3
1 Gafaŋ gay baje ñer éni Asúif, ter nafa yay baje enogen búhut ? 2 Ení Asúif nafa yo hum éjalojalo ni waf waw ᵽe. Waf útiar wo uomme búoh bugo Esúif yay Aláemit asen me Gurim gagu gola. 3 Ñer bu ? Mánoman guce ni bugo gúinenut, gáinenutil gújue ᵽiaŋ guĉil min Aláemit ahabo ekan wo nalob me ? 4 Múk ! Ukanal n’uinumolal gaa búoh Aláemit an ala maagen om, ban arafuhow ánoan abija nam. Maagen mamu, Bahiĉer babu bulobe mal Aláemit buoh :
« Mbi maĉole mujugi ni gurimi,
ban an ájuut aceŋ bataliŋeri*3.4 Juluj Ufóñ 51.6. »
5 Bare íni me gaĉolutolal gukane min gaĉol gagu gal Aláemit gufaŋ n’gujugi, wa ᵽan ulobal to ? Aláemit ᵽiaŋ aĉolut o bategerolal ni bitiña-fiiñol ? (Nilolob ti arafuhow nah’alob me.) 6 Hani ! Kan mo me, bu ñer Aláemit ajae me etaliŋ mof mamu ?
7 Bare íni me jibijom ᵽan jiĉil min maagen Aláemit mufaŋ ni mujugi, wa uĉile naroŋ n’etaliŋom ti atila ? 8 Iní me mo, wa uĉile mat’uogal ñer : « Ukanal maarat min mbi múŋarul maaro » ? Mamu ubija guce gúmeñeoli mee n’ebij gutególi búoh wóli mo julobe. Bugan ti bugaubugu guᵽiloᵽilo eyab gúteh !
Bajut an aĉole bújoŋor Aláemit
9 Wa mul ? Wolal Esúif nufaŋalfaŋ bugagu ? A-a, ufaŋutalil. Nigitenulgiten iban gaa búoh wolal ᵽe, Esúif ni galet me Esúif, wolal ubugi ni fujoh faa gatil gagu, 10 ti Bahiĉer babu bulob yo me buoh :
« Bajut an aĉole, mele an anur.
11 Bajut an ajage, bajut an aliᵽe Aláemit.
12 Bugan bugagu ᵽe bugan bugom galimbe,
gúbahobaho ᵽooil.
Bajut an ni bugo akane maaro, mele an anur†3.12 Juluj Ufóñ 14.1-3.
13 Ugundahil únini ti guyah gápegulipegul,
gúrerumil gurim gal ebut bugan bare nihi gulob,
bíniw bal enuhunjaŋ gubaje n’utumil‡3.13 Juluj Ufóñ 5.10 ; 140.4,
14 utab ni mátalie bare simmeŋene utumil§3.14 Juluj Ufóñ 10.7.
15 Guolil gujanjañ bi eke éyu físim.
16 Tánotan to gúgale, n’guhat búsolil gahajen ni mataño.
17 Bulago babu bájaenume me mbaa gásumay guffasut bo*3.17 Juluj Esai 59.7-8.
18 Gákanum Aláemit gulet ni bugo†3.18 Juluj Ufóñ 36.1. »
19 Ban nuffasale búoh waf waw ᵽe wo gúboñ gagu gulob maa gulobwolob bugan bugagu gaamme ni guñen gúboñ gagu. Mamu butum bánoban ᵽan bipegi, ban bugan bugagu ᵽe ᵽan gujogi ti utila bújoŋor Aláemit. 20 Yo eĉil me, mati baj an aŋare sembeol min akan wo gúboñ gagu gulob me iki ᵽilo min Aláemit ajogol an aĉole bújoŋorol ; gúboñ gagu, go, egitenolal waamme gatil bare.
Eínen ni Yésu Kirista ekanekan an naĉol
21 Maer Aláemit nagitenolalgiten bu nakaneolal me núnial bugan gaĉole bújoŋorol, ban dáuru ᵽe let ni búkanum baa gúboñ gagu. Bahiĉer babu baa gúboñ gagu ni bal uboñer waw biᵽie m’bigiten yo buhato : 22 Aláemit najojoh bugan bugagu ᵽe gáinen me ni Yésu Kirista bugan gaĉole bújoŋorol. Nakanmokan bi ni ánoan áinene ni o. Maagen mamu, bugan bugagu gúbuliorut : 23 bugo ᵽe gutitil, ban ni gúbbur fugabil faa gasal gagu go Aláemit amaŋen me asenil. 24 Bare Aláemit náreundeum ejogolal bugan gaĉole bújoŋorol, dó ᵽe mala min Yésu Kirista aᵽagenolal me no nasen me buroŋol bi búallor utilolal. 25-26 Aĉila Yésu Aláemit aᵽi me naĉob bi éni bísimen babu baalen me bitiña-fiiñol, tima físimol fáyui me ni fúŋarul gaboket util waw waa bugan bugagu gáinen me ni o. Mamu, Aláemit nagitene búoh o naĉoĉol. Maagen naanaŋ namutemuten bireg akanut ni gaᵽin util waw waa bugan bugagu ; maer nagitene ñer maĉoleol min aĉolen nímoro ánoan áinene ni Yésu.
27 Wa ñer ᵽan uĉil nusaloroal ? Bajut ! Wa uĉile bajut ? Ter bakanerolal bo ᵽan biĉilolal núnial bugan gaĉole bújoŋor gúboñ gagu ? A-a, bare til gáinen gagu gololal ni Kirista, go gujae yo eĉil. 28 Nújuale uogal maagen mamu : Aláemit najogolaljoh bugan gaĉole bújoŋorol mala gáinenolal ni Yésu, let mala búoh nukanalekan wo gúboñ gagu gulob me. 29 Min ᵽiaŋ Aláemit o ala Esúif yay bare nam ? Alet may ala galet me Esúif ? Ey, o may ala galet me Esúif. 30 Maagen mamu, Aláemit anur abaje, ajae me eĉolen gáruri me búhut ni gáruruti me búhut ni gáinenil. 31 Ban ñer uŋaral gáinen gagu min unemenal gúboñ gagu ? Hani ! Ban til uŋaral go min usenal gúboñ gagu hámma yaa maagen.