Sonas
Waf waw wabaj me n’élebur yauye
Elébur yauye yaa Sonas enogonogor ti garej gaaro gukan bugan bugagu n’guᵽinor. N’elob mal an o Aláemit aboñe. Naboñol mb’ajow bi ésuh yay yaa Niniv, min alob bugala yo táñi. Mata bugo nihi gúcetenceten súsuh sasu salofil me, sabajut me sembe. Dó n’élebur yay yaomen me gurim Aláemit ᵽe, ésuh yay yaa Niniv kakan ésuh yákandit maagen, ban nélaᵽut mámah (ti lobi me n’élebur yay yaa Nahum). Sonas amaŋut eke bo. Natey dáli jambi áttun gavoh Aláemit.
Elébur yauye egitenolal bu Aláemit ábahen me o naboñ me.
Firim fítinar fuogolal Sonas nak’affas búoh an ájuut atey dáli Aláemit. Sonas nájuᵽo ni baraca baam n’ejow évu búsol ésuh yay bo naaro me ajow. Bare Aláemit nainnul fúrus fámah ni fal fafu. Bugaa baraca babu n’gúholi maa buroŋil, ban ejaora gom gaffasut Aláemit. N’gugiten Sonas búoh o aĉil me matañoil. Bare búsol n’gúbbañul gúkanum Aláemit Sonas.
Firim fúuten fuogolal Sonas nak’affas waamme éhatulo n’Aláemit. Mata Aláemit naalenol bi n’ettam fal iki eol émerol. Ban dó n’élebur yay yaomen me gurim Aláemit ᵽe, fal kakan tiñ to waf waw waarat me ᵽe ni eĉet som. Dó n’ettam fal fafu, Sonas nálaul min mb’aroŋ. Najuge búoh Aláemit bare ájue aᵽagenol. Yo eĉil me naramor asalol.
Firim fúfaten fuogolal Sonas ñer nabile áttun Aláemit min akay mbaa Niniv. Nalobil mala gafumo ésugil. Bare bugal ésuh yay bi n’áviil ró n’gujoh biinum bi ehat bakaneril baarat me. Ti may ni firim fítiara, ejaora gubbañe gúkanum may Aláemit.
Firim fubarigen fuogolal Sonas fiiñol ni fitiñ mata Aláemit afumut Niniv. Bare Aláemit ajundenutol. Nacokorol nagitenol búoh aliᵽut eĉet yaa bugan bugagu gálaᵽut me. O til namaŋe guhat bakaneril baarat me min gúju guroŋ.
N’eban élebur yay, Aláemit naroren Sonas. Uffasutal wo Sonas ábahulol me. Mo may, suroren sasu usu to bi ni ánoan ajae me ejanga élebur yauye : Nemme Aláemit nah’amamaŋ ejaora, nabbañ aboket gálaᵽut me, bu ᵽan uᵽinoral mola ?
1
Sonas nalih etey Aláemit
1 Baje ace áine, gajaol Sonas, ᵽayol gajaol Amitay.
Ni baj funah fice, Atúla navogol naagol : 2 « Uilo ujow bi n’ésuh yay yámah yay yo guoge me Niniv, min uĉafil uogil búlaᵽut babu bo guomme ni bo, nipoñbopoñ. » 3 Ñer Sonas nailo ajow, bare bi etey mbal ésuh ece, gajow yo Tarisis, bi éhatulo n’Atúla. No naĉih me n’gásih gagu gaa Jafa, natoh to baraca baam n’ejow ni fal fámah mbaa Tarisis. Nacam ejaol min ájuᵽo mimanur ni bugan bugagu gajae me Tarisis, dó ᵽe bi etey Atúla.
4 No gutey me guĉih babu, Atúla nayalil fúrus fáamah, fal fafu ni fiteh iki fumaŋ efum baraca babu. 5 Ujaoraol n’gúholi, ánoan náᵽib nalaw nímoro álaemilol. N’guteb wañil ᵽe gubelen ni fal, mata mbi baraca babu bufaŋ m’bivilie. Sonas kan aĉila umu ró ni gatal bo, min ámoe ahay was.
6 Ñer afan baraca babu najow atogol to naagol : « Buenne ? Aw gámori ? Uilo ulaw álaemili ! Ter ᵽan arumolal enil jamb’uĉelal. » 7 Bugaa baraca babu n’gúᵽur jolil n’guoh : « Uñagoral usos min ujugal ay ni wolal aŋallo me biᵽila baube. » No guñagor wo me, ni lo ni Sonas. 8 Ñer n’gubbañ iki guogol : « Biᵽila baube, aw ukanóli bo. Ugitenóli wa nuom dáre nekan. Bay núᵽullo ? Aw an bu ? » 9 Nábahulil : « Injé an ala Híbori, ban ni Atúla níinene aamme fatiya, Aláemit átut me fal ni ettam. » 10 Naban nagitenil waĉil me naam n’etey ráli Aláemit, n’gúholi nár. N’guogol : « Nujuge bakaneri ! » 11 N’gutajen guogol : « Ñer bu jijae ekani tima fal fafu ni fulluhor ? » Mata gulongos gagu ugu n’efaŋ n’gutege. 12 Naagil : « Jujogom jibelen dó, mo fal fafu ᵽan fibeben. Maagen niffase búoh ínje iĉile min fúrus faufe fubaj. » 13 N’gumundum ᵽan gulih even bi n’galam, bare gújuut mata fal fafu fufafaŋ ni fitege. 14 Ñer n’gulaw Atúla n’guogol : « Jamb’umugóli mata ahume ! Jamb’ujogóli may bugan gamuge an añumenut eĉet ! Ban aw Atúla, nukakan wo numaŋ me. »
15 No guban me, n’gujoh Sonas gural dó. Ñer fal fafu ni fúbbañul fíjebi. 16 Ni ᵽúrto, n’gúkanum Atúla nár iki gukanol bísimen min gubbat gáinenil ni o.