Eletar yay yo Pool ahiĉ me bugaa
Kolos
Waf waw wabaj me n’eletar yauye
Kolos kakan ésuh yaam ni mof mamu maamme jama Turuki. Nogonogor nan Pool ámusut áriŋo ejangaraay bugal ésuh yauyu.
Pool naune búoh ni jangu yauyu baj ró bugan gabute ejangaraay. Bugan bugaubugi guligeneligen waf wallaje wo Firim fafu Fásum me faa Yésu Kirista figiten me. Guoge bugaa Kolos gulagen mukanail maa no, ban ni guogil ᵽoᵽ gukan bíteŋen siceso siᵽaŋ saamme n’ekan burok so ni mof mamu.
Eletar yauye egitengiten ñer gáni gagu gaa Kirista, aamme an ahu o Aláemit aĉob me aban naboñulol bi eᵽagen bugan bugagu. Dó Kolos bugan bugagu gúholiholi siᵽaŋ sasu so an ájuut me ajuh, sabaj mee sembe ni mof mamu. Ban Kirista nafaŋsofaŋ sembe fúf. Aláemit náᵽureᵽuren gáju gagu gala so ni gaa sasu sembe ᵽe, no nailen me Kirista aamme añolol ni eĉet yay. Kirista o aamme may fuhow Jangu yay, yo bugan bugagu ᵽe gáinen me guomme enil yo. O aamme afan bugan bugagu ᵽe gáinen me. Bugan bugagu gáinen me, ni gábatiseil gugumum me ni Kirista eĉelol ni buroŋol ; gubbanno gúni bugan guvugul.
Pool namalemalen Kirista ti Ataw ala mof mamu ni ᵽoᵽ ala Jangu yay (Kolos 1.15-20). Ᵽúrto gáfoñ gaugu, Pool naosen bútajol bo naamme n’etaj bi mala jangu yay (Kolos 1.24 bi 2.5).
Mbiban, Pool naah ejangaraay bugaa Kolos gúludo (Kolos 2.6-23). Guotut guutten bugan bugagu galigene me gurim galet gaa maagen, bare til guote gujoh to ni baligener babu bo guyab me.
Ni fúbanum fafu, eletar yay etatar mala eroŋ buroŋ buvugul tánotan : ni jangu, ni yaŋ, ni bugan bugagu ᵽe (Kolos 3.1 bi 4.6).
Baligener eletar yauye bo buom to bi jama. Kirista naᵽageᵽagen bugan bugagu ni fujoh faa siᵽaŋ sánosan. Naᵽagenil ᵽoᵽ ni waf waw ᵽe wáfaculoreil me.
1
Basaf babu baa Pool
1 Injé Ᵽool aamme aᵽotora ala Yésu Kirista, ni búnongum bal Aláemit, ínje ni atiolal Tímonte wóli jihiĉulo maa eletar yauye 2 bi ni buru bugan bugagu bugal Aláemit jaamme gútioli gáinen me maagen mamu ni Kirista bugal ésuh yay yaa Kolos. Mbi Aláemit Ᵽayolal ásonienul ban nasenul gásumay !
Pool o n’esal Aláemit mala bugaa Kolos
3 Nánonan no wóli juom n’elaw bi ni buru, jisalesal Aláemit Ᵽaaya ala Ataolal Yésu Kirista. 4 Jisalolsal mala min juun me lobi mala gáinen gagu go buru jibaj me ni Yésu Kirista, ni mala gábboli gagu go júbboli me bugan bugagu ᵽe bugal Aláemit, 5 dó ᵽe mala min jifium me ni waf waw wo Aláemit abaŋ me n’émit bi ni buru. Gafium gaugu jibaj go kábiriŋ funah fafu no juun me firim fafu faa maagen faamme Firim fafu Fásum me. 6 Maagen mamu, Firim faufu Fásum me fiĉiloĉih ni buru ti fuᵽol me tánotan ban ni fúŋarul gásonien ni mof mamu ᵽoomo. Mo may fukan mo me ni buru kábiriŋ funah fafu fítiar no juun me gulobul mala gáji gagu gal Aláemit, ban ni jiffas maagen mamu mala fo. 7 Epafuras, aamme apalóli aroka o júbbolie faŋ, aĉila aligenul mee waf wauwu ᵽoowo ; nakakan bi ni buru aroka ala maagen ala Kirista. 8 Ban aĉila may alobóli me mala gábboli gagu go Biinum Banabe bisenul me.
9 Yo eĉil me kábiriŋ funah fafu no wóli juun me gulob molul, jihalut elaw Aláemit bi ni buru. Jilaeollaw min akanul n’jiffas joon búnongumol, jaor ni malillo ni mujah sánosan so Biinum babu bola bisene me. 10 Mamu, mbi juroŋ ti Ataw amaŋ me, ban nihi jikan nánonan wásumol me. Mbi bakaner bánoban báarie bujugi ni buroŋul, ban mbi jow fáĉil n’effas yay Aláemit. 11 Jilaelaw ᵽoᵽ min aŋar sembe sasu saa bájalool min aliŋenul ni waf waw ᵽe, tima n’júju jumuten wáfowaf ni gajogoro ni ésumay ró, 12 ban n’jisalen Aláemit Ᵽaaya, aĉilul me min júju jiyab fugabul ni gafum gagu go nabaŋ me bi ni ganab me dó ni Jávi jaju jaa gajaŋa. 13 Naramolal ni fujoh faa sembe sasu sal emoĉ, aban nájaenumolal bi ni Jávi jaju jal Añolol o namaŋ me nár. 14 O aallorolal me min újual uyabal gaᵽah ni gaboket gal utilolal.
Kirista nafafaŋ waf waw ᵽe
15 Kirista, aŋar me enil yal an, gániol ganur gom ni gal Aláemit ajugériti me ;
o aamme Erímbani yay yamundum me éni balama báuwener babu ᵽoobo
ban nefaŋ bo ᵽe.
16 Maagen ni o waf waw ᵽe úuwenumi me,
waf waw waamme n’émit ni waamme n’ettam,
waf waw wajugei me ni wajugériti me,
efenjeŋ-ó, jávi-ó, sembe-ó, gakañen-ó.
Ey, waf waw ᵽe n’aĉila Kirista Aláemit átulum wo,
ban nátul wo bi ni o.
17 O amunde waf waw ᵽe áni,
ban waf waw ᵽe wabaj me ni guñenol wom.
18 Aĉila aamme fuhow fafu fal enil yay, yaamme Jangu.
Aĉila aamme fíĉilum fafu,
aĉila amundum me bugan bugagu ᵽe gaĉet me ailo ahat eĉet yay ;
mamu ᵽan áni átiar ni waf waw ᵽe.
19 Ey, súsum Aláemit min akan bájalool ᵽe m’biĉin ni o.
20 Ban ni o nákanum me min gajamor gubaj tutorol ni búuwenum babu ᵽe :
min áyu me físimol n’ekurua yay,
yo eĉil me búuwenum babu ᵽe m’bubaj gásumay,
bugaa n’ettam bi ni bugaa n’émit ró.
21 No, buru jíralienrali Aláemit ban n’jínien ulatorol mala uᵽinor waw wolul ni bakanerul saarat mee. 22 Bare maer Aláemit n’eĉet yay yal enil Añolol, yaamme enil arafuhow, nájoume min akanul n’jíbbañul jijamor n’aĉila faŋaol. Nakanmokan tima n’júju jiilo bújoŋorol manabe, buru m’babajut gatil gánogan ban an mát’áju alob maarat aya ni buru. 23 Dáuru ᵽe ᵽan dúju dikano buru bátuger liŋ ni gáinen gagu, buru m’bahalut bo gafium gagu go jibaj me ni Firim fafu Fásum me fo juun me. Firim faufu Fásum me fo guvaree mee búuwenum babu ᵽe baamme ni mof mamu, fiĉila ínje Pool ibbanno mee íni avarea ala fo.
Bu Pool álam me mala Jangu yay
24 Maer ínje umu n’ésumaet mala sílam sasu so niyabe maa n’enilom molul, mata so sijae me ériren waŋaño bo me bi maer ni sílam sasu saa Kirista so nálam me mala enilol yaamme Jangu yay. 25 Nibbanno íni aroka ala Jangu ti burok babu bo Aláemit asenom me molul buroren me : naboñomboñ bi egiten firimol ᵽoofo, 26 faamme bakiĉerol bo naᵽi me n’ekoᵽen bugan bugagu, ban jama nagiten bo ŋanno ca buganol. 27 Súmolsum min agitenil bakiĉer baubu, bájalo bo ni ᵽoᵽ jáari bo, babaj me bi mala súsuh sasu ᵽe. Bakiĉer baubu, bo buomme ube : Kirista umu ni buru, ban nakanul n’jíhagum gaa búoh ᵽan jiyab fugabul ni Jávi Aláemit. 28 Kirista ahumu, o wóli juom maa n’egiten arafuhow ánoan mola. Jitaretar, ban jiligeneligen ánoan ni malillo mamu ᵽe mo jibaj me, min mbi ánoan áᵽur bújoŋor Aláemit makure das ni búkanum baa Kirista. 29 Waf wauwu uĉil me níni n’eaken min itaj tima níju íuñen burok baubu ni sembe sasu saa Kirista saamme n’ekan waf wámah n’ínje.