, ínje ᵽoᵽ may go nem. 23 Guoh me bugo uroka bugom bugaa Kirista, ᵽan ñer ilob ti an atee ni fuhow ieh ínje ifaŋil nínie aroka ala Kirista. Nifaŋil nílame ni burokom, nikuli faŋ ni meŋe bugo. Gúteh gagu go niyab me gufaŋe golil, ban ñammeŋe níᵽimbore n’eĉet yay. 24 Ñono futoh Esúif yay n’etegom gusoh gal ubaŋ bi ñono ávi ni gaat ni ñabbagir (39). 25 Bugaa Rom n’gutegom gusoh gal ubaŋ bi ñono ñáfaji ; bugan gutegom ñanur sival gúbuken ; níuyoe ni busana ñono ñáfaji ; baje ñice no nírendore ni fal etufunaha lám ni efuga yo. 26 Nijaore ñammeŋe n’guot, ban níni n’eĉet ñammeŋe ni bújaorom n’utuh waw, n’éᵽimbor n’úku umuga-bugan, ni búkanum baa gupalom Esúif ni ᵽoᵽ baa bugan galet Esúif ; níᵽimbore n’eĉet ni súsuh sasu súlulumay sasu, ni siᵽarandaŋ sasu, ni gal gagu, ni guñen gaa bugan bugagu gabije me n’guoh bugo gutiolal gom. 27 Nirodok táñi ban nílam may faŋ ; ñammeŋe nibajebaj buŋaŋ ; nih’icaret ban nd’ibaj irem ; ñammeŋe nih’imomor m’bamaŋut yo ; ñutot nihi ñujogom ban nd’ibaj wañ ikano. 28 Imaŋut ilob mala waf waw ᵽe waŋaño bo me : wafaŋ me ejogom funah-ó-funah, wo uomme gaᵽinor mala sijangu sasu ᵽooso. 29 An ágoto me, ínje faŋaom may nígoto ; an alo me ni gatil, ᵽan habom faŋ.

30 Iní me ban ikaror, kan ᵽan ikaror mala bágotoom. 31 Aláemit aamme Ᵽaaya ala Ataw Yésu naffase búoh ibijut. Gasal gúni ni o bi nánonan ! 32 No niomen me n’ésuh yay yaa Damas, afan mof mamu o ávi ahu Aretas aroben to me nasesen buganol gúboñ min gupoy únonum ésuh yay tima n’gujogom. 33 Bare m’baj bugan gukanom ni gabongor, ban ni gúñatenom n’elajen gualen búsol fiteᵽ fafu fal ésuh yay. Mamu níᵽagumol me†11.33 Juluj Mukanay 9.23-25.